Yòv Viŋgér 1 - ŊWÀʼ NYÙY

¹ Luŋ wo wú tíy vitú fo lùŋ se Solomon si.

Luŋ mbìyi Kisúŋnìn ke jìn:

² Tàr à wíri, wìr ku lì ji à kì baàmé mo, a nyoŋrí mo fó shuù. Nyomèr ye à kì yíi a nyòmèr moó bòŋ, e shaà meluʼ.

³ Kiyóʼóy ké ke bìʼ ki rəm, rəʼtìnè, aà kù dzə̀ é kilùm moo kirə̀ʼtìn ke bìʼ rə̀n. Á nsàv ye wónlě ŋgòne kù kpú kpuún e wò bàm.

⁴ Kii wò, ku lì mo, e lèʼ shó. Fòn, ku lì mo, e nə̀ə́ sho e wun mbvə̀ʼ kishìíy. Tàr à wíri, vèr shéʼri wò feyì, séŋ bèn, savnìnè. Géʼ ye à géʼ e wìrkóyti wòo bòŋ feyì, e shaà meluʼ. A kù dzə̀ wónlě ŋgòne tàtí, a kòŋ wò bèn.

Kisúŋnìn ke wón jìn: Kisúŋnìn ke jìn:

⁵ Wónlě ŋgòn veé Jerusalem, m kér nshòm ye sənér, sə́n bèn, kù yòʼ kiʼ kijuujùŋ. Səə́ne moo ndzə̀y se wír ve á ghán e woʼ yeé Kedarìi tám táv sév shó. Səə́ne bèn, kiʼ e juŋ moo ndzə̀y se vé‑eè gìŋèn virə́ʼ shó e Solomon ntoʼ.

⁶ Lá à yòʼ a nəə̀nè mo, a leéy mo ntéŋ ji m sə́né. Shùy tòn ne mo, m bínkír, a sən sənén. Lúmér sém sí‑iì wày vibàn e mǒ bàm, e kàn ji m kù kér fó a lìm súm vitiír vé *vayin, a wómé tíyí, a m yòʼ yú fó yiì viŋgòn sho.

⁷ Òó mbaà, ŋkar yem tìm, ku sùúy e mò, à yíi a tsəəné njiì, a dù sho a dzə̀ feé? Shùy yíi koŋrí, aá wáa neŋ a dzə̀ feé? Ku yòŋ, fo m yiì a ghan, a jan e kwaʼ, a ghan e ŋkar sé sí mvə̀m njiì, a shwinín kwàrà.

Kisúŋnìn ke lum jìn

⁸ A dzə̀, a bó à yòʼ kì fó, éè mǒ wiíy wo wù bòŋèn, e shaà vikìy adzə̀m, à kù a dzə̀ a dzə̀ kiwuú ké njiì wom. A dànèr wón njiì vé, a koʼtí sho aànshìyí ghaa vibàn, aá bónén, a yikír fo.

⁹ Yìy à wíri, leéy nyamŋkoʼ ye yì səŋ kár Farao, á nàŋsín, yì bóŋ é ŋàŋ, kù dzə̀ sá mo à bòŋèn.

¹⁰ Vifá ve sùsù vi sə̀tí ne búbúʼ sé, aà wày ne shàŋ wo wù njaʼkìrì e wò kilòŋ.

¹¹ Vèr yíi fèr vifá ve sùsù vé e *kisha ke mbàm ke baar kí, e nàvtì e kisha ke mbàm ke fəvír kí.

Kisúŋnìn ke jìn:

¹² Tàr à wíri woo fon wom lóo yeʼtí e wun kàvàʼ e mǒ ghaŋ, biʼ yém yeé kilùme wàa fəə́r kirəm ke rəʼtìn kí.

¹³ Ŋgaà ŋkòŋmé wom dzə̀ moo shintuʼ she kilay kee *mer, a shí néŋ e mǒ vikàkàŋ vitsə́ʼ vifur, rəm, rəʼtìnè.

¹⁴ Ŋkar yem tìm dzə̀ moo kiŋkur ke vibuùshì, vibuushì, a ví buy e sum seé En‑Gedi, rəm, rəʼtìnè.

Kisúŋnìn ke lum jìn:

¹⁵ Yìy à wíri, dzə̀ rú, à bòŋ e ŋàŋ. Rúrú, à bòŋ e ŋàŋ. Wón si vée rán moo vé kibìŋ, din ji à dzə̀ wir nyaáŋ.

Kisúŋnìn ke jìn:

¹⁶ Tàr à wíri, à dzə̀ nsùm, à dzə̀ wír, aà mèé. Leéy, kikún kesò ki dzə̀ kikwiíy, a kí rəsìnè.

¹⁷ Mboòmè se lav yèsò, vicí vé *sidar. Nsə̀n, vicí vé dzəʼə̀y.