Yòvdìy 3 - ŊWÀʼ NYÙY

Nyùy maʼ ŋgeʼ e wìr kitu, wù kfə̀n shàm wun

¹ Mo wo m sáŋ vinyo vìn, m dzə̀ wír, a Nyùy‑iì yiì ne shwìíy kilòŋ, e màʼ ŋgeʼ e mǒ kitu.

² Wù‑uù tsəə̀né ne mo, e dù sho fo mesənér, fo ráne yòʼ dzəə̀n.

³ E ké ru kí, wù‑uù dzə̀vtì ne mo, kù dzəvtì akàŋ akàŋ, kishiíy kifur.

⁴ Wù‑uù yiì, jav yem wùn ŋóv, wù bvə́ʼtí vighvə́r vém.

⁵ Nyùy Tàr‑iì ghìʼ ne mo, e sùm e ŋgeʼ si, e yiì, vinyo vi wáa tav, a ghaʼ mo.

⁶ Wù‑uù yiì, m wáa dzə fo mesənér, kù moo ŋkfə wo vé‑eè dzəə̀mèn ne.

⁷ Wù‑uù wày mo é kày ye bó yòʼ dzə̀ m lèʼ, e kfə̀n kùr mo áàsháŋé.

⁸ M tóŋ, e lòn ji wù sə́ á mo, wù tén fó yu bunrì yém.

⁹ Wù sə̀tí ne dzə́ə sém e kayi, a dzə̀ tíy ye seméné, e yiì, dzə́ə sém sí ndzə́y sidzə̀m.

¹⁰ Wù sí téʼ mo mo nyàm yee *bear tèʼ kifá, téʼ mo, mo bvərə̀ʼ tèʼ nyám.

¹¹ Wù tsə̀ʼ mo fó dzəə, e sàtì e vinsàr vinsàr, e màʼày fo, là ŋgaà wóo sham mo.

¹² Wù wày ne mvən e kinte, e sə̀ŋ, a lov mo shó.

¹³ Wù tè ne mo fó shiliv, e tè ŋkòʼ rə mvə̀n e dzə̀m.

¹⁴ M kfə̀n ne ji kifá ke nshéʼmé ki fo wír vérí adzə̀m. Áwune sí yov luŋ kishiíy kidzə̀m, táŋ a dzə̀ mo.

¹⁵ Wù yiì ne, m wáa yen ŋgeʼ ye tavín, a yì shíʼir moo lúylúy ye á noor wír sho.

¹⁶ Wù yiì ne, m bvə́ʼtí sóŋ yém é tiy, wù kfən nyèŋrì mo é kibvə̀r.

¹⁷ Wù yiì ne, dzəʼə̀m yémé buú nyaáŋ, m láysín mo vijuŋ vi yii dzə́.

¹⁸ M ku nèn a ghay wún wóm ji vijuŋ vém ví sà kfə̀n dzə̀ ka lèn a? Kinyo kidzə̀m ke mò‑oò yoy, tiir a dzə̀ e Nyùy Tǎr wùn kí shaà ne kisáŋ.

¹⁹ M lóo kuumé ŋgeʼ sém, à ján ye m ghán, jánée, kí wàa dzə fo mò mo wìr nò lúylúy.

²⁰ M lóo rəsí, lóo kuumé vinyo vìn bèn, shilív shém shí nèn kù a seèm seèmèn.

²¹ Yii bèy, m lo, m kù a ker kinyo ke m kuúme, kinyo ke m kù dzəə́ tiir vifií shó.

²² Koŋ ye Nyùy Tàr koŋ wír vəə́ yòʼ wíy mày, a wù kù wíy a sham áwune, e dù, e jòʼsì.

²³ Wù kù yii tíy wùn à wír vəə́ ghán sidzə̀m, a koŋ rəə́ yénsin e fíy kijàvndzə kidzə̀m.

²⁴ M nén a yòŋ kém lèn jii, «M wày ne kinyo kém kidzə̀m e Nyùy Tǎr kiwo, a m kù sí yoy, tiir a dzə̀ é wùn wó.»

²⁵ Nyùy Tàr kù yii shám wír ve á yéʼti a dzə̀ e wun wùn, sə́ wír ve á tiir wun fo mbìy e kinyò kidzə̀m.

²⁶ Kí bòŋ ji wìr wáa dzə ji nyaáŋ, a kìʼ a dzə̀ Nyùy Tàr, é wù sə́ wun.

²⁷ Kí bòŋ ji wìr toór kimbùŋ ké kfəmén, e kù a toór a wù dzəə́ kúy kuyín.

²⁸ Kí bòŋ ji Nyùy taásin wír, ŋgaàŋ kù kfə̀mén, a dzə kisə́sə.

²⁹ Wù ku kfə̀mén, e wày kitú e nsay, a shìy ji Nyùy Tàr sə́ á wun.

³⁰ Wù ku màʼtì búbúʼ rə, é wìr wo wù taʼ e dzə̀v, dzəv. Lá wù yòʼ a ci liy se á shur wun sho.

³¹ Nyùy Tàr yòʼ wíy bìn ndzə̀m e wír vəə́ ŋkuuŋkùŋ.

³² A wù fə̀m yii, aá sov kitú, bo wù kù yíi sham áwune, a dzə̀ bìʼ koŋ rə́ ye wiyí, ye yí yòʼ wíy mày.

³³ Wù yòʼ maʼ ŋgeʼ e wìr msòŋ kitu, koŋè. Wù yòʼ taʼ ji wìr wáa dzə e mvə̀m nyar.

³⁴ Á lo, lóo koʼrí e wírí kitu, ji bìʼ fo á siìn é wòŋ ji vé sháŋé,

³⁵ lóo bvəʼtí ghay wìr msòŋ, e Nyùy woo Taà Vitu si, là cí,

³⁶ lóo bìn nsaʼ mbvə́nkíwó, la wúné yòʼ a bòŋ Nyùy Tàr gheéy.

³⁷ A dzə̀ yòŋ la kinyo, kí kòóy, a bó kóŋ Nyùy Tàr ji kí koóy?

³⁸ Kí a dzə̀ kù yòŋ wun woo Taà Vitu, é bo vijuŋ, kìn ŋgeʼ wáa dzə.

³⁹ Wìr msòŋ lo, wù wàa kaykír ka féyì, a máʼ Nyùy ŋgeʼ e ŋgaàŋ kitu bìʼ ajay və́?

⁴⁰ Vèsən kaʼay, e kfə̀n tàr dzəʼə̀m yesən, a kfən, e yèn Nyùy Tàr.

⁴¹ Vèsən wáa mbaà Nyùy wo wù dzəə̀n é yuv shilív shidzə̀m, e màʼ wó e baà, a lon wun jii,

⁴² «Éè Nyùy Tàr, vèr jày ne, e kfə̀n tàv kitú vèsən, à nen tèn fó làysìn ajay vér.

⁴³ «Dòʼshwiiy wò kòʼ ne, e sùm wò, à shém e věr bàm, a laàr ver, là mendzən.

⁴⁴ À sùm ne kitú ké e mbàʼ, fo bunrì yérí wáa tosín, a meé fo à dzəə̀n.

⁴⁵ À yiì ne, ver kfə́n ji mfə̀vrì, e kfə̀n ji lóm si e vitúm ví mvəm.

⁴⁶ «Aŋgaà vér vibàné mvə̀ʼ ne shuu, e lèm e rə́, e tàtí, a te a dzə̀ lám e věr wùn.

⁴⁷ Rìʼí gbù ne e věr kitu, á tùŋ ne bií vibay, a teʼ ver shó. Á bvə̀ʼə́y ne ver, e laàr kifá kér kidzə̀m.»

⁴⁸ Mensíy mè dan fo mǒ si moo ndzə́v, a kù dzə̀ bìʼ wír vém ve á laàrìn.

⁴⁹ Sí yémé kù wíy a dìy, là meemè, é mensíy mè kú a dàn dànèn fó fo,

⁵⁰ e meé mo Nyùy Tàr wíy màʼ sí fo ntoò yùv, e yen.

⁵¹ M lèéy ŋgeʼ se sí nəən wónlě ŋgòn veé Jerusalem, shilív shém shí seém.

⁵² Wír ve á dzə wúu yém kisáŋe‑eè kòʼór ntàŋkìr, m lí shó moo shinə́n.

⁵³ Áwune‑eè maʼ mo é bii ji á laar dzəʼə̀m yém, e màʼ bèy, a tsənsí tíy fó bàm.

⁵⁴ Mendzə́v mè‑eè sùm mo é mvəm wó, m rə̀m ji kí m sà kpù ne bèn a.

⁵⁵ Éè Nyùy Tàr, mò‑oò tòŋ e wò, e kù a toŋ fo loònsay.

⁵⁶ Mò‑oò tòŋ ji lá à yòʼ sə̀tí a vituʼùr vé, à ku sə̀ á mo, à yú tóŋ yém.

⁵⁷ Mò‑oò tóŋ, mbaa wò, à méʼ mo, e yòŋ ji lá m yòʼ wàa fàn.

⁵⁸ Éè Nyùy Tàr, à nə̀ə́ ne e mǒ kinyò, e tìn dzəʼə̀m yém fo kpúu.

⁵⁹ Éè Nyùy Tàr, à yèn ne mo aŋgàa vibàné lovtin e mò. Ku bìn nsaʼ yem, e fò e mò.

⁶⁰ À kì ŋkfəə́mé wo aŋgàa vibàn vémé kér vèr áwune, aà kì menàŋ me á kár e mǒ bàm ji á laar mo.

⁶¹ Éè Nyùy Tàr, à yù ne mo á shur mo, aà kì dzə́ə sidzə̀m se áwune wóŋ wúu yém shó.

⁶² Áwune ghvəvrì, səmrì vinyo e mǒ bàm, kishiíy ké ndzə kidzə̀m.

⁶³ Leéy, e yèn, áwune sí yov luŋ, táŋ a dzə̀ mo, á keʼ fo kijàvndzə, á yòv, yì sə̀n.

⁶⁴ Éè Nyùy Tàr, ku laàmé áwune, laámé, a dzə̀ mo lim yéví dzəə̀n.

⁶⁵ Ku shòv áwune, é ŋgeʼ si sum áwune, aá wáa rə̀m ntéŋ.

⁶⁶ Éè Nyùy Tàr, dòʼshwiiy wò ku ŋàʼáy, áà jum áwune, e laàr fo wò nsay.