Yòvdìy 2 - ŊWÀʼ NYÙY

Nyùy Tàr kfə̀n ne ji ŋgaà vibàn Jerusalem

¹ Á ku yèn búʼú, mo Nyùy Tàr shwiiyin ne kilòŋ, e màʼ ŋgeʼ e Sion kitu, vitsə́ʼ ví súm ŋgònjuù rə. Wù bàʼ ne vikuʼùy vé Isray fo yuv, ví wáa neŋ a dzə̀ é nsay. Wù shwìíy ne kilòŋ, e màʼày ŋgày cù rə yeé Jerusalem.

² Nyùy Tàr laàr ne virə́ʼ vé dzə vee Jakov ram. Wù laàr ne vidzə̀m, là mendzən. Wù shwìíy ne kilòŋ, e kètì virə́ʼ veé Juda ve tavkín ví. Wù màʼ ne sáʼ yee fó wùn à vé saʼa, á gbú ben, a neŋ fo nsay, a woomé.

³ Wù shwìíy ne kilòŋ, e kìv kóy Isray wo tavíné. Wù rə̀ʼ ne wún fo áwuné wùn, e tèn fó sə, aàŋgàa vibàné sí ghíʼ áwune. Wù lòvtí ne e Isray moo ji á tòn a dzə̀ e və́yí, e lòvtí bèy, fóo sə́ʼsí e dzə̀m.

⁴ Wù lì ne mvən e kiwo ke yìy kí, a lov ver shó moo ŋgaà vibàn. Wù yùyrí ne wír vér adzə̀m, wír ve vèr yii yoy, tiir sho. Dòʼshwíiy və kòʼ ne moo və́y, e sə̀ʼsí ŋkàlaʼ Sion yee ŋgònjuù rə.

⁵ Nyùy Tàr kfə̀n ne ji ŋgaà vibàn, e laàr Isray láarin. Wù‑uù kèr láʼ sév se kuʼkìn sí, e bvə̀ʼə́y virə́ʼ vév ve tavkín ví vidzə̀m. Wù yiì ne, wír veé Judàa wáa rəsí, a toŋ, a dìy a dzə̀ kpú ghán sidzə̀m.

⁶ Nyùy Tàr kèr ne lav cù rə, kù mo á sàʼày táv kwaʼ bèy. Wù bvə̀ʼə́y ne kirə́ʼ ke á yii ŋkàʼ se á shéʼri wun sho. Wù yiì ne, wír veé Sione láysín vishiíy vé ŋkàʼ, e làysìn, à vishiíy vé bam vi shó. Kilòŋ kfə́ kí shwìíy ne, wù ŋwáy fon, e ŋwày taà cù.

⁷ Nyùy Tàr mèŋ ne kirə́ʼ ké kiy cù və́, e bìn ndzə̀m e kibàn kfə́ kee jeéy kí. Wù màʼtì ne, aŋgàa vibàné bvə́ʼə́y virə́v vé lav cù, ŋkèŋé kóʼ fo Nyùy Tǎr lav cù, kù moó ghan se á yí a dzə̀ ŋkàʼ fó.

⁸ Nyùy Tàr‑iì wày féyì ji wun ku bvə̀ʼə́y a kay yeé Sion, ŋkàlaʼ Sion yee ŋgònjuù rə. Wù‑uù fìʼ mo fóo dzəə̀n, e kù nèn bvə̀ʼə́y e dzə̀m. Wù‑uù kètì virùmèn wùn à kayi, fóo tátí e dzə̀m, e gbù e nsay.

⁹ Wù‑uù shètì kóŋ sé mfìn e vintsə̌m vintsə̀m, shuu se kày si keésí, a neŋ e mvə̀m kibvə̀r. Fòn wùn à vé saʼa sì é kwaʼ nsàm, a bó taà cù yòʼ kfə̀n dzə̀ wó a yeʼéy wíri nsər se Nyùy. Nyùy Tàr yòʼ dzəə́ ghém ndzə aàŋgàa ntum vəə́, á yòʼ dzəə́ yén vinyo e njà vinjeenjèm.

¹⁰ Kfə́m sé wìr seé Sion si sèsín ne fo nsay, áwune sèsín ne, a dzə kisə́sə kisə́sə. Áwune fə̀vrì ne kitú e kibvər ki, e màʼ vinsàʼ ve ndzə̀y é wùn. Ké wónlě ŋgòn veé Jerusalem, á jòór ne a dzə̀ vitú e nsay.

¹¹ M tòŋ ne bèn, síi kóʼkír fo mǒ kitu, a bàŋ. M sì a dzə̀ é mvə̀m nyar. Tímé kpù ne fo mǒ bvə̀m, a dzə̀ bìʼ aŋgàa vibàn ve á laàrìn ne wír vém veé Jerusalem. Wón ve á kàŋkìn ne wùn à ve terií sí toóŋe jíŋ, ghán ghanén é shuù se dzəə seé ŋkàlaʼ.

¹² Á tóŋ aàyìy véví koy, dzə́r kifá kée yi, kìn kée no. Áwune ghán, gbukìr e dzəə seé ŋkàlaʼ, gbukìr moo wír ve á lemkin lémkín. Á fér kiyoy a kí kù may màyìn aàyìy véví koy.

¹³ Éè ŋgònjuù yee Jerusalem, a dzə̀ m sùúy ji ka kùm wò? A dzə̀ m fìʼsìn wò a dzə̀ e ka kí? Éè ŋgònjuù yee Sion, a dzə̀ ji m lóʼtí wò, m fìʼsìn wò a dzə̀ e ka kí? Á yèr ne wò mo rìbà ndzə̀v yèr virə́ʼ, a dzə̀ kfə̀n lùŋèr la wò?

¹⁴ Vinyo ve aŋgàa ntum vée tiísi ji ghèm Nyùy ndzə, dzə̀ kimboʼtì, a dzə̀ kifá kisáŋ. Áwune yòʼ‑oò lo dìn vinyo vé ve bi ví, e fíʼ siìr wò e bàm fó kwaʼ vikwàn. Vinyo ve áwune tiísi e wò ji ntum Nyùy vi kù dzə̀ vé kisaŋ vi, aá kù bóʼti wò sho bóʼtín.

¹⁵ Wìr dzə̀m wo wù shaa e dzəə, sí jaʼ wò jáʼan. Á shaa, sheŋ kitú, shéʼ ŋgònjuù yee Jerusalem. Á shéʼ, yoŋ jii, «Ábaáy, á ŋkàlaʼ ye vé‑eè yoŋ ji yì bòŋ à? Á ŋkàlaʼ ye yì‑iì bòŋèn, e shaà ŋkà se laʼ sidzə̀m à? Á ŋkàlaʼ ye wìr dzə̀m woó kitu ke nsay shéʼri à?»

¹⁶ Aŋgaà vé vibàné mvə̀ʼ ne shuu, e lèm e rə́, e tàtí, a te lám e wò wùn. Áwune ŋèytí ne sóŋ, a sheʼ, a suúy jii, «Vèr laàr ne wun. Àjwè, kin ki dzə̀ kishiíy, a vèr‑iì shiyì, a kí wìy ne lèn, vèr yén.»

¹⁷ Nyùy Tàr yiì ne kinyo ke wù‑uù baʼtin ji wun wíy yiì. Wù yiì ne mo wù‑uù yiysin fó yàŋgùʼ, e laàr Jerusalem, là mendzən. Wù‑uù tàvír kóy aŋgaà vév vibàn, á tón fó. Wù yiì ne, aŋgàa vibàné wáa sàvnìn aáwuné kitu.

¹⁸ Melív me wíri mè sí tóŋ, mbaa Nyùy Tàr. Éè wìr veé Sion, vèn kú a dìy, à kay yeé ŋkàlaʼa shó, é mensíy mè wáa dàn, a səy moo ndzə́v, a dàn e shùy, a dàn vitsə́ʼə́. Lá á yòʼ a dor, síi kú a dìy ven díyin, là meemè.

¹⁹ Vèn wáa ŋaʼáy akàŋ akàŋ, a toŋ e Nyùy Tàr vitsə́ʼ vifur. Vèn suúy bvəm yéné e dzə̀m e Nyùy Tàr, a lon wun ji wù shám á wón vén. Wón vén ve á kpú jíŋ e shuù se dzəə seé ŋkà se laʼ.

²⁰ Jerusalem wáa yòŋ jii, «Éè Nyùy Tàr, ku lèéy, e yèn. Wò‑oo yií ne lòvtí e wìr wùmòʼ ben a? A dzə̀ kí kòóy ji vikìy lo, a kfər wón vév á, wón, a dzə̀ ve dzəən áwune, e lìy à? A dzə̀ á wàa yuyrí atàá cù, a yuyrí aŋgàa ntum Nyùy a? A dzə̀ á wàa yuyrí e lav cù bèn à?

²¹ «Dzə́n sé wàʼbìn wùn à sé ŋgày sé wìr si néŋnin e kibvə̀r, néŋnin e dzəə seé ŋkà se laʼ. Wónlě ŋgòn wùn à wónlě nsùm vémé kpùkír ne yé rər. Dòʼshwiíy wò‑oò ŋàʼáy é ghan fó, à teè áwune. Wò‑oò yùyrí áwune là mendzən.

²² «Nyùy Tàr, wò‑oò bì aŋgàa vibàn, á wìy, e taàmé mo mbìv sidzə̀m, kù mo á bì wíri ŋkàʼ. Dòʼshwiíy wò‑oò kòʼ, la wìr wóo leʼ, e bòy yòʼ a dzə. Aŋgàa vibàné‑eè yùyrí wón vém, wón, a mò‑oò liy, géʼsin sho.»