Titur 1 - ŊWÀʼ NYÙY

¹ Ŋwàʼ və̀ne sàŋ mo woo Por wo dzəə̀n ŋgaà lìm Nyùy, e kfə̀n a dzə ŋgaà ntum Jesus Kristu. A lim yémé dzə̀ ji m sə́ á wír ve Nyùy shoʼon ji və́, aá maysi, e wày shilív é wùn wó, e kìíy kinyo kfə́ ke ru kí, a ghan moo wír və́.

² Aá kfə́n a shìy dzəʼə̀m yee là may ye Nyùy‑iì kàʼàn áwune shó fo ŋgùʼ. Nyùy, wo bó wù yòʼ yii bóʼti kimboʼtì.

³ Ghán se wù‑uù sìysìn sí gheén lèn, wù nen yiì, á wáa fìʼtì kinyo kfə́, wíri wáa kiíy dzəʼə̀m yee shooy. A dzə̀ kíwun kee kinyo ke Nyùy wo wù luŋèr vèsən wayin e mǒ kiwo, e sùúy ji m wáa fìʼtì.

⁴ M nén a saŋ ŋwàʼ və̀n a dzə̀ fo wò woo Titur. À dzə̀ wán wom féyì bìʼ kinyo ke Nyùy ke wòsò biimen adzə̀m. A m lón jii, Tàr wòsən Nyùy wùn Jesus Kristu wo wù luŋèr vèsən kú a leéy fo wò, a yiì, é shilív shé shi wáa dzə nyaáŋ.

Taà kintatì kér fó a dzə wír woo là nsem

⁵ Mò‑oò lo màʼtì wò e wòŋ woo Kiret ji à siysi á vinyo ve ví dzəə́ bér e vintatì vee fó. A kí‑iì dzə̀ ji à wáa lèm a atǎr kintatì ntèʼ sidzə̀m. Lóo lèm, à wàa jùmrì a dzə̀ vinyo ve mò‑oò suuyin e wò jii,

⁶ taà kintatì kér fó a dzə a wír woo là nsem, a ker wiíy e mòʼón cáʼ, é wón vəə́ wáa dzə ve á jumrì sa kinyo ke Nyùy, é la á yòʼ a ker liì kisaŋ, e kfə̀n a tav kitú.

⁷ Mo lèmèn Nyùy ŋgaàŋ ji kilìmbìy ke wìr və́, kí yoʼ ghèén ji wù wáa ker nsem e dzəə yìmòʼ. Kìn dzə̀ ji wù wáa koʼnín, e kfə̀n a nyarnín, a no meluʼ e ŋàŋ, a tàʼ melaà, a dìy a dzə̀ shuu və́.

⁸ Kù kér fó a dzə wír wo wù koŋ vé kiŋgàné, a kòŋ kinyo a dzə̀ ke juŋ ki. A ŋgaàŋ kù kér fó a lò, a səʼə́m, a yiì vinyo vidzə̀m là kiloʼ, a yu a dzə̀ fo Nyùy, a kiíy mo wù tiir kiwuú kfə́.

⁹ Kù kér fó kfə̀n a dzə wír wo wù gharin kinyo ke ru kí ke á yeʼeyin wun sho kitávín, e fíʼ a mèrìr wír ámóʼó sá e dùŋrì ye ruú, a dìn jay wìr ve á kinèn kinyo kee shoon.

Á wáa shèm yéʼéy kisaŋe

¹⁰ A dzə̀ kù a dzə wír woo bey, bìʼ fo wíri dzəə̀n anín ve á ŋwáy kinyo ke ru kí ŋwáyín, ghán, fiʼtì a dzə̀ vinyo ve kisaŋ vi, bóʼti wíri shó. Bo taaka wír ve á tíy kév é liì woó Juda ji á kú a saŋ *mbèʼ se wìr, é bo ŋgaàŋ wáa dzə rú ji wir Nyùy.

¹¹ Á kér fó a sə̀r wír vee bey, bìʼ fo áwune bvəər vifií vé wíri. Lóo dzə láʼ yímóʼó, la à yòʼ dzəə yèn wír wo wù kiìn fo wù tíyí. Aá yéʼey vinyo ve bó yòʼ dzə̀ á wàa yeʼéy, bìʼ fo á kù kér shií a dzə̀ é mbàm.

¹² Wír veé Kiret vìne yii réŋréŋ mo ŋgaà səm vifòn wov wùmòʼ‑oò suuyin jii, «Wír veé Kireti kù yii dzə́ kév ji aŋgàa kimboʼtì, dzə́ ji viŋgà vé nyàm se kwaʼ, kfə̀n dzə́ ji aŋgàa ŋgòy vee ayíbuùkpú.»

¹³ Wù‑uù suuy bèy, a dzə̀ rú. Ku nèn a kàntì vintatì vi kitávín, aá fíʼ a yu a dzə̀ kinyo ke Nyùy,

¹⁴ e làa yòʼ a yuurí vinjeenjèm ve vinyò ve ví lo fo wír veé Judàa, kìn fó a jùmrì vinyo ve wìr ve á ŋwáy kinyo ke dzəə̀n ke ru kí ŋwáyín.

¹⁵ Kú a kàntì, bìʼ fo wìr yii lóo ker shilív she juŋ shi fo Nyùy, wù nèn a yen vinyo vidzə̀m vijuŋ. Yii bèy, wù lóo ker shilív she bi shí, e làa yòʼ a yu fo Nyùy, bo bó yòʼ dzə̀ wù yèn kinyo ke juŋ ki, bìʼ fo vifií və́ wùn à shilív sə́ shí sí tíy a dzə̀ é vinyò ve bi ví.

¹⁶ Wír vee béyi suuy feyì ji áwune kì á Nyùy, a vinyo ve áwune yii vi din ji bó á yòʼ kì. Áwune táv a dzə̀ kitú fo Nyùy, liì wov kóʼóy é ŋàŋ, a bó yòʼ dzə̀ á yiì kinyo kee réŋ gheéy.