Sekariya 9 - ŊWÀʼ NYÙY

Nyùy Tàr yíysi ŋgeʼ aŋgàa vibǎn Isray

¹ Rə̀n dzə̀ ntum yeé shií, a dzə̀ ntum Nyùy Tàr. Yì kìʼ woŋ woo Hadrak, e rə̀ʼə́y ŋkàlaʼ yee Damaskus. Wìr msòŋ e dzə̀m kù sí kiʼ a dzə̀ Nyùy Tàr, réŋréŋ mo rám seé Isray sidzə̀m si kiʼ wun.

² Ntum rə̀n rə́ʼəy sa kitúm kee Hamat, a kí jáv bìíy wùn à Hadrak, à Damaskus. Yì kfə̀n kiʼ wír veé Taya wùn à Sidon, fə̀m mo á kiìn vinyo e ŋàŋ.

³ Wír veé Tayàa bàʼrì ne kirə́ʼ kév, kí wáa dzə kikum, e bàʼtí *kisha ke mbàm ke fəvír kí, kí wáa dzə moo kibvər, e kfə̀n bàʼtí ké mbàm ke baar kí, kí wáa neŋ moo kishaʼàr keé dzəə.

⁴ Yii bèy, a Nyùy Tàr wíy faàsì kifá kidzə̀m ke áwune kérí, e rə̀ŋ bùʼ wov é rìbà ndzə̀v. Rəŋ bèy, é wù tsə́nsí və́y, é wú laar ŋkàlaʼ yev.

⁵ Wír veé Ashkelone wíy yen kinyo kìn, é fáne nəə́ áwune, é veé Gasàa wáa buʼ e mvə̀m nyar. Wír veé Ekrone wíy a buʼ sa, bìʼ fo bó á yòʼ dzəə́ kér fó a yòy, a tiír. Vifon vi wíy mày fo Gasa, é ŋkàlaʼ yee Askelon du é vifə̀m,

⁶ é vintaàkfəə vi yov ŋkàlaʼ yee Ashdod. Nyùy Tàr suuy jii, «M wíy màyìr vikum ve laʼ ve wír veé Filistiàa yoy, tiir sho vìn.

⁷ M wíy kàr nyam mensə fo áwuné shuù, e tsəy ye kifàn fo áwuné sòŋ. Wíri bér e Filistia, aá wáa ghvəm mo, e kfən ji rám yímóʼó é Juda, é wír veé Ekrone nəə́ e wír Nyùyí mvəm, a dzə moo veé Jebus.

⁸ M wíy a kìŋsìn woŋ wóm, é la aŋgàa vibàné yòʼ kfə̀n a ghiʼ fó e rə́r sí. Bó wìr yòʼ dzəə́ wìy a nə̀ʼsì wír vém, bìʼ fo mómò, m wíy a shìy áwune.»

Fon wo wù wíy a wìy

⁹ Éè wìr veé Sion, vèn wáa sheʼrí e mbòómbòŋ. Éè wìr veé Jerusalem, vèn wáa ndzəʼ. Vèn yén mo fòn won wiyì, wiy e sáʼ yee tìítiyi, séŋ nsiì, e kù yòʼ lì kitú kfə́ shishàr, e kòʼ a dzə̀ kimbèʼbìy, kimbèʼbìy, a dzə̀ kee wán.

¹⁰ Nyùy Tàr suuy jii, «M wíy tsə̀ʼ *viténtén vé rər fó Isray, e tsə̀ʼ sa nyám se ŋkoʼ fo Jerusalem. Tsəʼə̀, é m béʼtí vinte vév vé rər. Fòn wov wíy neèr sáʼ nyaáŋé e vitúm ví mvəm. Sáʼ rəə́ wíy kèʼ fo rìbà ndzə̀v wùmòʼ, e dù, e bàʼ e wùmòʼ, e kèʼ fo ndzəv yee Yufret, e dù, e bàʼ e ndzəywoŋ.»

Nyùy Tàr wíy siìr wír və́ é bàm

¹¹ Nyùy Tàr suuy jii, «Fo kén kí, ven ve m gwàrìn ne *mensaŋ vèsən, mensaŋ me á fìnèrìn e mensə́ mè, m wíy bòyìr wír vén fó sháŋ, aá boy fó bií kpu.

¹² Ven ve á lim sháŋ, kiʼ dzə́ə, vèn kfə́n é bàm e věn vikùm ve laʼ. M fó kaʼ lán jii, m yíi səə̀vì ven, e dzə̀sì.

¹³ M fèr ne Juda ji kinte kém, e lì Efrayim ji mvən si. Éè Sion, à dzə̀ nyùy yem rə̀r. M wíy bayír wón vé, aá ghíʼ wír veé Grik e rə́r sí.»

¹⁴ Nyùy Tàr wíy a tiy e wír vəə́ kitu, a màʼ rə́r sév, a tsənsí mvən sə́ moo ji bavkìr kishèv. Nyùy Tàr woo Taà Ndzə wíy toŋ sóŋ rə́, e mee fo mbìv yee tsə́n é njà kìrkir.

¹⁵ Nyùy Tàr woo Taà Mànjòŋ wíy a kìŋsìn áwune, aá wáa nyèŋrì aŋgàa vibàn vév ve á rəŋ kiŋkoʼ. Á kù wíy a nyèŋrì, a kò mo wìr nò meluʼ, e kùr, e kùr ben mo mè rùn é kighin, a jiíy mo mensə́ mè jìíy fo kor se kiy cù.

¹⁶ Wíy lòo dzə e kishiíy fóo fèy, é Nyùy Tàr woo Nyùy wov sə́ áwune, bìʼ fo dzəə̀n wír və́ moo njiì wo wìr danèrì. Áwune wíy a njàʼkìr e Nyùy Tǎr wòŋ, moo *síbaŋ yeé ntáráʼ.

¹⁷ Ábáy, kfə́ə vijùŋ vee ben vi wíy a dzə veé le? Wónlě nsùme wíy a bòʼrì bòʼrìn, a dzə̀ viyíkìr, é meluʼ me ŋkèrvin mè yii, é wónlě ŋgòne wáa fòʼ fòʼòn.