Sekariya 8 - ŊWÀʼ NYÙY

Nyùy Tàr káʼ ji wun wíy siìr Jerusalem fo

¹ Nyùy Tàr woo Taà Mànjòŋ kfən lò, e sùŋnín e mò, e sùúy jii,

² «Ke suuy mo woo Nyùy Tàr woo Taà Mànjòŋ ki dzə̀ jii, m kér shii ŋkàlaʼ Sion e ŋàŋ, kíyri áwune féyì, fo kinyo ki kum.

³ A ke suuy mo woo Nyùy Tàr kí dzə̀ jii, m wíy kfən e Gwan Sion, a dzə e Jerusalem, aá wáa yòŋ Jerusalem ji ‹Ŋkàlaʼ wìr ve á tíy e Nyùy wùn›, a yòŋ gwan Nyùy Tàr woo Taà Mànjòŋ ji ‹Gwan wo Ranén›.

⁴ Á yú ke mo woo Nyùy Tàr woo Taà Mànjòŋ suuyì. Kí dzə̀ jii, ŋgày sé wìr si kfə̀n wíy a dzətín e shuù se dzəə seé Jerusalem, à vikìy, à vilum, a dzətín feyì e mbàŋ sí wo wo, aá dzə́nkír ne, e kòŋrí.

⁵ Wóné wíy a ŋèʼ ŋèʼèn é dzəə seé Jerusalem, a tuŋ visəə́rí, à vee vikìyí, à vee vilume.

⁶ A ke suuy mo woo Nyùy Tàr kí dzə̀ jii, a kí fə̀m lò, a ghaʼ ven lèn, ven vee kibér ke wìr vén, bo a dzə̀ kí wàa ghaʼ a dzə̀ mo á? Suuy mo woo Nyùy Tàr woo Taà Mànjòŋ.

⁷ Ke kù suuy mo woo Nyùy Tàr woo Taà Mànjòŋ ki dzə̀ jii, vèn yú, m wíy fəə́r wír vém fó vitum veé mbìv yee fo shùy yii tó, e fəə́r sa fo vitum veé mbìv yee fo shùy yii nəə.

⁸ M fəərì, é m siir é Jerusalem, aá wáa dzə fo, a dzə wír vém, é m wáa dzə Nyùy wov, a leéy áwune e suuyrú, a leéy e dzəə yee tìítiy.»

⁹ Ke suuy Nyùy Tàr woo Taà Mànjòŋ ki dzə̀ jii, «Vèn ku wày ŋàŋ, e làa yòʼ weèy. Réŋréŋ mo vèn‑eè sí yú, aàŋgàa ntum Nyùyi suuyì, e kèʼ fo kishiíy ke vé‑eè wayin kinsə̀ŋ ke lav cù Nyùy Tàr woo Taà Mànjòŋ ji á fiʼ wìy bàʼrì, e siìr fo.

¹⁰ Vèn kuúmé mo vèn‑eè dzə́, é bo á keʼ lim rə̀n. Bó wìr yòʼ‑oò yú fó làʼ wír, kìn nyam lìm. À ŋgaà fəə, à ŋgaà nə̀ə́, bó yòʼ‑oò dzə̀ wìr ghàn là kindzə́m, bìʼ fo mò‑oò yiìn, wíri wáa sèʼnìn áwune áwune.

¹¹ Yii bèy, kèʼ fo lèn, m yòʼ dzəə́ wìy a nyàvrì e vèn vee kibér ke wìr vén mo mò‑oò nyavrì e vèn fó ŋgùʼ. Suuy mo woo Nyùy Tàr woo Taà Mànjòŋ.

¹² Vèn wíy a way vifá e nsay là kindzə́m. Súm sén sé vitiír vé *vayin si wíy a koóm kijuŋ. Viyíkìr vi wíy a kuy e věn nsay, é wuú wáa səy fo yuv. M wíy yiì, é vèn yov vifá vìn vidzə̀m, ven vee kibér ke wìr vén.

¹³ Yì‑iì dzə̀ fó mbìy, a ven vee wír veé Juda wùn à veé Israyi dzə̀ ashaàsheʼ fo vitúm vi, aá li yír yén ji liy. Vèn yuúrí kijuŋ, e kèʼ fo lèn, m wíy a sə ven fó ŋgeʼ sidzə̀m, e yiì, é vèn wáa dzə kisəəvì fo wíri. Lá vèn yòʼ a fàn, vèn ku wày a dzə̀ ŋàŋ, a tuŋ líme.»

¹⁴ Ke kí dzəə̀n kí dzə̀ ji Nyùy Tàr woo Taà Mànjòŋ suuy a jii, «Atàr véné‑eè tìnsín mo, m wáy ŋàŋ ji m kù maʼ a ŋgeʼ aáwuné kitu. Suuy mo woo Nyùy Tàr woo Taà Mànjòŋ.

¹⁵ E ghan sin, kù dzə̀ mo m wayin ne ŋàŋ ji m wíy a səə̀vì a wír veé Jerusalem, a səə̀vì veé Juda. Á bèy, lá vèn yòʼ a fàn.

¹⁶ Vèn ku wìy a yiì a dzə̀ vinyo vee jii, wìr kú a suúy a dzə̀ suuyrú e fər və, aá wáa tinén kinyo ke wìr e shùu kày ŋkàlaʼ a dzə̀ é nsànloŋ, e dzəə ye dzə̀ wíri wàa dzə kijuŋ.

¹⁷ Lá wìr yòʼ a taŋ kinyo ke bi kí e wun shiliv kùm fə́r və. Lá wìr yòʼ tiím vinjen ve kisaŋ vi e fər və́ bàm, bìʼ fo m ban vinyo vìn vidzə̀m. Suuy mo woo Nyùy Tàr.»

¹⁸ Nyùy Tàr woo Taà Mànjòŋ lò, e tùm mo ji m tiísí e wíri á ji

¹⁹ ke suuy Nyùy Tàr woo Taà Mànjòŋ ki dzə̀ á jii, «Ven vee wír veé Juda, jíŋ ye vèn‑eè lem e ŋwee woo kweè, kfə̀n lem e tàn ŋwee, lem sa e saàmbà ŋwee, e bóo lì yeé ŋwee woo ghvə̀m, wíy a dzə lèn ŋkàʼ sé kisheʼrì wùn à sé vijùŋ si fo vèn. Kí nén a dzə jii, vèn kú a tiy e suuyrú, a tiy a dzə̀ é nyaáŋ.»

²⁰ Ke Nyùy Tàr woo Taà Mànjòŋ suuy ki dzə̀ jii, «Ghán sí wíy gheén, é vitúm vi wáa wìykìr e ŋkàlaʼ Jerusalem, é wíri wáa wìykìr fo ŋkà se laʼ símóʼ sí sinín.

²¹ Wíri wíy lò fo ŋkàlaʼ yìmòʼ, e dù, e bi yìmòʼ jii, ‹Vèsən wáa dù, a sùyrì Nyùy Tàr woo Taà Mànjòŋ e Jerusalem, a lon kisəəvì. Vèn shaa, aá lo, vèr sì é dzəə.›

²² Nyanyày wìr wùn à vitúm ve tavkín ví wíy a wìy e Jerusalem, a sùyrì Nyùy Tàr woo Taà Mànjòŋ fo, a buʼ wó ji wù səəvi á áwune.

²³ A ke suuy mo woo Nyùy Tàr woo Taà Mànjòŋ ki dzə̀ jii, wíy lòo dzə e ghan fóo fèy, é wíri wáa fəə fo vitum, a fə̀m dzə̀ ve ví súŋnin lám vəneé. Wíri lo e ghvə̀m, aá ghár ndzə̀y sé wìr woó Juda, a suúy ji vèsən kú a dù, vèr yú ji Nyùy dzə̀ á vèn áwune.»