Sekariya 7 - ŊWÀʼ NYÙY

Kinyo ke jiŋ ye lemèn

¹ Yì‑iì dzə̀, a Fòn Darius sáʼ ne ji fon viyá vikweè, Nyùy Tàr lò, e sùŋnín e mò woo Sekariya. Wù‑uù sùŋnín é kishiíy kee kweè fo ŋwee woo bvə̀ʼə̀, wo á yoŋ ji Kislev.

² Wáa dzə e ghan fen, a wír veé Beteli túm ne Shareser wùn Regem‑Melek, à wír véví ji á mbaa á Nyùy Tàr.

³ Á wìy, e yèn aŋgàa ntum Nyùy wùn aàtàá cù ve á lim e Nyùy Tàr woo Taà Mànjòŋ lavi, e màʼ kinyo kév jii, á sa kfə̀n a lèm jíŋ e ŋwee wo wú meen ji tàn, a dzə e nsòv mo vé‑eè rə́si yii a?

⁴ Nyùy Tàr woo Taà Mànjòŋ nèn tiìsí ntum rə e mò jii,

⁵ «Gháy ó e woŋe, e ghày áàtàá cùu jii, ‹Vèn‑eè lem jíŋ e ŋwee woo tàn, lem e saàmbà ŋwee, e mvə̀m kiya kee msaàmbà bèy, dzə́r e mò á?

⁶ Fə̀m dzə̀ ŋkàʼ sén, bó vèn yòʼ yí, nóninè, aá diy a dzə̀ vitú vén a?› »

⁷ Kù dzə̀ kíwun ke Nyùy Tàr‑iì suuy, e shaà fo aŋgàa ntum vəə́, e ghan se Jerusalem kù‑uù dzəə́ tsəətìn tsəə̀tìn e vifá vi, a wíri dzə̀ é ŋkàlaʼ nyanyày, aámóʼó dzə́ e ntèʼ see fó ghaŋ, aámóʼó dzə́ e mbìv yee tsə́n, ámóʼó é sar se agwan.

Wíri‑iì tàv kitú, Nyùy fəə́r áwune é nsàm

⁸ Nyùy Tàr nèn kfə̀n lò, e tùm mo ji m du, e tiìsí e wíri á jii,

⁹ Nyùy Tàr woo Taà Mànjòŋ suuy a jii, «Vèn wáa tinén kinyo kidzə̀m là kiloʼ, a kòŋ wir dzə̀m, é wìr wáa sham fə́r və.

¹⁰ Feyì feyì, lá wìr yòʼ a nə̀ʼsì wiiy ŋkfə, kìn wan tsə̀, kìn kiŋgwìy, kìn ghéʼncey. Lá wìr yòʼ a taŋ kinyo ke bi kí kùm fə́r və.»

¹¹ M wáa tiisí bèy, a wíri kù‑uù sí yú, táv a dzə̀ kitú, səm vituʼùr, tén yú.

¹² Vé‑eè yiì, melív mev mè lùr, e kfə̀n ji tíy, e laà yòʼ yú ntir se Nyùy Tàr woo Taà Mànjòŋ‑eè tumen Kiyoy kfə́, kí yiì, aŋgàa ntum və́ vee fó ŋgùʼú wáa fìʼtì. Bìʼ bey, dòʼshwiiy Nyùy Tàr woo Taà Mànjòŋ‑eè baàrí é ŋàŋ.

¹³ Wù‑uù sùúy jii, «Mò‑oò sùŋnín, áwune tén yú, áwune lòo toŋ, m tén gháy.

¹⁴ Á bèy, m nen bvə̀ə́r áwune e kìrkir, á bvəə́rí, e dùkìr e vitum ve á yòʼ‑oò lo wìy sìíy, e kìíy. Á dù bèy, woŋ wóv wo juŋe dù e vifə̀m, la wìr yòʼ dzə́ə a kùm fo.»