Sekariya 6 - ŊWÀʼ NYÙY

Ŋgaà ntum Nyùy yén viténtén vikweè, a səŋ nyám se ŋkoʼ

¹ M sii kfə̀n lòo nàn sí, e yèn *viténtén vé rər vikweè, a səŋ nyám se ŋkoʼ, wiy sho fo nsàn agwan abaà, aàgwan vìne kù dzə̀ féyì ji kisha kee *brons.

² Yì‑iì səŋ nyám se ŋkoʼ se baar sí kiténtén ké mbìy ki, a səŋ se sənér sí kee baà.

³ Kiténtén ke kí‑iì meen ji taár, a səŋ se fəvír sí. Kee kweè, wáa sə̀ŋ se sí‑iì shomkìr, fəə́si. Nyám sìn sidzə̀m si‑iì dzə̀ vintav ve nyàm.

⁴ M nèn dzə̀r e nshìylav Nyùy rə̀y jii, «Tàr wor, nsàv vitèntén vé rər vin dzə̀ ka?»

⁵ Yì bìnèr e mò jii, «Viténtén vin vi din a dzə̀ shwér wo wú lo fo Nyùy, wun wo wù kér kitú ke nsay. Wú du e buu se ndzə see sikweè.

⁶ Wú kù lò fo Nyùy si lèn bèn, a kiténtén ke nyám se ŋkoʼ se sənér sí səŋè ki du e Babilon, e mbìv yee kuy, a ke nyám se ŋkoʼ se fəvír sí səŋè ki du e mbìv yee fo shùy yii nəə. Ké nyàm se ŋkoʼ se sí shomkìr, fəə́si ki du kfə́ é mbìv yee tsə́n.»

⁷ Vintav ve nyàm se ŋkoʼ vìy vi‑iì fəə̀, a gìr ji ví ghánén, e kìy kitú ke nsay. Nshìylav Nyùy nèn sùúy ji á du á rì. Sí ku nèn dù, a ghanén kitú ke nsay kidzə̀m.

⁸ Nshìylav Nyùy rə̀y nèn yòŋ mo kitávín jii, «Leéy ri, nyám se ŋkoʼ se sí kì du e Babilon, e mbìv yee kuy si yiì ne, dòʼshwiiy Nyùy Tàr rə́sín lèn.»

Nyùy Tàr shóʼ kilìmbìy ke wíri

⁹ Nyùy Tàr lò, e sùŋnín e mò, e sùúy jii,

¹⁰ «Dù e Josia woo wan Tsəfaniya lav, e yèn Helday wùn à Tobija, à Jedayia, e sə̀ kifá ki fo áwune. Kù dzə̀ wír, aá dzə́ e Babilon, e kwaʼ nsàm, áwune kù wiy wìyìn lèn lèn.

¹¹ Ku dù cércér, e sə̀ *kisha ke mbàm ke fəvír kí wùn à ke baar kí fo áwune. À sə́, à fèr ntáráʼ shó, e sòv e Joshua woo taà cù wo kuʼǔn kitu, wun woo wan Jehosadak.

¹² Suúy e Joshua ji Nyùy Tàr woo Taà Mànjòŋ suuy a jii, ‹Wìr wo yír rəə́ dzəə̀n ji Tám, və̀ne. Wù kù wíy ŋeʼém fo wù dzəə̀n, e bàʼrì lav cù Nyùy Tàr.

¹³ Kù dzə̀ wun wo wù wíy bàʼrì lav cù Nyùy Tàr. Wù wíy a dzə fon, a dzə e wun kàvàʼ, a saʼ vifon və́. Taà cù wíy a dzə e və́ə woo kàvàʼ e wun ghaŋ, é wùn wun wáa lìm kintatì.

¹⁴ Á kù wíy a lèm ntáráʼ və̀n e mǒ lav cù, wíri lóo yen, aá wáa kuumé Helday wùn à Tobija, à Jedayia, e kfə̀n a kuumé Josia woo wan Tsəfaniya.› »

¹⁵ Ké kibàʼrì kee Nyùy Tǎr lav ki dzə̀ kfə́ jii, wír veé Juda ve á dzə̀kìn kwaʼdáa wíy a wìy, a tom. Yì kóʼó, é vèn nèn kìíy ji tùm rú á Nyùy Tàr woo Taà Mànjòŋ mo fo věn wùn. Yì kù wíy koʼ, a vèn fey bònén, a yu sáʼ Nyùy Tàr woo Nyùy won, a yiì mo yí dzəə̀n.