Sekariya 5 - ŊWÀʼ NYÙY

Ŋgaà ntum Nyùy yén kiŋkur ke ŋwàʼ, a kí féŋé

¹ M kfən lòo nàn sí, e yèn kiŋkur ke ŋwàʼ, a kí féŋ e yuv.

² Nshìylav Nyùy rə̀y dzə́r e mò jii, «À yèn a dzə̀ ka?» M nèn bìnèr jii, «M yèn kiŋkur ke ŋwàʼ, a kí féŋé. Vida və́ ví dzə̀ kóy e tàn, a mbvə̀ʼ rə dzə̀ kóy e baà e kintoʼnìn ki.»

³ Wù suúy e mò jii, «Ŋwàʼ və̀ne ghán ndzə e dzə̀m, a wú kér lòn. Á sàŋ lǒn ashòŋ é mbìv yìmòʼ, e sàŋ lǒn wìr ve á bóʼti kimboʼtì, kan yír Nyùy kisáŋ, e yìmòʼ yee mbìv. Lòné koó wír, á fə̀ə́r ŋwèrín fo wírí mvəm.

⁴ Nyùy Tàr woo Taà Mànjòŋ yoŋ jii, ‹M wíy tsənsí lòn é wòŋ, é wú nəə́ áàshóŋé melav, e nə̀ə́ sa e wír ve á bóʼti kimboʼtì, kan yír yém kisáŋé lav. Wú nəə bèy, é wú goʼ fó, e laàr kifá kidzə̀m, à vicí vé lav vi, à tíyí shó.› »

Ŋgaà ntum Nyùy yén wiíy e mvə̀m ŋkaà

⁵ Nshìylav Nyùy rə̀y kóʼtí e mǒ ghaŋ, e kfə̀n siì sùúy jii, «Nàn síi, e yèn kifá ke kí wiy ki.»

⁶ M dzə́r e wun jii, «Wiy ka kin?» Wù bìnèr jii, «Dzə̀ ŋkaà mfìʼ, a yì din mo ajayi runen é wòŋ, e dù mèé.»

⁷ M lòo leéy, e yèn, aá mvə́ʼ nsər ŋkaà, aá fér e kisha kee *led ki, e yèn wiíy, a wù dzə́ e mvə̀m ŋkaà fèy.

⁸ Nshìylav Nyùy rə̀y nèn yòŋ jii, «Wiíy və̀n dzə̀ ji liì kisaŋ wìr msòŋ.» Wù nèn dòm wiíy və̀y e ŋkaà, e bàʼ nsər, a yì dzə̀ ji tíy, e sə̀tí ŋkaà sho.

⁹ Á bèy, m lòo nàn sí, e yèn vikìy abaà, aá féŋ, wiyì, kér vav si moo sé shinə̀n shee kilìmbìy. Áwune sə́y, e boò ŋkaà rə̀y, e kòʼ shó e yuv.

¹⁰ M dzə́r e nshìylav Nyùy rə̀y jii, «Áwune du e ŋkaà rə̀y fèé?»

¹¹ Yì bìnèr e mò jii, «Áwune du sho e wòŋ woo Babilon, e bàʼrì lav rə fó. Á baʼrì, aá nèn lì ŋkaà yee shooy, e tìír fo, e kirə̀ʼ ké cù ke vé‑eè naŋsin ji kfə́.»