Sekariya 4 - ŊWÀʼ NYÙY

Ŋgaà ntum Nyùy yén kitiir ke làm

¹ Nshìylav Nyùy ye yì lo, súŋnin e mò, kfən wìy, e yìm mo, mo wìr yìm wír fo mbuùné.

² Yì dzə́r e mò jii, «À yèn a dzə̀ ka?» M bìnèr jii, «M yèn kitiir ke làm, aá fér e *kisha ke mbàm ke baar kí, a mbìʼí dzə̀ fó yuv, a dzə̀ wó meŋgvə̀r me làm. Lame dzə̀ saàmbà e kitiìr, a wo mòʼón mòʼóne kér shuu se kfəə̀ saàmbà,

³ a vicí vé *oliv vi tíy e ghaŋ wo vibaà, a kee kimòʼón ki tíy e mbìv koy yìyí, kee kimòʼón e mbìv koy ŋkoòvìi, mbǐʼ meŋgvə̀rí wáa dzə fo ntìntìn.»

⁴ Á bèy, m dzə́r e nshìylav Nyùy ye yì kì súŋnin e mò jii, «Ŋgàywìr, vicí vin vi dzə̀ vé gha?»

⁵ Yì bìnèr e mò jii, «Bó à yòʼ kì nsàv vifa vìn à?» M bìnèr sho jii, «Ŋgàywìr, bó m yòʼ kì.»

⁶ Yì suúy e mò jii, «Vifá vìn vi din a dzə̀ ntum ye Nyùy Tàr‑iì tiisin e Serubbabel, a yì dzə̀ jii, ‹Lá à yòʼ a yòy, a tiír vifií a dzə̀ e wò vitaaví, kìn e wò ŋàŋ. Á yòy, a tiír vifií ví a dzə̀ e mǒ Kiyòy. Suuy Nyùy Tàr woo Taà Mànjòŋ.

⁷ Vinyo ve ví sə́ti wò moo gwan vi yíi mày. À yíi bàʼrì lav cù Nyùy Tàr, e siìr fo. À lóo neèr tíy kinjòʼsìí, é wíri wáa ndzəʼ kikum ke lav kìn, a yòŋ jii, Nyùy ku səə̀vì. Nyùy ku səə̀vì.› »

⁸ Nyùy Tàr ku siì a suŋnín e mò, a suúy jii,

⁹ «Serubbabel wày ne kinsə̀ŋ ke lav yem cù, a wù kù yíi màysì lav yem cù yee shooy, e bàʼrì. Kí kooy bèy, é wìr dzə̀m nèn kìíy ji tùm á mo wò fo áwuné wùn, mo woo Nyùy Tàr woo Taà Mànjòŋ.

¹⁰ A dzə̀ wír, a wù‑uù káy kéʼ kinyò, a yí yénsin fo tèr, bo wù wíy yen, a Serubbabel bóm lav cù, du fo mbìy, é wù wáa sheʼrí. Ké làm see saàmbà sìy, kù dzə̀ sí Nyùy Tàr ye yí kíyri kitú ke nsay, yén kinyo kidzə̀m.»

¹¹ M nèn a ghay e nshìylav rə̀y jii, «Vicí vé oliv vee vibaà ve ví tíy e ghaa kitiìr ke làm, kímóʼ kí é koy yìyí, kímóʼ kí é koy ŋkoòvìi, nsàv sà dzə̀ ka á?»

¹² M kfən siì dzə̀r shó jii, «Nsàv tam se vici vé oliv see sibaà dzə̀ ka? Tám se meŋgvə́r mè shém fo fo, kiʼ ji rèéŋ, shaa e mvə̀m tòmtóm sibaà, aá fér e *kisha ke mbàm ke baar kí.»

¹³ Yì bìnèr jii, «Bó à yòʼ kì nsàv à?» M nèn bìnèr sho jii, «Nyaa mǒ tàr wor, bó m yòʼ kì.»

¹⁴ Yì nèn sùúy e mò jii, «Vifá vìn vi din a dzə̀ wír vee abaà ve Nyùy Tàr shoʼon ne, e yòʼ ji á wáa lìm fo wun e kitu ke nsay.»