Sekariya 2 - ŊWÀʼ NYÙY

Ŋgaà ntum Nyùy yén wír, a wù kér kfəə̀ mfìʼ

¹ M kfən lòo nàn sí, e ké ru kí, e yèn wír, a wù kér kfəə̀ mfìʼ e wun kiwo.

² M dzə́r shó jii, «À du a dzə̀ feé?» Wù bìnèr e mò jii, «M du, e fìʼ Jerusalem, e yen mo vida və́ wùn à vikuʼùy və́ ví dzəə̀n.»

³ M ku nèn yèn nshìylav Nyùy ye yì kì súŋnin e mò, a yì ló, a dù, a yìmòʼ wiy ji wùn wun tárnín.

⁴ Wù suúy shó jii, «Nyéŋ, e dù sùúy e wánlè nsùm wo wù kér kfəə̀ mfìʼ e kiwo və̀sə ji wù yuúrí á ŋkuŋ. Jerusalem wíy kùʼ, a ker wíri wùn à nyám si nyanyày, e shaà mo dzə̀ á wàa dzə e mvə̀m kày.

⁵ Nyùy Tàr kàʼ ne ji wúnwun kitú kfə́ wíy a dzə a kay yév, e kaarí fó e njà və̀y. A ŋkàlaʼ wíy a dzə ye wiy, mo wun woo Nyùy wíy a dzə sho e vikuʼùy və́ ví.»

Nyùy Tàr tooy wír və́ ji á kfə́n é bàm é Jerusalem

⁶ Nyùy Tàr yoŋ jii, «Vèn bèé, vèn bèé? Vèn ŋáʼáy cér, a leʼ fo kitum ke kùy ki. E ké ru kí, yì‑iì tàʼár mo ven vitóŋtóŋ vidzə̀m. Á mo mo woo Nyùy Tàr suuyin.»

⁷ Á bèy, ven vee wír veé Sion ve vé‑eè liìn, e dù sho e kwaʼ nsàm é Babilon, vèn wáa nyeŋkír fo kitum foo fèy, a kfənkír kfənkín.

⁸ Nyùy Tàr woo Taà Mànjòŋ‑eè tùm mo e vitaáví və́ ve ghaʼán ví ji m kanti vitúm ve ví‑iì faàsìn vifá ve wìr və́. Wù‑uù lo yòŋ jii, «Wìr wo wù tínsin wír vém, kù sí sov mo a dzə̀ fó tim.»

⁹ Rúrú, Nyùy Tàr wíy nàn kiwó ji wun sí dzəv áwune shó, áàkwàn véví kuúy vév vee vifá. Kí wíy koóy bèy, é vèn nèn kìíy ji tùm á Nyùy Tàr woo Taà Mànjòŋ mo.

¹⁰ Nyùy Tàr yoŋ jii, «Ven vee wír veé Sion, vèn wáa yòv kitávín, a sheʼrí, bìʼ fo m wiyì, a m yíi a dzə e věn mvəm.»

¹¹ Wíy lòo dzə e ghan fóo fèy, é vitúm vinín vi wáa gbù e Nyùy Tǎr wùn, e kfən ji wír və́. Á bèy, é Nyùy nèn a dzə e věn mvəm adzə̀m, é vèn nèn kìíy ji tùm á Nyùy Tàr woo Taà Mànjòŋ mo.

¹² Nsay Juda kfə̀n wíy a dzə kirə́ʼ ke dzəə̀n ké Nyùy Tàr e wun mvə̀m wòŋ woo jeéyí. Jerusalem wíy a dzə ŋkàlaʼ ye wù kfə̀n wíy shoʼ, a dzə sho.

¹³ Wìr msòŋ e dzə̀m wáa dzə kisə́sə e Nyùy Tǎr si. Wù ŋàʼáy ne, a wìy fo wun kirə̀ʼ ke ranén kí, keé yuv.