Sekariya 11 - ŊWÀʼ NYÙY

Nyùy Tàr wíy màʼ vé saʼ ve á nəʼsì wíri

¹ Éè Gwan Lebanon, ghém dzə́ə, ghém, é və́yí fiʼ tòn vicí vé ve *sidar.

² Éè dzəʼə̀y, á dìy, kicí kee sidar ki gbù ne, vicí ve tavkín ví fòy ne. Éè vicì vee oak veé Bashan, vèn wáa dìy, kóv wo wiyí sə̀y ne e nsay.

³ Vèn yuúrí, anshìy wírií tóŋé, viwìr vév ví mày ne bèn. Vèn yú mo abvərə̀ʼə́ nyamkìrì, bìʼ fo kóv Jordane bvəʼəmen ne, e mày.

Anshìy vee abaà

⁴ Nyùy Tàr woo Nyùy wom lò, e sùúy e mò jii, «Nəə́ líme, a dzə̀ yé nshìy wo wù leey njiì wo á leemè ji á lo, a see.

⁵ Wù kù dzə̀, a vé yune seéri, aá yòʼ maʼ ŋgeʼ aáwuné kitu, a vé fiìnèe kwáʼ kiwuú, suuy jii, ‹Buríi wáa dzə fo Nyùy Tàr, vèr kùʼkìr ne.› Bó nshìy yòʼ fə̀m rə́r sa mendzən me njiì və̀n.

⁶ Ke kí dzəə̀n kí dzə̀ jii, m yòʼ dzəə́ wìy a sham mendzən me wìr veé wòŋ fèn. Suuy mo woo Nyùy Tàr. Á yú, m wíy yiì, aáwune wáa fùnèn, kù áwune áwune, e kfə̀n way áwune e vé saʼ véví wo, aá laar woŋ, é la m yòʼ biìmé, é wìr boy féyì.»

⁷ Á bèy, m nèn dù, a shìy njiì wo vé‑eè leemè ji á yíi a seerí, a dzə̀ njiì wo á nyavrì sho. M lì mbàŋ sibaà, e shù yír yìmòʼ ji «Mendzən», e shù yé yìmòʼ ji «Kintatì», e nèn a shìy njiì və̀y sho.

⁸ Wáa dzə e mvə̀m ŋwee e mòʼón, m jùm anshìy ataár. Wúné kfən kìn mo bìʼ njiì və̀y, m kòsìn sa fo áwune.

⁹ M nèn sùúy jii, «M yòʼ dzəə́ wìy a shìy ven. Njiì wo wù kpú wáa kpu, é wo wù layì wáa lày. Ve á berin, wùmòʼ wáa kfər wùmòʼ.»

¹⁰ M nèn lì mbàŋ yem yee «Mendzən», e bèʼnín, e fíʼ dìn ji Nyùy Tàr ndzəə̀r ne a *mensaŋ me wù‑uù gwàrìn wùn à vitúm vi vidzə̀m.

¹¹ Mensaŋ mèn mè ku nèn ndzə̀ŋtí e kishiíy fóo fèy. Njiì woo wo ŋgeʼ və̀y yén, e nèn kìíy ji Nyùy Tàr súŋnin, shaa a fo kinyò ke m yiìn kin.

¹² M nèn sùúy aàŋgàa njìi jii, «Vèn fó ri vilaʼày vém ví, a kí fen ghèén ven. Kí tén ven, vèn yàr.» Á bèy, á nèn fìʼ *kisha ke mbàm ke fəvír kí ashekel mtaár ji vilaʼày vém.

¹³ Nyùy Tàr nèn sùúy e mò ji m li á shifarìn shee mbàm shìn, she vé‑eè foon ji ŋkùvtu wom, e màʼ a dzə̀ á e wìr wo wù fer vifá e mbóm. M nèn lì ashekel vee mtaár vìy, e dù, e màʼ e wìr wo wù fer vifá e mbóm, a wù dzə́ e Nyùy Tǎr lav cù.

¹⁴ M kfən bèʼ sá mbàŋ yem yee «Kintatì», e fíʼ dìn ji kintatì ke wìr veé mbìv wòŋ yee Juda wùn à veé mbìv wòŋ yee Isray ki mày a ne.

¹⁵ Nyùy Tàr nèn sùúy e mò jii, «Kfən dù rì, e nə̀ə́ lím nshìyi, a dzə̀ wo liì kisaŋ.

¹⁶ Á ku yuùrí, m lo, e lèm nshìy wùmòʼ é wòŋ, a bó wù yòʼ ghán a gwàrìr njiì wo wù sí kpúkirì, kìn ji wù wáa ci wo wù taʼrin ne, e bóo yiì a fèr ve á kivkin, e bóo fə̀m a yiír ve á dzəə́ tíyí. Wù wíy a dzə kfə́, a bvəʼ ve faŋkìné bvə́ʼə́n é wùn, a bvəʼ bèn, à mfay si shó.

¹⁷ «Lòné dzə̀ wó nshìy, nshìy woo rim, nshìy wo wù shwèyìn ŋgoo njiì. Á ku shòʼ kóy və́ é shùu rər, e mèn wan si yìy fó fo. Kóy yìyí ku kpù kpuún fó fo ŋkuuŋkùŋ, é wàn si və yìy ku fìr fìrìn féyì.»