Sekariya 10 - ŊWÀʼ NYÙY

Nyùy Tàr kaʼ ji wun wíy lùŋèr a wír və́

¹ Vèn lón wuú fo Nyùy Tàr, a lon ye yí náŋsin vifá ve ví siìn é sum. Dzə̀ wun wo wù yii fəər mbàʼ se wuu. Dzə̀ wun wo wù fó wíri wuú, yii, a vifá ve wìr dzə̀m vi teʼ e kwaʼ.

² Mebvə̀m mè dzə̀ kimboʼtì, a vé fùú táŋ sa a dzə̀ kimboʼtì. Vé səme tiísi njèm se kisaŋ si, yii, a wíri tiir vifií é vinyò vee là mvə́m. Wíri nén a jan janén moo njiì, aá yén ŋgeʼ bìʼ kibúŋ ke nshìy.

³ Nyùy Tàr suuy jii, «Dòʼshwiíy kív mo bìʼ anshìy wìr vém. M yíi màʼ ŋgeʼ e vilìmbìy vév ví kitu, bìʼ fo wír veé Judàa kù dzəə̀n vém vee wír. A mómò woo Nyùy Tàr woo Taà Mànjòŋ, m géʼsin e wír vémé. M wíy tavír wír vém, aá wáa kiv virə́ʼ moo nyám se ŋkoʼ seé shùu rər.

⁴ Tíy ye yí tóm kór lavi wíy a fəə fo áwuné mvəm, é kiŋkùm ke kí kér kibàn kí wáa fəə fo áwuné mvəm, é mvən se rər sí wáa fəəkír fo áwuné mvəm, e lì atǎr saʼ. Wír vìne kù fəə́kir fo áwuné mvəm adzə̀m adzə̀m.

⁵ Áwune wíy a dzə moo vintav ve wìr e shùu rər. Á wíy a nyèŋrì aŋgaà vév vibàn é kishàʼàr é dzəə, aá kù wíy a fùnèn bèy, bìʼ fo Nyùy Tàr tóm áwune, lóo fùnèn, aá wáa tòn, fə̀m à vé nyàm se ŋkoʼo.

⁶ «M wíy luŋ wír veé ram Juda, aá ghaámé é shùu rər, e tom vé kfəə Joosev, aá yov nsiì. M wíy lì áwune, e kfən sho e bàm, bìʼ koŋ ye m kér fo áwune. Áwune wíy a dzə, kù moo ji bó m yòʼ‑oò lo ŋwày áwune, a dzə̀ bìʼ fo m dzəə̀n Nyùy Tàr woo Nyùy wov, a m wíy a yu tóŋ yév.

⁷ Rúrú, wír veé ram Efrayime wíy a dzə antav e shùu rər, a yu vijuŋ mo wìr nó meluʼ, wúné wàa bòŋ. Wón véví wíy yen, a kòŋ, a sheʼrí kinyo ke Nyùy Tàr yiìn.

⁸ M wíy kùm toóy, é wír vémé báʼtí kirə́ʼ kimòʼón, bìʼ fo m tinen ne áwune fó vikwàn, aáwune kfə́n a dzə nyanyày mo vé‑eè dzəə̀n fó mbìy.

⁹ Fə̀m mo m taʼarin áwune e vitúm vímóʼ ví mvəm, á wíy a kuumé mo é virə̀ʼ ve á dzəə̀n shó kwaʼda. Áwune kù wíy lùŋ, e kfən e bàm wùn à wón véví.

¹⁰ M wíy baʼtí áwune fó Ejiv, à fó Assiriya, e kfən sho e bàm. M wíy dzə̀ʼə̀r áwune é Gilead, e dzə̀ʼə̀r e Lebanon, é fóo rún, a dzə là nsàn.

¹¹ Áwune wíy shaà e rìbà ndzə̀v wo dzəə̀n wo ŋgeʼ, e tosín, bìʼ fo mómò, m wíy sə̀r ndzə́v ye yí tsə́yninè. Ndzə́v yee Naayi wíy yum, e bàʼ e loònsay. Á wíy laàr kiŋkoʼòrwùn ké wìr veé Assiriya, é kitoómé ké vifòn veé Ejiv ki kívín.

¹² Mo woo Nyùy Tàr, m wíy luŋ wír vém, aá wáa dzə antav, e yiì, aáwune wáa ghan e mǒ mbòv. Suuy mo woo Nyùy Tàr.»