Sekariya 1 - ŊWÀʼ NYÙY

Nyùy Tàr bí wír və́ ji á kfə́n á fo wun

¹ Yì‑iì dzə̀ é ŋwee woo waamé, e kiya ke kí‑iì meen ji baà, mo vé‑eè koʼorin Darius ji fon woó Persia, Nyùy Tàr tiísí ntum rə e *ŋgaà ntum və woo Sekariya woo wan Berekiya, wo kfə̀n dzəə̀n wan wàn Iddo.

² Wù‑uù sùúy shó jii, «Mo woo Nyùy Tàr‑iì shwìíy kilòŋ vèr aàtǎr ram véné féyì.

³ Á bèy, ku yòŋ e wír véné ji mo woo Nyùy Tàr woo Taà Mànjòŋ suuy aáwune á jii, ‹Vèn wáa koʼtí e mǒ ghaŋ, é m wáa koʼtí sa e věn ghaŋ.› Suuy a mo woo Nyùy Tàr woo Taà Mànjòŋ.

⁴ Lá áwune yòʼ a tav a kitú mo atǎr ram véví‑iì táví. Aŋgàa ntum vém vee fó mbìyi‑iì kantì áwune ji mo woo Nyùy Tàr woo Taà Mànjòŋ‑eè suuy a jii, á biner á melív mev, e yàr fó a yiì liì kisaŋ. Yii bèy, áwune tén fóo yunín mo. Kù suuy mo woo Nyùy Tàr.

⁵ «Ku ghày ó e wíri jii, ké atǎr ram vén, á yòʼ dzə̀ə́. Fə̀m dzə̀ aŋgàa ntum Nyùy, á dù ne sa.

⁶ Yii bèy, kinyo kidzə̀m ke mò‑oò yiìn aŋgàa ntum vémé yíysí, e kàntì atàr vén shó, kí kù‑uù ghèén aáwuné kitu. Áwune nèn bìnèr melív mev, e sùúy jii, ‹Nyùy Tàr woo Taà Mànjòŋ lòvtí e vèr mo wù‑uù kàʼàn, réŋréŋ mo liì wor kisaŋ wùn à njiìn wor wo bi‑iì dzəə̀n.› »

Ŋgaà ntum Nyùy yén nyám se ŋkoʼ

⁷ Wìy lòo dzə kishiíy nshòv sikweè e mbaà fó ŋwee woo Shebat, a dzə̀ ji ŋwee woo nshòv mòʼón e ghvə̀m, a kù dzə̀ə́ e kiya ke kí‑iì meen ji baà, mo vé‑eè koʼorin Darius ji fon woó Persia, Nyùy Tàr kfən tiìsí ntum rə e mò woo Sekariya, a kù dzə̀ mo woo wan Berekiya woo wan Iddo.

⁸ Nyùy‑iì ghèm ndzə e mò vitsə́ʼə́, m yén, a wìr kóʼ nyamŋkoʼ ye baar, a yì tíy e kiwoóy, é mvə̀m vicì vé *mirtel, a nyám se ŋkoʼ se baar sí wùn à se baaŋèn sí, à se fəvír sí tíy e wun bàm.

⁹ Nshìylav yìmòʼ wáa tiy fo, a suŋnín e mò, m dzə́r shó jii, «Tàr wor, nsàv nyàm se ŋkoʼ sìn dzə̀ ji ka?» Yì bìnèr jii, «M yíi naàrì nsàv e wò.»

¹⁰ Ŋgaà koʼ wo wù‑uù tíy e mvə̀m vicì vé *mirtel nèn naàrì jii, «Vé nyàm se ŋkoʼ vìne dzə̀ wír ve Nyùy Tàr tsənsin ji á kóʼ á ŋkiy, e lèéy a vinyo ve ví kooy e kitu ke nsay.»

¹¹ Vé nyàm se ŋkoʼ vìyi nèn fèr e wun woo nshìylav Nyùy Tàr, a wù kù tíy e mvə̀m vicì vé *mirtel fèy jii, «Vèr ghànén ne, e lèéy kitú ke nsay kidzə̀m, e yèn, a kí néŋ ji dèʼ, là melaà.»

¹² Nshìylav Nyùy Tàr nèn a ghay ké wìr veé Juda jii, «Éè Nyùy Tàr, wò woo Taà Mànjòŋ, à wíy shwiíy kilòŋ vèn à wír veé Jerusaleme, e shwiíy vèn à ŋkà se laʼ seé Juda si, e dù meé e le? Mo siìn lèn ji kiyá msaàmbà, bo ví bèr visìʼín, é bo à kfən shàm áwune?»

¹³ Nyùy Tàr nèn kù a suŋnín kfə́ a dzə̀ e nshìylav ye yì kì súŋnin vèr wun, a fèr kinyo sho e jì ye juŋ, a rəə̀r shilív sə́ rə́ərin.

¹⁴ Yì nèn sùúy e mò ji m fúŋ á kinyo ke Nyùy Tàr woo Taà Mànjòŋ suuyì. Wù suuy a jii, «M kér shií wo ghaʼán fo ŋkàlaʼ yee Jerusalem, kér feyì fo Gwan Sion.

¹⁵ Yii bèy, a m shwiiy kilòŋ féyì vèr à vitúm ve ví sí yú vijuŋ ji vinyo vév ví néŋ e mboʼ vi. Mò‑oò lòo shwiíy kilòŋ vèr à wír vémé, a tàʼ ji m shwívír áwune, wír veé vitum vee shooyi ló kév, e laàr wír vém láarin ŋkuuŋkùŋ.

¹⁶ Á bèy, mo woo Nyùy Tàr nén a suúy jii, m kfə̀n kìʼ ne Jerusalem ji m shám áwune. Á kfə̀n yíi bom lav yem cù fo. Kù suuy mo woo Nyùy Tàr woo Taà Mànjòŋ. Á yíi màʼ kfəə̀ mfìʼ, e bom Jerusalem fo e dzə̀m.»

¹⁷ Nshìylav Nyùy rə̀y nèn sùúy e mò ji m ku siì fùŋ á kímóʼ kí ji Nyùy Tàr woo Taà Mànjòŋ suuy a jii, «Ŋkà se laʼ sém sí kfə̀n dzəə́ wìy a bun bunén e vikuʼùy ví, a mo woo Nyùy Tàr kfə̀n dzəə́ wìy rəə̀r melív me wìr veé Sion, e kfə̀n shoʼ Jerusalem ji ŋkàlaʼ yem.»

Ŋgaà ntum Nyùy yén loŋ se nyàm sikweè

¹⁸ M lòo nàn sí, e kfə̀n lò yèn kifá kímóʼ kí, a dzə̀ loŋ se nyàm sikweè.

¹⁹ M dzə́r e nshìylav Nyùy ye yì‑iì súŋnin e mò jii, «Loŋ sìn si din a dzə̀ ka?» Yì bìnèr jii, «Loŋ sìn si din a vitúm ve tavkín ví ve ví‑iì taʼarin wír veé Juda wùn à veé Israyi, à veé Jerusaleme.»

²⁰ Wáa dzə e bǎm kee shooy, Nyùy Tàr dìn vé kilàme e mò akweè.

²¹ M yén, e dzə̀r shó jii, «Wír vìne wìy ji á yii a dzə̀ ka?» Wù bìnèr e mò jii, «Loŋ see sikweè sìy si kù dzə̀ vitúm ve tavkín ve ví taʼarin wír veé Juda, a wír vìne wìy ne ji áwune bémér vitúm vee shooy, e laàr vitaáví vév.»