Remrí 8 - ŊWÀʼ NYÙY

Isray wíy yòv nsay, a yì dzə̀ e juŋ

¹ Mooser kú a yòŋ jii, «Vèn ku wìy wày ŋàŋ, a yunín nsər sidzə̀m se m fó e vèn lán və̀n. A vèn wìy a yiì mo sí dzəə̀n, bo vèn wíy a bonén, a shiíy, e kfə̀n a kùʼ, e wìy dù, e yòv nsay ye Nyùy Tàr‑iì kàʼàn atàr vén shó.

² Vèn ku wìy a kuumé mo Nyùy Tàr‑iì tsəənen ven é kiya kee mkweè kìn, e tòsín wóʼ shó. Wù‑uù tsəə́ne bèy, soyrì ven e ŋgeʼ si, e fíʼ sə̀r ven, e kiíy shilív shén ji sà dzə̀ vèn lèm nsər sə́, mo bó yòʼ dzə̀ á lèm á.

³ Wù‑uù sə̀r ven, e lèm e jìŋ, e yiì lò, e yìír ven e manna wo bó vèn yòʼ‑oò kiìn, a bó atàr véné yòʼ‑oò kì sá. Wù‑uù yii bèy ji vèn kiíy á ji bó yòʼ jòʼsì ji wìr yí kibán, e bóo lùŋ. A dzə̀ wìr kù lùŋ a dzə̀ fó jì se sí fəə́ fo Nyùy Tǎr shuù sidzə̀m.

⁴ Bó ndzə̀y sén sí yòʼ‑oò lo sàʼkìr e dzəə, a bó wuú yéné yòʼ‑oò lo kòʼkír e kiya kee mkweè kìn.

⁵ Vèn kiíy kiránén jii, mo tàr wàn yii sər wán və, bo dzə̀ mo Nyùy Tàr woo Nyùy won yii sər sa ven bey.

⁶ «Kí nén a dzə jii, vèn ku wìy a lèm nsər se Nyùy Tàr woo Nyùy won sí, a ghan a dzə̀ e wun mbòv, a ghvəm wun.

⁷ Nyùy Tàr woo Nyùy won sí li ven, e dù sho e nsay, a yì dzə̀ e juŋ feyì. Dzə̀ nsay, a ndzə́v sí dzə̀kìr fó. Ntòŋ sé ndzəv sí fəə́kir aàgwan, fəə́kir e viwoóy, léŋ, du.

⁸ Dzə̀ nsay, a kfə́ə saŋ yee *wit wùn à yee *barlìi boŋ fo. Vitiír vé *vayin wùn à vicí vé *fig vi, à vicí vé *grenadin vi, à vicí vé *oliv vi dzə̀ fó, e bóo lì sa vilu.

⁹ Nsay rə̀n dzə̀, a vèn wíy a ker vifá ve yi fo nyanyày, a bó vèn yòʼ wíy a buŋ kifá. Dzə̀ nsay, a tíy yee fóo dzə̀ kisha. A dzə̀ agwan vee fó, á wàa tuŋ kisha kee *kopa fo fo.

¹⁰ Vèn wíy a yikír, é bvə́me wáa kur, é vèn nèn a wùʼsì Nyùy Tàr woo Nyùy won, bìʼ nsay ye juŋ ye wù foon e vèn.»

Mooser kántí wír veé Isray ji lá á yòʼ màʼtì a Nyùy Tàr

¹¹ Mooser kfə́n a suŋnín, a yòŋ jii, «Vèn wáa yen fóo wìy làysìn Nyùy Tàr woo Nyùy won, e yàr fó a lèm nsər sə́ wùn à kinyo ke wù tinen kí, à sáʼ rəə́, a dzə̀ vinyo vìn ve m yòŋèn e vèn lán.

¹² Vèn wíy lóo yikír, lóo yu, baʼrì lav se juŋ si, lóo shiíy sho,

¹³ kfə́n lóo ker ŋgoo se nàʼ wùn à sé bvəy si, lóo ker *kisha ke mbàm ke fəvír kí, à ke baar kí nyanyày, a kifá kidzə̀m ke vèn kér ki táʼám ne,

¹⁴ vèn wàa yen fóo koʼór wún, e làysìn Nyùy Tàr woo Nyùy won wo wù‑uù fəərin ven fó wòŋ Ejiv fo lav vikwàn.

¹⁵ Wù‑uù lì ven, e shaà sho e kirə̀ʼ ké woʼ kí, a kí‑iì dzə̀ kiwíy, e kfə̀n a beemé, a yó se ndzəʼ si wùn aàŋgámé‑eè dzə̀ fó. Kirə́ʼ, a yì‑iì dzə̀ kinjúm ke kirə̀ʼ, a bó ndzə́ví yòʼ kum fo, yii bèy, wù wáʼ kintav ke kilan, ndzə́ví fəə́ fó fo.

¹⁶ Wù‑uù fò vifá ve yi vee manna e vèn é kirə̀ʼ ké woʼ kí, a dzə̀ kifá, a bó atàr véné yòʼ‑oò lo kìíy. Wù‑uù mumrì ven e ŋgeʼ si ji wun yiì lò fo bàm, e səə̀vì ven e vifá ve juŋ vi.

¹⁷ Kí nén a dzə jii, lá vèn yòʼ wìy lò, a ker kwaʼtì yímóʼó ji vèn fùnèn e vitaáví vén ví, e bó a ker a kéŋ nyanyày.

¹⁸ «Vèn kú a kuumé Nyùy Tàr woo Nyùy won, bìʼ fo dzəə̀n wun wo wù fó ven vitaáví, é bo vèn wáa keŋ kéŋ sho, a kùʼkìr. Vèn kú a kuumé wun, é wù fiʼ wìy a yùŋrì *mensaŋ mvə me wù‑uù kàʼàn atàr vén shó, e lìʼ, mo wù‑uù yùŋrìn, e wìy to lán.

¹⁹ A vèn wìy làysìn Nyùy Tàr woo Nyùy won, a jùmrì anyùy kisaŋe, a ghvəm, e kfə̀n a cù áwune, bo m yoŋ e vèn lán, e ké ru kí ji á kù wíy laàr a ven ŋkuuŋkùŋ.

²⁰ A vèn dzə̀ là fóo wìy a yunín Nyùy Tàr woo Nyùy won, bo wù kù wíy laàr ven réŋréŋ mo wù yíi laàr vitúm fo věn mbìy e ghan se vèn yíi a nəə́ áwune.