Remrí 7 - ŊWÀʼ NYÙY

Isray dzə̀ wír Nyùy Tàr

¹ Mooser shaà fo mbìy, a suúy jii, «Nyùy Tàr woo Nyùy won wíy lì ven, e dù sho e nsay ye vèn du, e nəə́ sho ji vèn yov, é wù tsəʼ vitúm fo fo vinín fo věn mbìy, a kù dzə̀ mo vèn wíy a nəə́, a dù. Wù wíy tsə̀ʼ wír veé Hit wùn à veé Girgashi, à veé Amori, à veé Kanane, à veé Perisi, à veé Hivi, à veé Jebusi. Dzə̀ vitúm saàmbà, a ví kùʼkìr, e kfə̀n tàvkír, e shaà ven.

² Wíy lóo dzə, a Nyùy Tàr woo Nyùy won wáy ne áwune e věn kiwo, vèn tonè, bo vèn kér fóo laàr ŋkuuŋkùŋ. Lá vèn yòʼ wìy gwàr *mensaŋ vèn áwune. Lá vèn yòʼ wìy rə̀r mendzən mev féyì feyì.

³ Lá vèn yòʼ wìy a tatí vijín vèn áwune mó a fo wón vén ji vikǐy won vév, kìn mó a lì wón vév ji vikǐy won vén.

⁴ Kí dzə̀ bey, bìʼ fo a vèn wìy mùm, bo áwune wíy a bìnèr wón vén fo á wáa ghvəm a dzə̀ mo, e nèn lò, a ghvəm a dzə̀ anyùy kisaŋe. A kí kòóy bèy, bo dòʼshwiiy Nyùy Tàr lo, e ŋaʼáy, é wù sasin, e yùyrí ven.

⁵ Kinyo ke vèn yíi yiì aáwune kí dzə̀ ji vèn tsə́y kíy sév sé cù si, e kètì, e bvə̀ʼtí sə́y sév sé anyùy, e gwàtì wúr sé nyùy woo *Ashera. Vèn ton mebvə̀m mev me semén mè tónen e və́yí.

⁶ «Vèn wáa yiì bèy, bìʼ fo vèn dzəə̀n kén wír vee jeéyí ji vé Nyùy Tàr woo Nyùy won. Wù shòʼ ne ven fo vitúm veé kitu ke nsay ví mvəm, e yòv ji və́ vee wír.

⁷ Wù yòʼ‑oò lo shòʼ ven bey ji bìʼ fo vèn‑eè kùʼùn, e shaà vitúm vímóʼ ví. Yì‑iì dzə̀ bìʼ fo wù‑uù kòŋèn ven, e nèn shòʼ ven, a vèn‑eè dòr, e shaà vitúm vidzə̀m.

⁸ Kù dzə̀ bìʼ fo wù koŋ ven, a wù kfə̀n lem ŋkàʼmé wo wù‑uù kàʼàn, e lìʼ wùn aàtàr véné, e bóo fəə́r ven fó lav vikwàn e vitaáví və́ ve ghaʼán ví, é bo vèn boy fo Farao woo fon woó Ejiv wo.

⁹ «Bo dzə̀ ji vèn kiíy á ji Nyùy Tàr woo Nyùy won kù dzə̀ wun Nyùy. Wù dzə̀ Nyùy woo ŋgaà suuyrú, a wù yii tíy e wun mensàŋ, din koŋ rə́ ye wiyí e wír ve á koŋ wun, kfə̀n lem nsər səə́. Wù kù wíy a dìn bèy mo ŋgwàʼ sév sí wíy a koʼ viyá viyá là may.

¹⁰ Wù lo, wù làʼ wír wo wù ban wun e kpúu, kù é kisəəné, a bó wù yòʼ laáti fóo làʼ wír wo wù ban wun e kisəəné.

¹¹ Kù dzə̀ ji vèn wáy á ŋàŋ, a yunín nsər sìn wùn à sáʼ Nyùyi, à vinyo ve wù tinen ví, vinyo vidzə̀m ve m yòŋèn e vèn lán və̀n.

Wìr yúnin Nyùy Tàr , wù wàa ker kisəəvì

¹² «A vèn wày vifií é vinyò ve Nyùy tinen vin, a lèm, a yiì mo ví dzəə̀n, bo Nyùy Tàr woo Nyùy won wíy a tiy e mensàŋ me wù‑uù gwàrìn wùn aàtàr véné, e lìʼ, e kù wìy a dìn ven koŋ rə́ ye wiyí.

¹³ Wù kù wíy a kòŋ ven, a səə̀vì ven, e yiì, é vèn wáa kùʼ. Wù wíy səə̀vì sa kidzəə́y kén, e kfə̀n səə̀vì nsay yen, é yì wáa fəə́r vifá ve yi, a fəə́r meluʼ, a fəə́r meŋgvə́r. Wù wíy a səə̀vì nyám sén, é sí wáa dzəəkír e nsay ye wù‑uù kàʼàn atàr vén shó ji wun wíy fo e vèn.

¹⁴ Vèn wíy a ker kisəəvì, e shaà wir dzə̀m. Bó kár yòʼ wíy a dzə e věn mvəm, kìn dzə̀ lumèn, kìn wiíy, a bó nyàm yee kár yòʼ wíy a dzə.

¹⁵ Nyùy Tàr wíy a kìŋ ven fó ayàsí adzə̀m, e làa yòʼ biimé ji ayàsí ve beemén ve vèn‑eè yenen é Ejivi gbu e věn kitu. Yii bèy, a wù wíy a tsəm wír ve á ban ven shó adzə̀m.

¹⁶ Vèn wíy laàr wir dzə̀m wo Nyùy Tàr woo Nyùy won wayin e věn kiwo. Lá vèn yòʼ wìy rə̀r mendzən fo áwune, e bàvtí. Lá vèn yòʼ wìy a ghvəm anyùy vév, bìʼ fo kee shooy ki dzəə̀n kitám ke dzə̀ vèn lì shó.

¹⁷ «A vèn fə̀m wìy a rə̀m jii, ‹Vitúm vìn vi kùʼ, e shaà ver, a dzə̀ vèr ghàn é le, e bóo jùm áwune,›

¹⁸ lá vèn yòʼ wìy a fàn áwune. Vèn kú a kuumé a dzə̀ kinyo ke Nyùy Tàr woo Nyùy won‑eè yiìn e Farao wùn à wír vəə́ adzə̀m e Ejiv ki.

¹⁹ Vèn‑eè lo yèn e sí yéné mo wù‑uù màʼàn ŋgeʼ se tavkín sí e wír veé Ejiví kitu, e yèn vitaáví və́ ve ghaʼtín ví, e kfə̀n yèn kóy və́ wo wù‑uù nànèn, e bóo fəə́r ven fó Ejiv fèy. A kù dzə̀ sá mo wù wíy lovtí bèy e vitúm ve vèn fan lèn vi vidzə̀m.

²⁰ Fə̀m à bey, Nyùy Tàr kù wíy tum vimfàŋfàʼáy aáwuné mvəm, e meé mo ví wíy laàr kibér ke wìr ve vé‑eè berin, e lìr fo vèn.

²¹ Lá vèn yòʼ wìy a fàn áwune. Nyùy Tàr woo Nyùy won dzə̀ e věn mvəm, a wù dzə̀ ŋgaà vitaàví ve wiy ví, a wù kfə̀n beèmé sa e ŋàŋ.

²² Nyùy Tàr woo Nyùy won wíy a jùm vitúm vìn ji weè weè mo vèn wíy a nəə́, a faàsì nsay. A dzə̀ la vèn yòʼ wìy sàsìn, e sə̀ʼsí áwune kàŋ mòʼón. A kí dzə̀ bey, fo nyám se kwaʼ si wìy kùʼnìn, e ghàʼ ven.

²³ Á bèy, Nyùy Tàr woo Nyùy won wíy way áwune e věn kiwo, e màʼ ntùʼtìn wo ghaʼán aáwuné mvəm, e meé mo á wíy dù, e mày.

²⁴ Wù wíy way afon vév e věn wo, é vèn sə́ʼsí yír yév fó kitu ke nsay. Bó wìr yòʼ wíy tam vèn áwune, e meé mo vèn wíy laàr áwune.

²⁵ Vèn wíy tòn mebvə̀m mev me á semen ji anyùy e və́yí. Lá vèn yòʼ wìy kùm *kisha ke mbàm ke fəvír kí, kìn ke baar kí, ke á laʼtin e mebvə̀m mèn mè wùn. A vèn mùm, bo wíy a dzə kitám ke dzə̀ vèn lì shó, bìʼ fo mebvə̀m mee shooy mè dzəə̀n joonè e Nyùy Tàr woo Nyùy wón si.

²⁶ Lá vèn yòʼ wìy lì kifá ke joònè kí, e wìy sho e věn melav, é kí yii, é vèn li lor, a dzə moo kifá kee shooy. Vèn ku nyàŋsí vifá vee shooy vi nyáŋsín, e tèr fo fo, bìʼ fo siìn vifá ve lor vi ve dzə̀ á kù laàr laàrìn.»