Remrí 5 - ŊWÀʼ NYÙY

Nsər see ghvə̀m

¹ Mooser báʼtí wír veé Isray adzə̀m, e sùúy aáwune jii, «Éè wìr veé Isray, vèn yú, vèn yuúrí sáʼ Nyùy wùn à vinyo ve wù tinen ví. Dzə̀ vinyo ve m yoŋ e vèn lán. Vèn yéʼéy, e wày ŋàŋ ji á wáa yiì a mo ví dzəə̀n.

² Nyùy Tàr woo Nyùy wòsən‑eè gwàr *mensaŋ vèsən áwune é Gwan Horev.

³ Wù yòʼ‑oò lo gwàr a dzə̀ wùn aàtàr vesəné cáʼcáʼ. Wù‑uù gwàr, e tàtí sa vèsən ve á dzəə̀n shó atin, e to lán.

⁴ Nyùy Tàr‑iì sùŋnín vèn áwune é gwan foo fèy, e mvə̀m və̀y, a vèn dzə̀ fó si.

⁵ M kù‑uù tíy kém e vèn à Nyùy Tǎr kintìntìn e ghan fóo fèy, tíy bèy ji m fiʼ naàrì a jí se Nyùy Tàr e vèn. Və́y wo wú‑uù dzəə̀n é gwane‑eè bèmér ven, vèn fàn fóo koʼ fo, Nyùy Tàr nèn yòŋ jii,

⁶ ‹Dzə̀ mo Nyùy Tàr woo Nyùy won, mo wo mò‑oò fəərin ven fó wòŋ Ejiv fo vèn‑eè reŋ vikwàn.

⁷ « ‹Lá vèn yòʼ a ker anyùy ámóʼó, e shaà mo.

⁸ « ‹Lá vèn yòʼ fèr shibvə̀m ji á wáa ghvəm, a fə̀m dzə̀ é njà kifa keé yuv, kìn keé nsay, kìn keé ndzəv yeé loònsay.

⁹ Lá vèn yòʼ a ghvəm, lá vèn yòʼ a cù mebvə̀m mee shooy, bìʼ fo mo woo Nyùy Tàr woo Nyùy won dzəə̀n Nyùy wo wù kíyri ven é ŋàŋ. M yíi màʼ ŋgeʼ e wóné wùn, à wón woné, à wón wón woné, bìʼ ban ye atàr véví ban mo.

¹⁰ Yii bèy, a m din koŋ yém e wír ve á koŋ mo, lem nsər sémé, e kù a dìn bèy, e dù, e meé mo ŋgwàʼ si wíy a koʼ, ansə̀kì ansə̀kì.

¹¹ « ‹Lá vèn yòʼ yòŋ yír Nyùy Tàr woo Nyùy won kisáŋ, bìʼ fo mo woo Nyùy Tàr wayin ji wìr wo wù yoŋ yír yém kisáŋ kù li njò.

¹² « ‹Vèn kuúmé kishiíy kém ké bam ki, e lèm ji kishiíy kee jeéy kí mo mo woo Nyùy Tàr woo Nyùy won‑eè yòŋèn e vèn.

¹³ Vishiíy vee ntuùfú ví dzə̀ ve vèn wáa lìm lim yén,

¹⁴ a kee saàmbà ki dzə̀ kishiíy ké bam ke Nyùy Tàr woo Nyùy won. Lóo dzə e kishiíy fen, lá wìr yòʼ yiì lim, kìn dzə̀ ŋgaà lav, kìn wán və woo lumèn, kìn woo wiíy, kìn kwàn və́ woo lumène, kìn woo wiíyi, kìn nàʼ və, kìn kimbèʼbìy kfə́, kìn kfə́ə nyàm rə yìmòʼ, kìn kiŋgwìy ke kí dzə́ e věn nsay. Vèn ku yiì, áàkwàn véné meeme sá moo ven.

¹⁵ Vèn kuúmé ji vèn‑eè dzə̀ akwàn é wòŋ Ejiv, á bèy, mo woo Nyùy Tàr woo Nyùy won, m fəə́r ven fó fo e kóy wo tavíné, à vitaáví ve wiy ví. Á kinyo ke m foon nsər e vèn ji vèn wáa lèm kishiíy kém ké bam.

¹⁶ « ‹Ghvə́m tàr won wùn yè won mo Nyùy Tàr woo Nyùy won yòŋèn e vèn, áà fíʼ a dzə dzə́ ye juŋe, e wìy dzə̀ʼə̀m ntàmda e nsay ye Nyùy Tàr woo Nyùy won sí fó e vèn.

¹⁷ « ‹Lá wìr yòʼ yùyrí wír.

¹⁸ « ‹Lá wìr yòʼ lì wiiy wìr, kìn ji wiíy wáa ghan viŋkar.

¹⁹ « ‹Lá wìr yòʼ a shoŋ vishóŋ.

²⁰ « ‹Lá wìr tìím vinjen ve kisaŋ vi, e tòy wír e kinyò.

²¹ « ‹Lá wìr yòʼ siìmé wiiy wìr wùmòʼ. Lá wìr yòʼ siìmé lav wìr, kìn dzə̀ súm və́, kìn kwàn və́ woo lumène, kìn woo wiíyi, kìn dzə̀ nàʼ və, kìn kimbèʼbìy kfə́, kìn dzə̀ ka ke dzəə̀n ké ŋgaàŋ.›

²² «Nyùy Tàr‑iì sùŋnín jí sìn e màŋgòŋ won e dzə̀m e gwan. Wù súŋnín fó mvə̀m və̀y, a wú dzə̀ é mvə̀m mbàʼ ye yì‑iì sə́n ji cùm. Wù súŋnín kitávín, e làa yòʼ kfə̀n dzə̀sì. Mo wù suŋnin bey, e nèn sàŋ jí sìn e viwàŋ ve tiy vibaà, e fò e mò.»

Wíri yú kisúŋnìn ke Nyùy Tàr , a fàn

²³ Mooser shaá fó mbìy, a suúy jii, «Vèn‑eè yù kisúŋnìn, a kí fəə́ fo mesənér, a gwan shwí, vèn kóʼtí e mǒ ghaŋ, a yì‑iì kòʼtí atǎr ram adzə̀m wùn à vilìmbìy vén ví.

²⁴ Á kóʼtí bey, a suúy jii, ‹Nyùy Tàr wo dzəə̀n Nyùy wor dìn ne vikuʼùy və́ wùn à vitaáví və́ ví e vèr. Vèr yù ne kisúŋnìn kfə́ fó mvə̀m və̀y. Vèr yèn ne e kishiíy ké lán ki mo Nyùy Tàr suŋnin e wìr msòŋ, fə̀m mo wù suŋnin bey, ŋgaàŋ góʼ e tin.

²⁵ Yii bèy, a dzə̀ vèr wàa kpukír ji ka? A Nyùy Tàr woo Nyùy wor kfə̀n lò ji wù súŋnín e vèr, bo və́y wo wiy və́ne lo, e laàr ver, é vèr kpúkír.

²⁶ Bó kí yòʼ‑oò yiì ne kòóy ji wìr fo wìr yú, a Nyùy wo wù dzəə̀n shó e tin súŋnin fo mvə̀m və̀y mo vèr yuun, ŋgaàŋ góʼ e tin.›

²⁷ Á suúy bey, e nèn yòŋ e mò jii, ‹Mooser, kfə́n fó, e yuùrí kinyo ke Nyùy Tàr woo Nyùy wor suuy ki. À yú, áà wiy, e naàrì e vèr kinyo kidzə̀m ke wù suuyin e wò. Vèr yú, aá wáa yiì kinyo kidzə̀m ke wù yòŋèn.›

²⁸ «Nyùy Tàr‑iì yù kinyo kén ke vèn‑eè suuyin e mò, e nèn yòŋ e mò jii, ‹M yù ne kinyo ke wír vìne yoŋ e wò. Kinyo ke á suuyin kidzə̀m ki dzə̀ rú.

²⁹ Kì yée fó a dzə feyì ji á mo shilív shév shí dzəə̀n ben ghán sidzə̀m. Áwune kì yèe fó a fàn mo, a lèm nsər sém sidzə̀m, é kí fiʼ yiì, aáwune wáa ker vishí ve juŋ vi, à rám yéví shó, e wìy dù, e mày.

³⁰ Dù, e sùúy aáwune ji á wáa kfənkír a aáwuné tàv sí.

³¹ Yii bèy, wówò Mooser, áà goʼ fen e mǒ ghaŋ. M yíi fo nsər sém e wò, wùn à sáʼ yémé, à vinyo ve m tinen ví vidzə̀m. Dzə̀ vinyo ve à wíy a yeʼéy áwune shó ji á wáa lèm e wòŋ wo m wíy fo ji wóv.› »

³² Mooser kfə́n a yòŋ jii, «Wír veé Isray, kù dzə̀ cáʼ ji vèn ku wày ŋàŋ ji á wáa yiì a dzə̀ mo Nyùy Tàr woo Nyùy won yòŋèn e vèn. Lá vèn yòʼ shòʼór nsər rə yìmòʼ, e bàr ŋwàn.

³³ Vèn ku wìy a yiì kinyo kidzə̀m ke Nyùy Tàr woo Nyùy won yòŋèn e vèn kí, a ghan e wun mbòv, e fíʼ a dzə sho, é vinyo vén ví wáa ghan kijuŋ, é vèn kfən bònen bèʼrí e nsay ye vèn yíi dù, e yòv.»