Remrí 4 - ŊWÀʼ NYÙY

Mooser távír wír veé Isray ji á kú a yunín a Nyùy Tàr

¹ Mooser yiì lò, e sùúy jii, «Éè wìr veé Isray, vèn wáa yunín nsər se m yéʼey ven shó si, à ntò se vinyò si, a yiì mo sí dzəə̀n, e fíʼ yiì a dzə sho, e yìi nəə́, e sə nsay ye Nyùy Tàr woo Nyùy atàr vén fó e vèn.

² Vèn kú a lèm a dzə̀ nsər se Nyùy Tàr woo Nyùy wòsən se m yoŋ e vèn sí. Lá vèn yòʼ dzə̀sì kifá e vinyò ve m yoŋ e vèn, lá vèn yòʼ shòʼór kifá fo fo.

³ Vèn‑eè lo yèn e sí yéné mo Nyùy Tàr‑iì yiìn é Gwan Baal‑Peor. Nyùy Tàr woo Nyùy won‑eè teè wir dzə̀m wo wù‑uù ghvə́m nyùy woo *Baal fo věn mvəm é gwan foo fèy.

⁴ Yii bèy, ven ve á kù‑uù tíy a dzə̀ e Nyùy Tàr woo Nyùy wòsə́n wùné kù dzə̀ə́ sho atin, e wìy shem lán.

⁵ «Vèn leéy, e yèn, m yèʼéy ne ven nsər sidzə̀m se Nyùy Tàr woo Nyùy wom yòŋèn e mò ji vèn fíʼ a lèm e nsay ye vèn nəə sho, e yòv.

⁶ Vèn wáa lèm, a yiì. Kee shooy ki yíi a dìn vifií wùn à kiíyi e vitúm vímóʼ ví. Á lóo yu nsər sìn sidzə̀m, aá wáa yòŋ jii, ‹Rúrú, kitúm ke kí dzəə̀n wír nyanyày, e kfə̀n tàv kin ki dzə̀ ben, a dzə̀ afií, aá kfə̀n kì vinyo.›

⁷ Bó kitúm kímóʼ kí yòʼ dzə̀ shó, a kí fə̀m kùʼ e le, ke kí kér nyùy woo moo Nyùy Tàr woo Nyùy wòsən, wo à lóo toŋ kinyo, a wù yú ne.

⁸ A bó kitúm ki yòʼ dzə̀ shó, a kí fə̀m kùʼ e le, ke kí kér nsər se sí dzəə̀n tìítiy moo nsər sìn sidzə̀m se m fó e vèn lán.

⁹ «Kinyo kimòʼón ki nén a dzə jii, vèn kim vitú vén ví, a tiír kiwuú kén, a fìʼ, a yen fóo làysìn kinyo ke vèn‑eè yenen e sí yéné. Lá vèn yòʼ biìmé, é kí fəə́ fo věn meliv mo vèn wíy a dzə sho. Vèn naari kinyo kee shooy ki e wón véné, e naàrì e wón woné.

¹⁰ Vèn wáa naàrì mo kishiíy ke vèn‑eè tiimen e Nyùy Tàr woo Nyùy wón si e Gwan Horev ki‑iì dzəə̀n. Nyùy Tàr‑iì yòŋ e mò jii, ‹Báʼtí wíri, e wìy sho ji m fíʼ yiì, aá yú jí yem. Á yú bèy, aá nèn kìíy mó a ghvəm mo kishiíy kidzə̀m ke á wíy a dzə sho, e wìy dù, e mày. Á lóo yiì bèy, aá wìy a yeʼéy wón vév ji á kú a yiì sa a réŋréŋ bey.›

¹¹ «Vèn kú a naàrì mo vèn‑eè koʼtin, e tìím e sar gwan, a wù shwí, a kiliímé ki kóʼ, mee e ntoò yùv, a kindzə́ʼ ki súm fó e njà mbàʼ, a kí sə́n ji cùm.

¹² Nyùy Tàr nèn sùŋnín e vèn fó mvə̀m və̀y, a vèn yú a dzə̀ kisúŋnìn, aá yòʼ yén wír. Vèn kù‑uù yú a dzə̀ jí rə.

¹³ Wù‑uù naàrì ntò sə́ sé *mensàŋ se wù‑uù foon ji vèn wáa lèm, a dzə̀ nsər see ghvə̀m, a wù sáŋ é viwàŋ ve tiy vibaà.

¹⁴ Nyùy Tàr nèn yòŋ e mò é ghan fóo fèy ji m yéʼéy á ven nsər si wùn à ntò se vinyò se vèn wìy a lèm e nsay ye vèn líysin, e yòv.

Mooser kántí wír veé Isray fo á wáa ghvəm mebvə̀m

¹⁵ «Kí nén a dzə jii, vèn kim vitú vén ví, fó jay. Vèn yòʼ‑oò lo yèn nshwìnin Nyùy Tàr é ghan se wù‑uù súŋnin e vèn fó mvə̀m və̀y é Gwan Horev.

¹⁶ Vèn ku nèn a yen fóo jay kinyo, e fèr shibvə̀m e nshwìnin kifa, a ghvəm, kìn dzə̀ é nshwìnin lùmèn, kìn dzə̀ é nshwìnin wiíy,

¹⁷ kìn dzə̀ é nshwìnin nyàm yeé kitu ke nsay yìmòʼ, kìn dzə̀ é nshwìnin shinə̀n she shí féŋ e yuv,

¹⁸ kìn dzə̀ é nshwìnin kifa kee ŋàŋrì é nsay, kìn dzə̀ é nshwìnin sə se sí dzəə̀n é ndzəv, e sar nsay.

¹⁹ Vèn leey yúv, yén shúy, yén ŋwee, yén mejiy, à vifá veé yuv vímóʼ ví, vèn wàa yen fo ví lévtí ven ji vèn wáa ghvəm, e kfə̀n a lìm fo fo. Dzə̀ vifá ve Nyùy Tàr woo Nyùy won màʼtìn ji vitúm vímóʼ ví wáa ghvəm.

²⁰ Yii bèy, vèn dzə̀ kén, a Nyùy Tàr‑iì lì ne ven, e fəə̀ shó fo Ejiv fo ŋgeʼ‑eè báv ven moo və́y woó kilàm. Wù‑uù yiì bey ji wun lem ven ji və́ vee wír. Vèn ku nèn a dzə bèy, e wìy shem lán.

²¹ Nyùy Tàr nèn wìy lò, e shwìíy kilòŋ vèr wun bìʼ ven, e lìʼ, e sə̀ntì ji feyì feyì, bó m yòʼ wíy liysín a ndzə́v yee Jordan. Wù kfən yòŋ ji bó m yòʼ wíy nəə́ a e wòŋ wo juujùŋ wo wun woo Nyùy Tàr woo Nyùy won fó e vèn.

²² A kí dzə̀ jii, m kér fóo kpu, a kù dzə̀ é nsay yeé mbìv fen. A dzə̀ la m yòʼ lìysín ndzə́v yee Jordan. Fo kén kí, vèn yíi liysín, e yòv nsay yee shooy.

²³ Vèn kim vitú vén ví. Vèn wáa yen fó làysìn ntò se *mensàŋ me Nyùy Tàr woo Nyùy won‑eè gwàrìn vèn áwune, e lò, e fèr shibvə̀m e nshwìnin kifa, a Nyùy Tàr‑iì shàʼnín ne fo vèn.

²⁴ Lá vèn yòʼ mùm, bìʼ fo Nyùy Tàr woo Nyùy won dzəə̀n ji və́y wo wú laar kifá, a wù yii kíyri wír e ŋàŋ.

²⁵ «Fə́m wíy lóo dzə, a vèn nəə́ ne e nsay foo fèy, e bònen dzə̀ʼtì fo, a ker wón, à wón woné, lá vèn yòʼ mùm kinyo kée bivír vitú vén ji á fer shibvə̀m e nshwìnin kifa. A vèn wìy mùm, bo kí wíy tinsín Nyùy Tàr, é wù wáa shwiíy kilòŋ.

²⁶ M nén a bi yúv wùn à nsay lán ji á wáa yen a kinyo ke vèn yii. A vèn tàv kitú fo Nyùy, é la vèn yòʼ dzəə dzə̀ʼtì ntàmda e nsay ye vèn líysin Jordan, e nəə́ sho. Bo vèn lo, e rèŋ fo kitu ke nsay, e mày. A kí kòóy bèy, aá ku laàr ven láarin ŋkuuŋkùŋ.

²⁷ A kí dzə̀ jii, Nyùy Tàr wíy taʼár ven, é vèn dukir é vitum vímóʼ ví. Vèn du fo, aá kár, e wìy bèr wír ashàr.

²⁸ Vèn wíy lòo dzə fo, aá wáa ghvəm anyùy a dzə̀ mebvə̀m, kifá, aá fér e kiwó ki, kìn á fèr e kicí kí, kìn e tíyí. Kifá ke wìr lo, wù fèr, a bó kí yòʼ yén virə́ʼ, a bó kí yòʼ yú vinyo, a bó kí yòʼ yíkirì, a bó kí yòʼ yú kirəm.

²⁹ A vèn wìy a dzə fo, a tàʼ Nyùy Tàr woo Nyùy won, bo vèn wíy yen wun, a vèn fen fò kitú kén shó kidzə̀m, a tàʼ wun shilív shén shidzə̀m.

³⁰ Vinyo vee shoon vi wíy lóo koóy ven, ŋgeʼ ye tavín nəə ven, é vèn nèn bìnkìr, e kfə̀n e Nyùy Tàr woo Nyùy wón wùn, a yunín wun.

³¹ Nyùy Tàr woo Nyùy won dzə̀ ŋgaà shammèndzə̀n. Wù yòʼ wíy màʼày ven, a wù yòʼ wíy laàr ven, a bó wù yòʼ wíy làysìn mensaŋ me wù‑uù gwàrìn wùn aàtǎr ram véné, e fìnèr e kilìʼ kí.

Isray dzə̀ kitúm kee jeéy

³² «Vèn kuúmé ó ghán seé yàŋgùʼ sí, mo kí‑iì dzəə̀n, é bo á wìy a dzəə́ ven, e kèʼ fo ghan se Nyùy‑iì bomen wír e kitu ke nsay. Vèn tar ndzə e dzə̀m, e yèn ó ji kiŋgaʼnìn ke kinyò kímóʼ kí sà‑aà yiì ne kòóy moo kin a, kìn ji wìr sà‑aà yiì ne yù kfə́ə kinyò kee ben a?

³³ Bó kitúm kímóʼ kí yòʼ dzə̀ shó moo kén, ke wíri yuun ne, a nyùy wùmòʼ súŋnín fó mvə̀m və̀y mo vèn‑eè yuun, e yù bey, e gòʼ atin.

³⁴ Mo nyùy wùmòʼ dzə̀ sá sho wo wù‑uù duùn ne, e fə̀ə́r kitúm fo kímóʼ kí mvəm, e lì ji kfə́ mo Nyùy Tàr woo Nyùy won‑eè yiìn é ghan se wù‑uù fəərin ven fó Ejiv a? Wù‑uù yiì viŋgaʼnìn ve vinyò, e bóo fəə́r ven fó fo e vitaáví və́ ve ghaʼán ví. Wù‑uù sùm woŋ e ŋgeʼ si, e yiì vinyo ve ví din vitaáví və́, e màʼ rə́r, e kfə̀n yiì, vimbeemè ve vinyò vi koóy, a vèn kù yén e sí yéné.

³⁵ Nyùy Tàr‑iì dìn vinyo vìn e vèn ji vèn fiʼ kìíy ji kù dzə̀ á wun Nyùy, a bó wùmòʼ yòʼ kfə̀n dzə̀.

³⁶ Wù‑uù yiì, vèn yú kisúŋnìn kfə́, a kí sə́y fo yuv, ji wun fiʼ sə̀r a ven, e kfə̀n yiì, vèn yén və́y və́ wo ghaʼáné é nsay fèn, e yù kisúŋnìn kfə́ fó mvə̀m və̀y.

³⁷ Wù‑uù kòŋ atǎr ram vén, e shòʼ rám yév. Wúnwun kitú kfə́ nèn fə̀ə́r ven fó Ejiv e vitaáví və́ ve ghaʼán ví,

³⁸ e jùm vitúm fo věn mbìy, a ví távkír, e shaà ven. A wù‑uù yii bèy ji wun fiʼ lì ven, e nə̀ə́ sho aáwuné nsay, e fò nsay yev ji yéen réŋréŋ mo vèn yén, a kí dzə̀ lán bèn.

³⁹ Vèn kiíy é kishiíy ké lán ki ji Nyùy Tàr dzə̀ á Nyùy, e làa yòʼ wìy mùm, e làysìn. Wù dzə̀ é yuv, e kfə̀n a dzə e nsay, a bó wùmòʼ yòʼ kfə̀n dzə̀.

⁴⁰ Kí nén a dzə jii, vèn kú a yunín sáʼ Nyùyi, a lèm nsər sə́ se m fó e vèn é kishiíy ké lán ki. Lóo lèm, é vishí vén ví wáa bòŋ, é vé ram sén ví wìy a bòŋ sa, é vèn wìy bònen bèʼrí e nsay ye Nyùy Tàr woo Nyùy won fó e vèn ji nsay yen ŋkuuŋkùŋ.»

Ŋkà se laʼ se kilìr seé mbìv Jordan fo shùy yii tó

⁴¹ Mooser nèn lò, e lèm ŋkà se laʼ símóʼ sí sitaár e mbìv Jordan yee fo shùy yii tó,

⁴² ji a wìr sàsìn, e yùyrí wír e kimbùmmbúm, a bó wùn wun yòʼ‑oò yiì ne a bànnìn, wù nyèŋ, e dù a fo. A wù nyèŋ, e dù, a dzə e ŋkàlaʼ yìmòʼ fo see shooy si, bo wù bòy ne a fo kpu.

⁴³ Wù‑uù lèm ŋkàlaʼ yee Beser e rám Rubene, a ŋkàlaʼ rə̀n‑eè dzə̀ é kirə̀ʼ ké woʼ kí, ke dzəə̀n mboʼ gwan, e lèm Ramot woó Gilead e rám Gadi, e nèn lèm Golan wo wù dzəə̀n é Bashan e rám Manassèe.

Shúu fǔ nsər se Mooser‑iì foon e wír veé Israyi

⁴⁴ Yéʼéy Nyùy wùn à nsər se Mooser‑iì foon e wír veé Isray si sìne.

⁴⁵ Wù‑uù fò nsər sìn wùn à vinyo ve Nyùy‑iì tinen ví e wír veé Israyi, a dzə̀ é ghan se vé‑eè fəən fó Ejiv,

⁴⁶ e wìy, a dzə e mbuŋ Jordan, e mbìv yee fo shùy yii tó, e ŋkìʼnìn Bet‑Peor. Fóo dzə̀ nsay Fòn Sihon woó Amor wo wù‑uù dzə́ e Heshbon, wo Mooser wùn à wír veé Israyi‑iì tònèn é ghan se vé‑eè wìyìn fó Ejiv.

⁴⁷ Vé‑eè tòn bey, e nèn yòv nsay rə, e yòv ye Fòn Og woó Bashan. Dzə̀ afon vee abaà vin ve vé‑eè dzə́ e mbìv Jordan yee fo shùy yii tó, sáʼ wír veé Amor.

⁴⁸ Fóo kèʼ fo Aror e ŋguùŋè kiwòóy ké Arnon, e dù, e bàʼ e Gwan Siriyon, aá kù yoŋ sa ji Gwan Hermon.

⁴⁹ Fóo ku nèn dù, e tàtí mbuŋ Araba e dzə̀m, e mbìv Jordan yee fo shùy yii tó, e kù dù bèy, e bàʼ e rìbà ndzə̀v yeé Araba, e dù duùn é sar Gwan Pisga, e mbìv yee fo shùy yii tó.