Remrí 34 - ŊWÀʼ NYÙY

Kpú Mooser

¹ Mooser nèn yiì lò, e ŋàʼáy fo mboʼ yeé Moav, e kòʼ áàgwan veé Nebo, e dù, e bìʼír e ntoò Gwan Pisga. Fóo dzə̀ é ŋkìʼnìn Jeriko, a liysín ndzə́v yee Jordan. Nyùy Tàr nèn dìn wun woŋ wóv e dzə̀m. Wù dìn mbìv Gilead, e dù duùn é taa, e bàʼ e Dan,

² e dìn nsay Navtali wùn à ye Efrayim, à ye Manasse sho e dzə̀m. Wù kfən dìn nsay Juda sho, e dù, e mèé e shùu Rìbà Ndzə̀v woo Mediteranean, e mbìv yee fo shùy yii nəə.

³ Wù dìn sa Negev woo mbìv yee tsə́n, à mboʼ yeé Jeriko e dzə̀m, e kèʼ fo Tsoar, e wìy, e mèé e Jeriko, ye dzəə̀n ŋkàlaʼ vicì vé ten.

⁴ Nyùy Tàr dìn bèy, e yòŋ e Mooser jii, «Á nsay ye mò‑oò kàʼàn Abraham wùn à Aysi, à Jakov sho, e lìʼ ji m wíy fo e rám yéví. M yiì ne, à shóv e sí yée, yii bèy, bó à yòʼ yíi liysín fo.»

⁵ Á bèy, Mooser woo ŋgaà lìm Nyùy Tàr nèn kpù fó e nsay Moav, kù mo Nyùy Tàr‑iì suuyin.

⁶ Nyùy Tàr nèn dzəə̀mè wun e mboʼ yìmòʼ e nsay Moav fèy, e ŋkìʼnìn ŋkàlaʼ yee Bet‑Peor. Yii bèy, e wìy to lán, bó wìr yòʼ kì kileemè kee shó.

⁷ Mooser‑iì kpú, a wù sì kiyá kishóv mbaà é wiì (120), yii bèy, a bó sí rəə́ yòʼ‑oò lò ghàn səə̀né, a bó wún vəə́ yòʼ‑oò lo taàŋè.

⁸ Wír veé Israyi nèn kfə̀n dzə̀ʼtì e mboʼ yeé Moav kishiíy mtaár, e dìy kpú Mooser fo, e meé mo yí‑iì màyìn.

⁹ Bo Mooser wáa kpu bèy, a wù‑uù neèr ne wó rə́ e Joshua woo wan Nun kitu ji wù wíy a dzə a njìlaʼ və. Nyùy Tàr nèn fò vifií ve ghaʼán ví e Joshua. Á bèy, wír veé Israyi nèn a ghvəm wun, a yiì kinyo kidzə̀m ke Nyùy Tàr‑iì yòŋèn e Mooser.

¹⁰ Bó *ŋgaà ntum Nyùy wùmòʼ yòʼ kfə̀n‑eè wìy sìíy, e fəə̀ é Isray moo Mooser wo wùn Nyùy Tàr‑iì súŋnin sùŋnín, yénninè.

¹¹ Bó wìr wùmòʼ yòʼ kfə̀n‑eè ghàn sìíy, a dzə sho wóo yiì viŋgaʼnìn ve vinyò wùn à vimbeemè ve vinyò vi moo ve Mooser‑iì yiìn e fòn woó Ejiv, e yiì aàtǎr ntoʼ vəə́, e yiì e wìr dzə̀m woo fó.

¹² Bó wùmòʼ woo ŋgaà ntum Nyùy yòʼ kfə̀n‑eè yiì ne a dzə wó a ker vitaáví ve ghaʼán ví, vé a yiì kfəə́ se viŋgaʼnìn ve vinyò, à vinyo ve beemén ví vee moo ve Mooser‑iì yiìn e wìr dzə̀m woó Isray si.