Remrí 33 - ŊWÀʼ NYÙY

Mooser səə́ví rám seé Isray

¹ Bo Mooser woo *ŋgaà ntum Nyùy wáa kpu, wù‑uù lòn kisəəvì bìʼ rám seé Isray.

² Wù lòo lon, e yòŋ jii: «Nyùy Tàr‑iì sə̀y fó Gwan Sinay ji wun sə́ vèsən, wù‑uù tò moo shúy fo Edom, e bàn e wír vəə́ kitu. Rán rəə́ ŋwàŋ fo Gwan Paran. Nsheèlav sə́ sí‑iì dzə̀ wùn áwune ansə̀kì ansə̀kì. Wù‑uù kér və́y é kiwo ke yìy kí, a wú baári ji vùŋ vùŋ.

³ Rúrú, Nyùy Tàr koŋ wír və́. Wù kiŋsìn wír və́ adzə̀m, áwune vee wír vee jeéyí. Bìʼ bey, áwune nén a tsəm e wun si, wìr wáa yuurí ntir se wù fó.

⁴ A kù dzə̀ yéʼéy ye Mooser‑iì fó e vèr wùn à nsər si, a dzə̀ vitsə́ʼ vé Isray ve ví shaàn bùʼ e dzə̀m.

⁵ A rám seé Isray si kì bàʼtí sidzə̀m wùn à vilìmbìy vév ví, Nyùy Tàr nèn lò, a dzə fon wìr veé Jeshurun e kishiíy fóo fèy.»

⁶ Mooser yiì lò, a səə̀vì rám Ruben, a yòŋ jii, «Rám Rubene ku wìy shaàrì, e làa yòʼ wìy mày, fə̀m mo áwune wíy a dzə wír ashàr.»

⁷ Ké rám Juda, wù yòŋ jii, «Éè Nyùy Tàr, ku yù tóŋ rám Judàa. Ku yiì, aá kfə́n kijuŋ fo shùu rər, e wìy, e yèn wír vév. Áwune maʼ rə́r, wáy ŋàŋ féyì. Ku sə̀ áwune, aá ton aŋgaà vév vibàn.»

⁸ Ké rám Levi, wù yòŋ jii, «Ku fò Urim wùn Tumim wò e rám Levìi, áwune vee aŋgàa lìm vé vee wír jwáʼa. Wò‑oò lo mùm áwune é Massaa, vèn áwune nə̀ʼnìn e ndzəv seé Meriba.

⁹ Áwune‑eè lo yù sáʼ ye wò‑oò foon, e kù a tiy a dzə̀ e wò *mensàŋ. Tíy bèn, yoŋ aàtàr véví, yoŋ aàyìy véví jii, vèr yòʼ‑oo yén ne ven. Yoŋ e lúmér sév sí jii, vèr yòʼ kì ven. Yoŋ e wóné jii, bó vèr yòʼ‑oò lò ghàn kìíy ven.

¹⁰ Áwune yéʼey rám Jakov kinyo ke à tínenè, yéʼey wír veé Isray, aá lem nsər sé. Áwune kù wíy a tòn kiláy, é kí wáa rə̀ʼtìn wò. Áwune wíy a wìy, a yiì cu si e wò kiy cù.

¹¹ Éè Nyùy Tàr, ku səə̀vì rám Levìi, é yí kúy, a ker bùʼ. Ku səə̀vì lim se áwune lim si sidzə̀m. Ku laàr wir dzə̀m wo wù ŋáʼay, a woŋ wúu yéví, e màʼ aŋgaà vév vibàné, ye bó yòʼ dzə̀ á kfə̀n nànèn.»

¹² Ké rám Benjamin, wù yòŋ jii, «Á rám ye Nyùy Tàr kòŋèn é ŋàŋ. Yí néŋ e Nyùy Tǎr ghaŋ e kiŋsìn. Wun woo Nyùy Tàr géʼsin sho kishiíy ké ndzə kidzə̀m. Wù maʼ kiláʼáy kfə́ aáwuné nsàn, kóyti áwune.»

¹³ Ké rám Joosev, wù yòŋ kév jii, «Nyùy Tàr ku səə̀vì nsay yev, e yiì, é ŋwéʼe wáa gbù sho. Wù ku yiì, é ndzə́v yeé loònsayi wáa meekír, a sə̀v nsay yev,

¹⁴ é shùy wáa ban, é vifá vi wáa bòŋ sho. Wù ku yiì, é ŋwee woo shóo kú a fəə́r və́ vee vifá ve ntay,

¹⁵ é ví wáa tsəə̀tìn aáwuné agwan vee fó yàŋgùʼ adzə̀m, a dzə nyanyày aàŋkoŋ ve á kù sí wìy a tiy fo, e dù, e jòʼsì.

¹⁶ Kí dzə̀ jii, Nyùy wáa kòŋ a nsay Joosev, wun woo Nyùy wo wù‑uù fəəsin é kici, é njà kiliìmé ke və̀y, Wù ku yiì, é nsay yev rún e vifá ve juŋ vi vidzə̀m. Kisəəvì kin kidzə̀m ki kú a gbù e rám Jooseví kitu, bìʼ fo wù‑uù dzəə̀n kilìmbìy ke afə́r və́.

¹⁷ Shúu rə́r Efrayim wùn à wó Manassèe dzə̀ ansə̀kì ansə̀kì. Wú kùʼ, e kfə̀n tàv é ŋàŋ moo ambòŋ vee dzə́ə mbìyi. Mo nyar yii kuur aŋgaà və́ vibàn e loŋ sə́ sí, dzə̀ mo rám Joosevi wíy a kuúr aŋgaà vév vibàn adzə̀m, a kuúy, a dù, a nəʼə́r e ndzəywoŋ.»

¹⁸ Ké rám Sebulun wùn Issakar, wù yòŋ jii, «Sebulun, kú a yu vijuŋ ve way wo à kávnine. Issakar, kú a keŋ kéŋ yée fó laʼ kijuŋ.

¹⁹ Vèn wíy bi wíri, aá wiy ŋkàʼ e věn gwan, é vèn áwune cu Nyùy Tàr e cu ye yí gheen wune. Vèn wíy a koóy vikuʼùy vén fó rìbà ndzə̀v, a koóy bùʼ wo wù laynìn e nsay siy seé shùu ndzəv.»

²⁰ Ké rám Gad, wù yòŋ jii, «Waàwaá, rám Gad, vèn wáa burí Nyùy Tàr. Nyùy Tàr wíy a kòŋ ven, e dzə̀sì nsay yen. Vèn wíy a taa fo moo bvərə̀ʼ, a beʼtí kóy se aŋgaà vén vibàn, a sàʼtì ntáráʼ wov.

²¹ Vèn‑eè tày mbìv nsay ye yì bòŋèn é ŋàŋ, e yòv, vilìmbìy ve ram seé Isray vi báʼtí, e shòʼ kilíŋ ke taà vitu ji kén. Vèn kfə̀n‑eè yii sa kinyo ke Nyùy Tàr taʼà, lem nsər se Nyùy Tàr‑iì foon e wír veé Israyi.»

²² Ké rám Dan, wù yòŋ jii, «Rám Dane dzə̀ ji wan bvərə̀ʼ. Wù meé fo Bashan, wù taàmé aŋgàa vibàn və́.»

²³ Ké rám Navtali, wù yòŋ jii, «Hèʼe, Navtali, à tò sí Nyùy Tàr. Wù maʼ kisəəvì kfə́, kí rùn e wò wùn. Nsay yen ràm fo kibaŋ keé Galeli, e dù, e bàʼ e tsən.»

²⁴ Ké rám Asher, wù yòŋ jii, «Nyùy Tàr ku səə̀vì ven, e shaà rám seé Isray sidzə̀m. Nyùy Tàr wáa ker shíi won, e shaà kibér ke ram sí. Vicí vén vé *oliv vi kú a koóm nyanyày, é vèn wáa ker meŋgvə́r me dzə̀ á wàa bòn bònèn.

²⁵ Ŋkà se laʼ sén sí kú a ker kóŋ sé mfìn, mfìn se á fèrìn e kisha kee wúntí kíwun, e lì kee *brons ki, é vèn kú a neŋ e mvəm wó kishiíy ké ndzə kidzə̀m, là kindzə́m.»

²⁶ Kireé, Jeshurun, bó nyùy wùmòʼ yòʼ kfə̀n dzə̀ moo Nyùy won, Nyùy wo wù tósin yúv, e wìy, e sə ven, shaa e mvə̀m mbàʼ e viwìr vi, e wìy, e yen ven.

²⁷ Nyùy wo wù gòʼòn kàŋ mòʼón dzə̀ kibeey kén kee ŋkuuŋkùŋ. Wù kù wíy a koytí ven e kóy sə́ sí, e wìy dù, e jòʼsì. Wù wíy jùm aŋgaà vén vibàn fo věn mbìy, a jùm bèy, a yòŋ jii, vèn laar adzə̀m.

²⁸ Àwáa, Isray, vèn wáa dzə rì e wún wóné ji nyaáŋ. Kidzəə́y ké Jakov ki wáa dzə kikiŋsìn, a dzə e nsay, a viyíkìr wùn à meluʼ mè tsəətìn fo, a ŋwéʼe sə́y fo yuv, səv nsay.

²⁹ Yímóy Isray, vishí vi bòŋ ven é le ben? Bó kitúm kímóʼ kí yòʼ dzə̀ shó moo ven. Nyùy Tàr kitú kfə́ dzə̀ wun ŋkeè won, a dzə nyùy yen rə̀r. Wù kiŋ ven, yii, a vèn ton vitúm. Aŋgàa vibàn véné wíy a gbù e věn si, a yàʼ, é vèn wáa nyèŋrì áwune nyéŋrin.