Remrí 32 - ŊWÀʼ NYÙY

¹ Aà yùv, aà nsay, vèn yuúrí kinyo ke m yoŋ ki. Vèn yuúrí kijuŋ.

² La yéʼéy yémé kù síri a rə̀sìn moo wuú á, é jí sém sí wáa sə̀v moo ŋweʼ a? Sí kú a fə̀fə̀ mo wuú yii fəfə̀ e viŋgà ve bór vi, a ŋwàʼrì mo yí yii ŋwaʼrì e vikwiíy.

³ M wíy a sùyrì yír Nyùy Tàr. Éè wír Nyùy, vèn wáa binsí vikuʼùy vé Nyùy wòsən ví.

⁴ Nyùy Tàr dzə̀ Kilán, a lim rəə́ dzə̀ là kiloʼ. Dzə́ə sə́ sidzə̀m si kér suuyrú. Dzə̀ Nyùy, a yii rəə́ yii dzə́ yee tìítiy, dzə́ là jay. Yii rəə́ dzə̀, a kù dzə̀ ye ruú, e kfə̀n a dzə yee réŋé.

⁵ Yii bèy, Isray yiì ne kinyo ke bi kí e Nyùy Tàr. Á bèy, bìʼ jay wov, á yòʼ kfə̀n dzə̀ə́ wón və́. Áwune dzə̀ vé liì kisaŋ, a dzə̀ aŋgàa kimboʼtì.

⁶ Á mo a kì dzə̀ vèn lòvtí e Nyùy Tàr ben à? Vèn dzə̀ viyúŋ vé wíri, e kfə̀n a dzə anjìʼ. Kí dzə̀ wun Tàr won, a dzə̀ wun Ŋgaà Mbóm won. Bó yòʼ kù‑uù fèr wun ven ji kitúm à?

⁷ Vèn kuúmé ghán sé mbìy si, e kwàʼtì viyá ve ŋgwàʼ se sí‑iì shaàn ne. Vèn dzə́tí áàtàr véné, aá naari e vèn. Vèn dzə́tí e ŋgày sé wìr si, é sí fer vinyo veé yàŋgùʼ e vèn.

⁸ Taà Vitu‑uù jàv nsay e wìr msòŋ, e fò ye kitum kee shó. Kù‑uù sìysì wun fo bìíy sév sí shaàn, e lèm vitúm e kitu kitu mo vifá veé yuv ví dzəə̀n.

⁹ Yii bèy, Nyùy Tàr kitú kfə́, dzə̀ wun Nyùy wìr və́. Dzə̀ wun Nyùy wìr veé Isray ve dzəə̀n rám Jakov.

¹⁰ Nyùy Tàr kù‑uù yèn Isray, aá ghán, ján e tím woʼ. Wóʼ, a shwér wo tavíné shaa fo. Wù‑uù kìŋsìn áwune, e gèʼ shó, réŋréŋ mo wìr gèʼ e wàn si və,

¹¹ a geʼ aáwune mo lùŋ wo wiy yii géʼ e wóné. Wù yii yimrì wón fó laʼ, wù kù a feŋ, a kaarí e wóné kitu, lo, wù soòrí, á dzə̀ʼə̀m e wun vàv, wù wàa beʼ.

¹² Kù‑uù tsəə̀né Nyùy Tàr Isray, e tsəə̀né wùn mòʼón, bó nyùy kitum kímóʼ kí yòʼ‑oò ló a dzə, e bóo sə wun.

¹³ Wù‑uù yiì, áwune wáa taa e virə̀ʼ vé agwan, a yi kéŋ ye yí tsəətìn fo, a naá meŋgvə́r fó vici ve ví boʼrì e nsàn se vilan, kfə̀n a yi mfuʼ fo nsàn se vilan.

¹⁴ Wù‑uù lìy áwune e nyèbàm, e lìy e vín bvəyi, e yìír e nyàm bvəy, e yìír e ye nàʼ. Nyám si, aá líy ben e mbòŋ e ŋgvən Bashan. Wù kfən yìír e meŋkfəŋ me sàŋ yee *wit me juŋ mè, e nòór e meluʼ me juujùŋ mè.

¹⁵ Yii bèy, Jeshurun yíkír, e fàŋ, a ŋàʼ. Wù fáŋ, e rùn, a nə̀ʼ nə̀ʼə̀n. Lòo nə̀ʼ, e bìn ndzə̀m e Nyùy. Wù‑uù ŋwày Ŋgaà Mbom və, e màʼày Ŋgaà Lùŋèr və woo Kilán kfə́.

¹⁶ Áwune‑eè tìnsín Nyùy aànyùy vitum ve vé‑eè ghvə́mée, joonè wóví yiì, kilòŋ kfə́ kí shwiíy, koŋ ye wù‑uù koŋ áwuneé máy.

¹⁷ Áwune‑eè shaà Nyùy, a cù a dzə̀ viyoy ve ví gháné ji anyùy. Anyùy, aá tó shó afíy, a bó atàr véví yòʼ‑oò lò ghàn sìíy, e ghvə̀m.

¹⁸ Áwune‑eè bìn ndzə̀m e Nyùy woo Kilán kév, e làysìn wun wo wù‑uù fəərin áwune é kitu ke nsay.

¹⁹ Nyùy Tàr yén, kí nyár wun, a wón və́ vee vilume ghíʼ wun, a vee vikìyí tínsin wun. Wù nyáŋsí áwune, e shwèy.

²⁰ Nyùy Tàr nèn sùúy e Isray jii, «Vèn dzə̀ ŋgwàʼ liì kisaŋ, a bó m yòʼ dzəə́ tíy e věn kinyò. Bó m yòʼ kfə̀n dzəə́ yiì a sə ven. M yíi koʼ a dzə̀ ŋkiy, a leéy mo kí yíi a kìʼ e věn kitu.

²¹ Vèn tìnsín ne mo e mebvə̀m men mè. Kifá kisáŋ, a vèn yoŋ ji nyùy, a bó kinyè kí yòʼ dzə̀ shó. Á bèy, m wíy bùʼ wír ve á yoʼ mèé e kitum, é vèn wáa yu nyár yév. M wíy koʼór ambuʼŋgàŋ, é vèn wáa shwiíy kilòŋ.

²² «Dòʼshwíiy wom wíy baarí ji və́y. Wú wíy tòn kifá kidzə̀m ke kí kúyí, e tòn bèn, e dù, e meé e loònsay. Wú wíy tòn kifá kidzə̀m, a kinsə̀ŋ ke agwan ki wíy bò.

²³ M wíy màʼ ŋgeʼ ye tavín e věn kitu, e màʼ ŋkòʼ mvə̀n yem, é yì may e věn kitu.

²⁴ Vèn wíy kpu yé jiŋ, e kpu yé kinjàʼ. Vèn wíy kpu wó ayàsí ve biibií. M wíy tsənsí nyám se bi sí, é vèn áwune tám, e tsənsí yó se ndzəʼ si, é sí wáa terí ven.

²⁵ Wónlě nsùm wùn à wónlě ŋgòne, e lì wón ve bóri wùn à ŋgày sé wìr si, á wíy a yuyrí áwune é màdzəə̀, é kindzə́m kí wáa yuy e věn melav.

²⁶ Mò‑oò rə̀m ji m lo, e taʼár ven, e tsənsí e virə̀ʼ vee kwaʼda, e laàr laàrìn féyì fo wìr kfən wìy kuùmé ven.

²⁷ Yii bèy, m kfə́n a fàn jii, aŋgaà vén vibàné wíy a saà a wún, a yòŋ jii, tòn a áwune ven ben, bó yòʼ tòn a mo woo Nyùy Tàr. Yii bèy, a kù tòn mo və̀n.»

²⁸ Isray dzə̀ kitúm, a kí yòʼ kér vifií. Kí yòʼ kì jeéyjeéy fó vinyò.

²⁹ A vé‑eè kér vifií, bo vé‑eè lo kìíy kinyo kìn, bo á kù‑uù kìíy mo kí wíy a kìʼ aáwuné kitu fo bàm.

³⁰ A dzə̀ wir rə̀r e mòʼón, wù tòn wír nsə̀kì a? A dzə̀ abaà wìr, tàʼár wír nsə̀kì e ghvə̀m a? Àáyiì, la wáa dzə ji Nyùy Tàr woo Kilán kér màʼày ne ver, e wày áàŋgaà vér vibàné wo.

³¹ Kév kee kilán ke á yoy, tiir sho ki kù dzə̀ anyùy vév, a bó yòʼ dzə̀ á fìʼsìn wùn à kér kee Kilán ke dzəə̀n Nyùy wor kí. A fə̀m dzə̀ áwune vee aŋgàa vibàn vér, bo á kù kì kee shooy.

³² Aŋgàa vibàn vérí kù dzə̀ ji rám Sodom wùn Gomorra, á dzə̀ ji vitiír vé *vayin ve ví koom báŋ se ndzəʼ si, koom a dzə̀ tútúʼ wo wù shíʼir ji ŋáʼ.

³³ Meluʼ me á fer fo fo mè dzə̀ ji ndzəʼ búv, e kfə̀n a dzə ji ndzəʼ yò mbàm.

³⁴ Nyùy Tàr yoŋ jii, «M kù wíy a kuumé kinyo ke wìr vìy. Kí kù dzə̀ e mǒ kitàv ké lèm.

³⁵ Kù wíy siìr mo ŋkfə́tír, a maʼ mo ŋgeʼ e wírí kitu. Wír vìyi kù lo, e sàsìn, e lèrìr, e gbù. Kishiíy kév ké ŋgeʼ ki sì fó mentsə̀m, a ŋgeʼ se tavkín sí kù lo, a nyoòrì.»

³⁶ Fo ké wìr və́ veé Isray ki, Nyùy Tàr kù wíy bìn nsaʼ yev, e sham mendzən me aŋgàa lìm və́. Wù wíy yen, a bó wìr yòʼ dzəə́ kér kitar, yén, aá kpú ne, a mày, kìn dzə̀ kwàn, kìn wan nsay, é bo wù yii kinyo kìn.

³⁷ Á bèy, é Nyùy Tàr nèn a ghay e Isray jii, «Anyùy véné bèé lèn? Kilán ke vèn‑eè yéʼti sho ji kí kiŋsìn ven kí bèé?

³⁸ Kí áwune‑eè rə́si yí vidzə̀ vé cù yén, nó cu yén melùʼ. La áwune si lò lèn, e sə̀ ven á? La áwune si wìy, a kìŋsìn ven á?

³⁹ «Vèn yén ri lèn, dzə̀ mo, a kù mày mo Nyùy. Bó Nyùy wùmòʼ yòʼ kfə̀n dzə̀, e shaà mo. Kù lo, yùyrí mo wír, a kù siì fó mo dzəʼə̀m e wìr. Kù lémer mo wír, a kù kfə̀n fer mo. Kinyo ke m wayin ji m kù‑úù yii, bó yòʼ dzə̀ wìr sə̀r.

⁴⁰ M nén a nàn wó yém é yuv, a yi kilìʼ, a kàn kitú kém jii, mo m dzəə̀n shó e tin, e wìy dù, e mày, m kù yíi siìr ŋkfə́tír.

⁴¹ M wíy baày nyùy yem rə̀r, maʼ kiwó sho, é m tínén nsaʼ tìítiy. M wíy siìr ŋkfə́tír áàŋgàa vibàn vémé kitu, e màʼ ŋgeʼ e wír ve á ban moó.

⁴² Mvən sém sí wíy a dzə mensə́ mensə́, a dzə̀ me aŋgaà vém vibàn, é nyùy yem rə̀r wáa shàm jav wìr wo wù kinèn kinyo kém. Á yòʼ wíy bavtí wír wo á koon é shùu rər. Á wíy yuyrí adzə̀m, e tatí ataátú ve kitú ki bùyìn ne.»

⁴³ Haà vitum, vèn wáa wùʼtì wír Nyùy Tàrí. Ŋkfə́tír wov dzə̀ e Nyùy Tǎr kiwo. Wù wíy màʼ ŋgeʼ e wìr dzə̀m wo wù yúyri wír və́, e laamé aŋgàa vibàn və́, a dzə̀ e jiv. Laáme, é wù mán ajay wìr və́, e tàŋrí nsay yev.

⁴⁴ Mooser wùn Joshua woo wan Nun ku nèn rèmrí jí se lùŋ sìn, e kù rèm é naáy naáy ji wír veé Israyi wàá yú.

Ntir Mooser kinjòʼsìbàm

⁴⁵ Mooser màysì, e fò jí se Nyùy sìn sidzə̀m e wír veé Israyi,

⁴⁶ e yòŋ aáwune jii, «Vèn ku wày ŋàŋ, a lèm vinyo vidzə̀m ve m tiirin e věn wùn lán və̀n. Vèn kù wíy a tir wón vén shó, aáwune ku yèn ji á lem á nsər sìn sidzə̀m, a yiì réŋréŋ mo yéʼéy Nyùy Tàr rə́ne dzəə̀n.

⁴⁷ Bó nsər sìn si yòʼ dzə̀ kilélé kén. Dzə̀ dzəʼə̀m yén féyì feyì. Vèn lóo lèm, é vèn wìy bònen shìíy e nsay ye vèn líysin ndzə́v yee Jordan, e yòv.»

Mooser wíy kpu e Gwan Nebo

⁴⁸ Nyùy Tàr lò, e yòŋ e Mooser e kishiíy fóo fèy jii,

⁴⁹ «Dù é mbìv agwan vee Abarim, e nsay Moav fèn, e kòʼ é Gwan Nebo wo wù dzəə̀n é ŋkìʼnìn Jeriko. À kóʼó, à nèn lèéy woŋ Kanan wo m fó e wír veé Israyi ji vitsə́ʼ vév.

⁵⁰ À yíi kpu e gwan foo fèy, e dù, e tatí atàr vé mo fər wò woo Aaron‑eè kpuun é Gwan Hor, e dù, e tàtí atàr vén.

⁵¹ Kí dzə̀ bey, bìʼ fo bó vèn wun yòʼ‑oò lo yùnín mo e wír veé Israyí si, aá dzə̀ é ghaa ndzəv yee Meriba, e ghaa ŋkàlaʼ yee Kadesh, e woʼ yee Tsin. Vèn yòʼ‑oò lo ghvə̀m mo moo Nyùy e wír veé Israyí si.

⁵² Bo dzə̀ ji à yíi màʼ a dzə̀ sí, e yen woŋ və̀n yénén. Yii bèy, a bó à yòʼ yíi liysín, e nəə́ e nsay ye m fó e wír veé Israyi.»