Remrí 30 - ŊWÀʼ NYÙY

Isray kfə̀n wíy lò, a dzə wír Nyùy Tàr

¹ Mooser kfən yòŋ e wír veé Israyi jii, «Vinyo ve m neèrìn e věn si vi dzə̀ vibaà, kisəəvì wùn à lòné. Kí nén a dzə jii, wíy lòo dzə, a vinyo ve m yòŋèn vin vi koóy ne ven vidzə̀m, a vèn dzə̀ é vitum fo Nyùy Tàr woo Nyùy won tsənsin ven, é vèn nèn kuùmé kinyo ke vèn‑eè shoʼon.

² A vèn kuùmé bèy, vèn à wón véné lo, e kfə̀n é bàm, a yunín Nyùy Tàr woo Nyùy won shilív shidzə̀m, e fò kitú kén shó, a lèm nsər sə́ se m fó e vèn lán sìn,

³ bo Nyùy Tàr woo Nyùy won wíy rər mendzən men, e baʼtí ven fó vitum vidzə̀m vee fo wù‑uù tsənsin ven. Báʼti, é wù siir vikuʼùy vén fó.

⁴ A vèn fə̀m‑eè dù é ndzəywoŋ, a fə̀m dzə̀ feé, bo Nyùy Tàr woo Nyùy won kù wíy ròn ven fó fo, e banén, e kfən sho e bàm.

⁵ Nyùy Tàr woo Nyùy won wíy siìr ven é nsay ye atàr véné‑eè kérí, é vèn yov, a wù wíy bùʼ ven, é vèn wáa ker bùʼ e ŋàŋ, e kfə̀n a dzə wír nyanyày, e shaà mo atàr véné‑eè dzəə̀n.

⁶ Nyùy Tàr woo Nyùy won wíy naŋsín melív men, e naŋsín me ŋgwàʼ sén, e yiì, é vèn wáa kòŋ wun shilív shidzə̀m, e fo kitú kén shó, e wìy bonén, e shiíy.

⁷ Wíy lòo dzə e ghan fóo fèy, é Nyùy Tàr woo Nyùy won nèn siìr lòn vən e dzə̀m, a dzə̀ áàŋgaà vén vibàné kitu, wir dzə̀m wo wù ban ven, dzə wúu yén.

⁸ Vèn dzə̀ kén, aá kfə̀n wíy a yunín Nyùy Tàr, a lèm nsər sə́ sidzə̀m se m fó e vèn lán və̀n.

⁹ Nyùy Tàr woo Nyùy won wíy səə̀vì ven, é vinyo ve vèn yii vidzə̀m vi wìy a ghan kijuujùŋ feyì, e səə̀vì kidzəə́y kén, à ké nyàm sén kí, à ŋgoòy sén sé vifa si. Kí dzə̀ bey, bìʼ fo Nyùy Tàr kfə̀n wíy a tiír vifií e věn wùn, kù mo wù‑uù tiir aàtàr véné wùn.

¹⁰ Nyùy Tàr kù wíy a səə̀vì ven bey, a vèn fen wìy kfə̀n, e yèn wun woo Nyùy won shilív shén shidzə̀m, e fò kitú kén shó kidzə̀m, a yunín wun, a lèm nsər sə́ wùn à vinyo ve wù tinen ví, ve á saŋen é Ŋwàʼ Nsər fèn.

Nsər se Nyùy si yoʼ tàv é ŋàŋ

¹¹ «Nsər se m fó e vèn lán sìn si yoʼ ghàʼ fo vèn wáa kiíy nsàv, a bó sí yòʼ gháʼ fo vèn wáa lèm.

¹² Bó sí yòʼ dzə̀ é yuv fo vèn wiy a yòŋ jii, ‹A dzə̀ kòʼ la fó, e lì, e wìy, e yèn ver shó ji vèr wáa yu, a yiì?›

¹³ Sí yòʼ dzə̀ sá e ndzə̀n rìbà ndzə̀v wùmòʼ fo vèn wìy a yòŋ jii, ‹A dzə̀ lìysín la ndzə́v, e lì, e wìy, e yèn ver shó, é vèr yú, a yiì?›

¹⁴ Àáyiì, sí kù dzə̀ e věn mentsə̀m, a dzə e věn shuù, e kfə̀n a dzə e věn meliv ji vèn fíʼ a lèm.

Vèn shóʼ a dzə̀ luŋe

¹⁵ «Vèn leéy, m neer vinyo e věn si lán və̀n ji vèn shóʼ ke á shóʼó, a ví dzə̀ jii, luŋ wùn à vijuŋ vi, kìn kpú wùn à lòné.

¹⁶ A vèn wìy a lèm nsər se Nyùy Tàr woo Nyùy won se m fó e vèn lán və̀n, a kòŋ wun, a ghan e wun mbòv, a lèm nsər sə́, a yu sáʼ rə́, a yiì vinyo ve wù tinen, bo vèn wíy dzə̀ʼə̀m ntàmda, e kfə̀n a dzə wír nyanyày, é Nyùy Tàr woo Nyùy won nèn wìy səə̀vì ven é nsay ye vèn du, e nəə́ sho, e yòv.

¹⁷ Yii bèy, a melív men mè wìy bìnkìr, la vèn yòʼ a yunín Nyùy Tàr, vèn bin ndzə̀m e wun, a ghvəm anyùy kisaŋe, a lìm fo áwune,

¹⁸ bo m yoŋ e vèn é kishiíy ké lán ki ji á kù wíy laàr a ven láarin, a bó vèn yòʼ wíy dzə̀ʼə̀m ntàmda e nsay ye vèn líysin ndzə́v yee Jordan, e nəə́ sho ji vèn yov.

¹⁹ M bí yúv wùn à nsay e kishiíy ké lán ki ji anjen kinyò ke m neer e věn si ji vèn shóʼ ke á shóʼó, a ví dzə̀ jii, luŋ, kìn kpú, kisəəvì, kìn lòn. Bo dzə̀ ji vèn shóʼ á luŋ, é vèn à ŋgwàʼ sén sí wìy bònen shìíy.

²⁰ Kù dzə̀ ji vèn kú a kòŋ Nyùy Tàr woo Nyùy won, a yunín wun, e kù lùm a dzə̀ wun, e kpù shó. Kee shooy ki sì luŋ fo vèn, à dzəʼə̀m ye dáa, a kí wíy yiì, é vèn bónén, e shìíy bèn, e kòŋrí e nsay ye Nyùy Tàr‑iì lìʼìn ji wun wíy fo aàtàr vén vee Abraham wùn à Aysi, à Jakovi.»