Remrí 3 - ŊWÀʼ NYÙY

Wír veé Israyi tón Fòn Og

¹ Mooser kú a shaà fo mbìy, a suúy jii, «Vèsən màysì bèy, e bìnkìr, e kìʼ kuy, e kòʼ, e dù, e bàʼ e Bashan. Á meé fó, Fòn Og fəə́ wùn à shúu rər vəə́ e dzə̀m, e taàmé vèsən e rə́r sí é Edreyi.

² Nyùy Tàr yòŋ e mò jii, ‹Lá à yòʼ fàn wun, m wày ne wun wùn à wír vəə́ adzə̀m, à nsay rə e wò kiwo. Yiì shó mo wò‑oò yiìn e Sihon woo fon woó Amor, wo wù‑uù dzə́ e Heshbon.›

³ Á mo Nyùy Tàr‑iì wayin Og woo fon woó Bashan wùn à wír vəə́ adzə̀m e vèsə́n wo bèy. Wù wáy, vèsən teè áwune, la kintiʼ ke wìr ki yòʼ bèr.

⁴ «Vèsən‑eè tòn mbìv Argov e dzə̀m e Bashan ye Fòn Og‑iì sáʼá, e faàsì ŋkà se laʼ sə́ sidzə̀m, la yìmòʼ yòʼ bèr. Sí‑iì dzə̀ mntuùfú.

⁵ Ŋkà se laʼ sìn sidzə̀m si‑iì kér vikum ve kày ve darkìn ví, kér shuu se kày, aá taá nshìy si fó mvəm e visha vi, e bóo lì ntèʼ se sí‑iì dzəə̀n là kay.

⁶ Vèsən‑eè laàr áwune, kù mo vé‑eè laàrìn Sihon woo fon woó Heshbon. Vèsən‑eè laàr ŋkà se laʼ sidzə̀m, e laàr vilum wùn à vikìy, à wóné.

⁷ Á laàr bèy, e nèn kùúy nyám sidzə̀m wùn à kéŋ yév yeé ŋkà se laʼa ji nsàʼmboʼ.

⁸ «Á mo vèsən‑eè faàsìn nsay afòn veé Amor vee abaà é ghan fóo fèy, a dzə̀ afon ve vé‑eè dzə́ e ndzə̀n Jordan, e mbìv yee fo shùy yii tó. Vèsən nèn yòv nsay yev, e kèʼ fo kiwoóy ké ndzəv yee Arnon, e dù bèn, e bàʼ e Gwan Hermon.

⁹ (Wír veé Sidone yoŋ Gwan Hermon ji Siriyon, a wír veé Amori yoŋ kév ji Gwan Senir.)

¹⁰ Vèsən‑eè faàsì nsay ye Fòn Og woó Bashan‑eè sáʼá e dzə̀m, a dzə̀ jii, ŋkà se laʼ seé mboʼ gwan wùn à nsay Gilead, à ye Bashan. Vèsən faàsì bèy, e dù, e bàʼ e ŋkàlaʼ yee Saleka wùn à yee Edreyi.»

¹¹ (Fòn Og‑iì dzə̀ kinjòʼsìbàm ké wìr woó rám Refayim. Ŋkùv və sày‑iì dzə̀ wo tìy, a wù‑uù dzə̀ kóy e baà e ntàm si sibaà fó vida, a mbvə̀ʼ dzə̀ kóy e fur. A dzə̀ á yèn é Rabba wo dzəə̀n ŋkàlaʼ wìr veé Ammon.)

Kijav ke nsay keé mbìv yee fo shùy yii tó

¹² Mooser kú a shaà fo mbìy, a suúy jii, «Vèsən‑eè sə̀ woŋ və̀n bèy, m tóʼtí, e fò mbìv yìmòʼ, e rám Ruben wùn à yé Gadi. Virə́ʼ vin vi dzə̀, e lò fo ŋkàlaʼ yee Aror e ghaa kiwoóy ké ndzəv yee Arnon, a kfənér e mbìv yee kuy, e lì kintoʼnìn ke wòŋ agwan woo Gilead, à ŋkà se laʼ see fó si.

¹³ Fo kintóʼ ke rám Manasse ki, m fó kibér ke kirə̀ʼ keé Gilead wùn à Bashan e dzə̀m. Kù dzə̀ fo Fòn Og‑iì saʼan, a dzə̀ ji woŋ Argov e dzə̀m.» (Á kù‑uù yám kiiy nsay Bashan e dzə̀m ji woŋ wìr veé Refayim.

¹⁴ Wìr woó ram Manasse, aá yoŋ ji Jayir nèn yòv woŋ Argov e dzə̀m wo dzəə̀n Bashan. Wù yòv bèy, e dù, e bàʼ mo bìíy Geshur wùn Maakat duùn, e ndzə̀y. Wù nèn shù ntèʼ sí a dzə̀ meŋkfə́m mvə. Á kù dzəə́ kiiy fó, e to lán ji ntèʼ sé Jayir.)

¹⁵ Mooser kú a shaà fo mbìy, a suúy jii, «Mò‑oò fó Gilead e kfə́ə Makir woo wír woó ram Manasse,

¹⁶ a m fó ne kirə́ʼ kee kèʼ fó Gilead, e dù e kiwoóy ké ndzəv yee Arnon e rám Ruben wùn à yé Gadi. Bìíy yev yee tsə́n nén a dzə nshwǎn ndzəv yee Arnon. Bìíy yee kuy nén a dzə kiwoóy ké ndzəv yee Jabbok, a dzə̀ bìíy wùn à wír veé Ammone.

¹⁷ Fo mbìv yee fo shùy yii nəə, bìíy ràm see sitaár sìn, wáa dzə, e dù, e bàʼ e ndzəv yee Jordan. Yì kèʼ fo kibaŋ keé Galeli, fo mbìv yee fó kùy, e sə̀y é Jordan, e dù, e bàʼ e Ndzə́v Shiŋgwaŋe, e mbìv yee tsə́n, e nèn dù, e ndzə̀y e sar Gwan Pisga, e mbìv yee fo shùy yii tó.

¹⁸ «Wáa dzə e ghan fóo fèy, m fó sáʼ, e sùúy aáwune jii, ‹Nyùy Tàr woo Nyùy wòsən fò ne nsay yeé mbìv Jordan ye yì kiʼ fo shùy yii tó ji vèn yov. Lèn, vèn baʼri shúu rərí, e tsə̀nsí e ndzə̀n Jordan fèsə, é wú du, a tiy e mbìy rə̀r, e fíʼ sə afə́r vén vee Isray, aáwune yov yéev yee nsay.

¹⁹ Kù lo, e gòʼ vikìy vén wùn à wóné, à nyám si é bàm, a dzə e ŋkà se laʼ se m foon e vèn. M kì ji vèn kér nyám si nyanyày.

²⁰ Vèn kù kér fóo sə afə́r vén, e dù, e meé mo áwune wíy yòv nsay ye Nyùy Tàr fó aáwune é ndzə̀n Jordan, e mbìv yee fo shùy yii nəə. Kí kù wíy a dzə bèy, e meé mo Nyùy Tàr wíy yiì, aáwune wáa dzə fo ji nyaáŋ mo wù yiìn e vèn é mbìv fen. Kee shooy ki shaa, bo a dzə̀ vèn kfə̀nkír é mbìv fen, e nsay ye m toʼtin e vèn.›

²¹ «M kfə̀n‑eè yòŋ Joshua e ghan fóo fèy, a suúy sho jii, ‹À yèn ne kinyo kidzə̀m ke Nyùy Tàr woo Nyùy wòsən yiìn áàfon vee abaà vee Sihon wùn Og. Wù kù yíi yiì bèy e vitúm vi vidzə̀m veé mbìv Jordan yee fo shùy yii nəə mo vèn du.

²² Lá vèn yòʼ fàn áwune, bìʼ fo kù yíi a fùnèn Nyùy Tàr woo Nyùy won, a fo e vèn.›

Nyùy Tàr tén fo Mooser nəə́ é wòŋ woo Kanan

²³ «M nèn lò, e bùnrì, e lòn Nyùy Tàr é ghan fóo fèy, e sùúy jii,

²⁴ ‹Éè Nyùy Tàr woo Taà Ndzə, à kèʼ kèʼèn, a dìn viŋgaʼnìn vé ve vinyò wùn à vitaáví vé vi e mò woo ŋgaà lìm wò. Bó Nyùy wùmòʼ yòʼ dzə̀ shó e yuv, kìn é nsay, wo dzə̀ wù yiì kfə́ə vinyò vímóʼ ví, à viŋgaʼnìn ve vinyò vi moo vé.

²⁵ Kii wò, ku màʼtì, é m líysín ndzə́v yee Jordan, e kfə̀n é ndzən fésə, e yèn nsay yee fó ye juŋ, e yèn woŋ agwan wo wú boŋkìrì, e yèn sá Lebanon.›

²⁶ «Yii bèy, Nyùy Tàr shwiíy kilòŋ vèr wun bìʼ ven, e tèn fóo kfə̀n yuurí kinyo kém. Wù lò, e yòŋ e mò jii, ‹Kí gheén bey, á yen fóo kfə̀n gaʼ kinyo kùm kee shoon.

²⁷ Kóʼ é kitu ke Gwan Pisga, e màʼ sí yée é mbìv yee fo shùy yii nəə, ǎ mbìv yee kuy, à yee tsə́n, à yee fo shùy yii tó, e shòv woŋ woo shooyi. Leéy ri kijuŋ, bìʼ fo à yòʼ yíi liysín ndzə́v yee Jordan rə̀n.

²⁸ Yii bèy, ku ghàr Joshua, e bànrí wun, e tàvír, bìʼ fo yíi dànèr wun wír veé Isray vìn, aá líysín ndzə́v yee Jordan, é wù dzəʼər áwune, aá yov nsay ye à lo, e yen.›

²⁹ «Kee shooy ki shaà, vèsən ku nèn gòʼ e mboʼ, e ŋkìʼnìn Bet‑Peor.»