Remrí 28 - ŊWÀʼ NYÙY

Séʼ woo bìʼ yúnín

¹ Mooser yòŋ e wír veé Israyi jii, «A vèn wìy a yunín Nyùy Tàr woo Nyùy won, e wày ŋàŋ ji á wáa lèm nsər sə́ sidzə̀m se m fó e vèn lán və̀n, bo Nyùy Tàr woo Nyùy won wíy koʼór ven, e bùʼ, e shaà vitúm veé kitu ke nsay vidzə̀m.

² A vèn fen wìy a yunín Nyùy Tàr woo Nyùy won, bo wù kù wíy a səə̀vì ven é vinyò ve vèn yii vidzə̀m.

³ «Nyùy Tàr wíy a səə̀vì lim yén e dzə̀m yeé mvə̀mlaʼ, à yeé kwaʼa.

⁴ «Nyùy Tàr wíy a səə̀vì ven, aá wáa dzəə́, a səə̀vì súm sén, é vifá vi wáa kuy sho, a səə̀vì nyám sén, é nàʼ wùn à bvə́y si wáa dzəəkír.

⁵ «Nyùy Tàr wíy a səə̀vì vifá ve vèn lìmèn, é vèn wáa kav nyanyày, a ker vifá ve yi kijuŋ.

⁶ «Nyùy Tàr wíy a səə̀vì vinyo ve vèn yii vidzə̀m, é ví wáa dù kijuŋ.

⁷ «Nyùy Tàr wíy tòn aŋgaà vén vibàn e věn si. Á lóo wìy ji á ghíʼ ven, bo á kù yíi bvəə́rí, a leʼkír, é wìr wáa tùr dzə́ə rə.

⁸ «Nyùy Tàr wíy màʼ kisəəvì e věn wùn, e màʼ e věn vitàv, e màʼ e kifa kidzə̀m ke vèn yii. Wù wíy səə̀vì ven é nsay ye wun woo Nyùy Tàr woo Nyùy won fó e vèn.

⁹ «A vèn fen wìy a lèm nsər se Nyùy Tàr, a ghan e wun mbòv, bo wù kù wíy a màysì, a yiì, é vèn wáa dzə və́ vee wír, a dzə̀ ji wír vee jeéyí, kù mo wù‑uù kàʼàn.

¹⁰ Á bèy, é wìr dzə̀m woó kitu ke nsay nèn a yen ji vèn dzə̀ féyì a ji wír Nyùy Tàr. Lóo yen, aá wáa fàn ven.

¹¹ «Nyùy Tàr wíy səə̀vì ven é ŋàŋ é nsay ye wù‑uù kàʼàn atàr vén ji wun wíy fo e vèn. Səəvì, é vèn táv é kidzəə́y, é nyám sén sí kfə́n a dzəəkír kijuŋ, é nsay yen wáa fəə́r vifá ve yi nyanyày.

¹² Wù wíy mvə̀ʼ shúu yuv, e fo ven wuú é ghan se juŋ si. Wù wíy səə̀vì lim sén sidzə̀m. Vèn wíy a foòr vitúm vinín mbàm, yii bèy, a bó vèn yòʼ wíy dù mfoòmé fo kímóʼ kí wùn.

¹³ «Nyùy Tàr wíy tiír ven mbìy fo vitúm vi, a vèn yòʼ wíy a jùmrì kímóʼ kí. A vèn fen lèm nsər sə́ se m foon e vèn lán, bo vèn yíi a kuy kuyín, e làa yòʼ dzə́ə wìy kfən e bàm.

¹⁴ Lá vèn yòʼ wìy shòʼór nsər yìmòʼ fo se m fó e vèn lán si. Lá vèn yòʼ a bìnbìn, e dù, a ghvəm anyùy ámóʼó, a lìm fo áwune.

Seʼ kitu ke tavín kí

¹⁵ «Yii bèy, a vèn wìy tèn fó a yunín Nyùy Tàr woo Nyùy won, e lò, a ŋway sáʼ rə́, a ten fó a lèm nsər sə́ sidzə̀m se m fó e vèn é kishiíy ké lán ki, bo lòné wíy nəə́ ven, é vinyo ve bi ví sum ven.

¹⁶ «Lǒn Nyùy Tàrí wíy shov lim yén yeé mvə̀mlaʼ, à yeé kwaʼa e dzə̀m.

¹⁷ «Lǒn Nyùy Tàrí wíy shov súm sén, é vèn wáa buŋ vifá ve yi.

¹⁸ «Lǒn Nyùy Tàrí wíy shov kidzəə́y kén, é vèn wáa ker wón ashàr, e shov nsay yen, é la vifá ve yi vi yòʼ a bòŋ sho, e shov ŋgoo sén sé nyàm, wùn à sé bvəy si, é vifá vìn vi wáa ker wón ashàr.

¹⁹ «Nyùy Tàr wíy shov vinyo ve vèn yii vidzə̀m.

²⁰ «A vèn wìy lò, a yiì liì kisaŋ, e ŋwày Nyùy Tàr, bo wù wíy màʼ lòn e věn kitu, e yiì, é vèn wáa tùʼtìn, a yen ŋgeʼ e kifa kidzə̀m ke vèn yii, e meé mo vèn wíy lò, e sàsìn, e rèŋ, e mày ŋkuuŋkùŋ.

²¹ Wù wíy tsənsí yàsí, e tom yàsí e věn kitu, e meé mo wù wíy laàr wir dzə̀m fo nsay ye vèn du, e yòv.

²² Nyùy Tàr wíy tsəm ven áàyàsí ve á túmsinèe, e tsəm e kinjàʼ wùn à vintokìr vi, à lum ye ghaʼáné, e yiì, é wuú táv é yuv, e tsənsí shwér wo yumérí, e laàr vifá vén vé yi ve ví kúy e sum. Vinyo vìn vi wíy ròn ven, e meé mo vèn wíy rèŋ, e mày.

²³ Bó wuú yòʼ wíy shem e nsay. Nsay yen kù wíy tavtí moo kisha.

²⁴ Nyùy Tàr wíy tsənsí a dzə̀ kibvər wùn à síy si fó yuv ji wuú, é vifá vìn vi sə́y e věn kitu, e meé mo vèn wíy rèŋ, e mày.

²⁵ «Nyùy Tàr wíy yiì, áàŋgaà vén vibàné ton ven é shùu rər. Vèn wíy tám e shùu rər ŋgoo mòʼón, aá lo, e bvəə̀rí, a leʼkír, é wìr wáa tùr dzə́ə rə. Vitúm vidzə̀m vi yéné, é shúu yúm áwune bìʼ kinyo ke kí kooyin ven.

²⁶ Vèn wíy kpukír, é menə́n wùn à nyám se kwaʼ si wáa sàʼ dzə́n sén, a bó wìr yòʼ wíy a dzə sho wóo jùm.

²⁷ Nyùy Tàr wíy tsəm ven e yàsi vinto woó Ejiv wùn à viváv ví, à vintàŋ vi, à kinjùr ki, a bó yòʼ dzə̀ á fèr.

²⁸ Nyùy Tàr wíy tsəm ven e kibaá ki, e tsəm e vimfìr vi, e tsəm e kighaanè ki.

²⁹ Fə́m wíy lóo dzə e shùy, é vèn kú a ghaà virə́ʼ gháan, e làa yòʼ a yen dzə́ə moo mfìr wo bó wù yòʼ kiiy jeéyjeéy fo shùy wùn à vitsə́ʼ ví. Kifá ke vèn yii kidzə̀m, vèn yòʼ wíy lùŋ fo fo. Wíri kù wíy a nə̀ʼsì ven nə́ʼsin, a shoŋ ven shóŋén, a wìr wóo sə ven yòʼ wíy a dzə.

³⁰ Wìr wíy tàʼ wiíy, yii bèy, é wìr wo sən wáy é lav. Wìr baʼrì lav, é la wù yòʼ tèʼ kitú sho. Wìr wíy a bìy súm vitiír vé *vayin, a bó wù yòʼ wíy kòy báŋ fo fo.

³¹ Á wíy seerí anàʼ vén e věn si, a bó yòʼ dzə̀ wìr lùʼ kintín e shuù. Á wíy faàsì vimbèʼbìy vén, a dù sho bèn, a vèn yéné, aá yòʼ wíy kfən sho, e siìr e vèn. Aŋgaà vén vibàné wíy kuúy bvə́y sén, a wìr wóo sə ven yòʼ wíy a dzə.

³² Á wíy tayrí wón vén vee vilum wùn à vee vikìyí, e dù sho e kitum kímóʼ kí ji akwàn, a vèn wíy a kiy dzə́ə kishiíy ké ndzə kidzə̀m, e kiy bèn, e dorkír ji á leey áwune, a bó vèn yòʼ dzəə́ wìy yen.

³³ Kitúm ke bó vèn yòʼ‑oò yiì ne kìíy ki kù wíy a kav vifá ve vèn ndzə̀ʼnìn, e lìm, é kén kí ku mày nə̀ʼsì wùn à kwiiròn wo vèn wíy a tuŋ, là meemè.

³⁴ Vèn wíy lóo yen mo á nəʼsì ven, é vifií ví wáa lày ven.

³⁵ Nyùy Tàr wíy tsəm ven e yàsí vinto, e kèʼ fo ŋkoŋ si, e dù e sar se wuù, e kfə̀n koʼ, e bàʼ e ntoò kitu.

³⁶ «Nyùy Tàr wíy tatí vèn à fòn wo vèn lèmèn, e tsənsí e kitum ke vèn yòʼ‑oò yiì ne kìíy, a fə̀m dzə̀ atàr vén, bo á yòʼ‑oò lo kìíy. Vèn du fo, aá wáa ghvəm anyùy ve á fèrìn e kicí kí wùn à ve á fèrìn e tíyí.

³⁷ Vèn wíy lò, e kfən ji kimbemèr, aá wáa te lám e vèn, é vèn kfə́n ji kifá ke nshéʼmé ki fo kitúm ke Nyùy Tàr liìn ven, e màʼ fo ki.

³⁸ «Vèn wíy way ŋgoòy se vifa e kwaʼ nyanyày, yii bèy, ví kúyí, é ŋguùmé sí ndzəə́y, é vèn káv shishàr.

³⁹ Vèn wíy bìy súm vitiír vé vayin, e bonén naŋsín, yii bèy, é koʼòr sí lá, a bó á yòʼ wíy kòy báŋ fo fo, e bóo jòkìnyàʼ ji á nó meluʼ me á fer fo fo.

⁴⁰ Vèn wíy a ker vicí vé *oliv, woŋ wón e dzə̀m, yii bèy, e làa yòʼ a ker meŋgvə́r me dzə̀ á fə̀m sòr wún shó, bìʼ fo vicí ví wíy a fə̀ʼ, a kuùy.

⁴¹ Vèn wíy a dzəə́ wón vee vilum, à vee vikìyí, yii bèy, a yòʼ wíy a dzə vén. Á wíy a kuúy, a dù sho ji akwàn.

⁴² Ŋguùmé sí wíy ndzəə́y vicí vén vidzə̀m, e laàr vifá ve yi.

⁴³ «Viŋgwìy ve ví dzə́ vèn áwune ví kù wíy a tsəə̀tìn tsəə̀tìn e bùʼ, e kfə̀n a ker vitaáví, é vèn kú a tàn kén tánen, é vitaáví vén ví wáa mày màyìn.

⁴⁴ Áwune wíy a foòr ven mbàm, a bó vèn yòʼ wíy foòr áwune. Áwune wíy a saʼ ven, é vèn wáa neŋ aáwuné sar.

⁴⁵ «Lòn vən e dzə̀me wíy koo ven, e kù a jùmrì ven, e meé mo wú wíy laàr ven ŋkuuŋkùŋ, a kù dzə̀ bìʼ fo bó vèn yoʼ yùnín Nyùy Tàr woo Nyùy won, e lèm nsər sə́ wùn à vinyo ve wù tinen, e yòŋ e vèn ví.

⁴⁶ Vinyo vìn vi wíy koóy, é wáa dzə kisəəm wùn à kinsətìshuù ke kinyò ki, ke Nyùy dìnèn e vèn à rám yéné kitu.

⁴⁷ Kí wíy a dzə bèy, bìʼ fo, mo Nyùy Tàr woo Nyùy won fə̀m‑eè foon ven nyanyày vifa, bó vèn yòʼ‑oò ló a ghvəm wun e kishéʼrì ki, aá yòʼ‑oò ló a ghvəm wun e shilív she juŋ shi.

⁴⁸ Kí nén a dzə jii, vèn wíy a lìm fo aŋgaà vén vibàn ve Nyùy Tàr wíy tsənsí, aá ton vené. Vèn wíy a tooŋé jíŋ, a kpu kilòŋ ke yumén kí, a dzə kilor, a ghiy ghiyín é mvə̀m kitàn. Wù wíy yiì, aá wáy fáŋ kishàa e věn kilòŋ, e meé mo á wíy laàr ven.

⁴⁹ «Nyùy Tàr wíy tsənsí kitúm, é kí lo ntàmda fo ndzəywoŋ, e səy, e gbù e věn kitu moo lùŋ wo wiy. Wíy a dzə kitúm, a vèn yòʼ yú lám wóv.

⁵⁰ Wíy a dzə wíri, a dzə̀ vé tàkìŋàʼa, ve bó á yòʼ kiiy ŋgàywìr, e bó a rər mendzən me wánlè wo terí.

⁵¹ Áwune wíy sàʼ nyám sén sáʼan, e laàr vifá ve yi vén, e meé mo vèn wíy rèŋ, e mày. Á yòʼ wíy ber kifá e vèn, kìn dzə̀ ŋgoòy kifa, kìn meluʼ, kìn meŋgvə́r, kìn wan nyàm, kìn wan bvəy, kù bey, e dù, e meé mo á wíy səʼsí ven, é vèn kpúkír.

⁵² Á wíy sùm ven e věn ŋkà se laʼ sidzə̀m, kù bey, e meé mo vikum ve kày vén ve vèn yoy, tiir sho vi wíy səy, e mày. Kí kù wíy a dzə bèy e věn ŋkà se laʼ sidzə̀m, a dzə bèy, woŋ wón e dzə̀m, wúwun wo Nyùy Tàr woo Nyùy won foon ne e vèn.

⁵³ «Á wíy sùm ven bey, é ŋgeʼ si nəə́, é vèn wáa dzə e nsòv, e meé mo vèn wíy tooŋé jíŋ, e lò, a kfər wón vee vitó vén, wón vén vee vilum, à vee vikìyí, ve Nyùy Tàr foon e vèn.

⁵⁴ A fə̀m wìy a dzə lumèn e věn mvəm, a wù kér shilív she juŋ shi é le, e kfə̀n a ker liì, bo wù kù wíy lò, a tooŋé, yée kàm kifá ke yi fo fər və, e kàm fo wiiy və woo wun mbuùy kikùn, e kàm fo wón vəə́ ve á dzəə́ bér e wun kiwo.

⁵⁵ Bó wù yòʼ wíy biimé, e fo wír vìn shintinìn she wan wo wù kì kfə́rí, bìʼ fo bó wù yòʼ kfə̀n kér kifá ké a yòy, a tiír sho, mo aŋgàa vibàné sùmèn ne ŋkà se laʼ sidzə̀m, wíri wáa dzə e nsòv.

⁵⁶ A fə̀m wìy a dzə wiíy e věn mvəm, a wù tókirì, aá kfən lìy kijuŋ moó le, wiíy wo bó yòʼ dzə̀ féyì, wù biìmé kiwuú kí kùm nsay, bo wù kù wíy kàm fo lum və woo wun mbuùy kikùn, e kàm fo wan və woo lumèn, e kàm fo woo wiíy.

⁵⁷ A fə̀m dzə̀ vifá ve wan ve ví fəə́ e wǎn bàm, à wàn wo wù dzəən, bo wù wíy lìr, a kfər wùn mòʼón, bìʼ fo wù yòʼ kfə̀n kér kinyo kée yiì, mo aŋgàa vibàné sùmèn ne ŋkà se laʼ sidzə̀m, wíri wáa dzə e nsòv.»

⁵⁸ Mooser nèn yòŋ jii, «Vèn ku wìy a yunín yéʼéy Nyùy Tàr rən, a ŋeèvì nsər se sí dzəə̀n é ŋwàʼ fèn sidzə̀m, a yiì mo sí dzəə̀n. A vèn dzə̀ là fó a ghvəm yír Nyùy Tàr woo Nyùy won, a wù dzə̀ e gháʼtín, e kfə̀n a dzə e beémén,

⁵⁹ bo wù wíy tsənsí virom ve wiy ví, é ví sum vèn à wón véné. Virom vìn vi wíy dzə̀r, e kfə̀n shaàrì, a wíy a dzə yàsí wo wù beéme, wo bó yòʼ dzə̀ á sə̀r.

⁶⁰ Wù kfə̀n wíy tsənsí sa ayàsí veé Ejiv adzə̀m ve vèn‑eè fanè, aá nəə́ ven ŋkuuŋkùŋ.

⁶¹ A dzə̀ yàsí e dzə̀m wùn à ŋgeʼ si se á yoʼ wày é Ŋwàʼ Nsər fèn, bo Nyùy Tàr kù wíy tsəm ven shó, e meé mo vèn wíy rèŋ, e mày.

⁶² Fə̀m mo vèn‑eè dzəə̀n nyanyày moo mejiy meé yuv, wíy bòy ashàr wìr, bìʼ fo bó vèn yòʼ‑oò lo yùnín Nyùy Tàr woo Nyùy won.

⁶³ Mo Nyùy Tàr‑iì keerin shií wó a yiì, é vèn wáa yu vijuŋ, e kfə̀n a yiì, é vèn wáa kùʼ, bo kù dzə̀ mo Nyùy Tàr wíy keerí shií wóo laàr ven, e səʼsí, e meé mo wù wíy tuŋ ven, e fəə́r fo nsay ye vèn sí du, e nəə́ sho ji á yov.

⁶⁴ «Nyùy Tàr wíy taʼár ven e vitúm vidzə̀m ví mvəm, e kèʼ fo buu ndzə wúmóʼó, e dù, e bàʼ e wúmóʼó, a vèn wíy dù, a ghvəm anyùy ámóʼó ve á fèrìn e kicí kí, wùn à vé á fèrìn e tíyí. Dzə̀ anyùy ve vèn yòʼ‑oò yiì ne kìíy. Fə̀m atàr vén, bó áwune yòʼ‑oò lo kìíy sa.

⁶⁵ Bó vèn yòʼ wíy a ker nyaáŋ é vitum foo fèy, a bó vèn yòʼ wíy a laatí e kirə̀ʼ ji kén. Á bèy, Nyùy Tàr kù wíy way kindzə́m e věn shiliv, a vèn yòʼ wíy a gwàrìr kinyo, é shilív shí kú a ndzəʼ ven ndzə́ʼə́n.

⁶⁶ Vèn kù wíy a meŋnín dzəʼə̀m yén meŋnín, à shùy, à vitsə́ʼ. Kù wíy a dzə shiiykìʼ, a bó vèn yòʼ kfə̀n wíy a kiíy mo dzəʼə̀m yéné dzəə̀n.

⁶⁷ Lóo dzə kijàvndzə, é vèn wáa rə̀m jii, ‹Kì yée fo wáa dzə e ŋkuùr.› Lóo dzə e ŋkuùr, é vèn wáa rə̀m jii, ‹Kì yée fo wáa dzə kijàvndzə.› A kù yii kindzə́m ke kí tó e věn meliv, à kifá ke vèn yén ki kidzə̀m.

⁶⁸ Á bèy, é Nyùy Tàr nèn wìy wày ven é vikoŋ veé ndzəv, e tsə̀nsí e bàm é Ejiv, fə̀m mo wù‑uù yòŋèn ne ji bó vèn yòʼ kfə̀n dzəə́ wìy siíy, e ghan kfə́ə ghan yee ben. Vèn du fo, é vèn wáa fiìnè vitú áàŋgàa vibàn véné ji akwàn vee vilum, à vee vikìyí, là aŋgàa yun.»