Remrí 26 - ŊWÀʼ NYÙY

Á wáa cù Nyùy e ŋgòn se vifa si

¹ Mooser kú a shaà fo mbìy, a yòŋ e wír veé Israyi jii, «Vèn wíy nəə e nsay ye Nyùy Tàr woo Nyùy won fó e vèn ji vitsə́ʼ vén, dzəʼə̀m fo,

² vèn kù a lì vifá vee káv mbìyi, ve vèn lìmèn é nsay ye Nyùy Tàr woo Nyùy won fó e vèn, a way e ŋkaà, a dù sho e kirə̀ʼ ke Nyùy Tàr woo Nyùy won wíy shoʼ ji á wáa ghvəm wun fo.

³ Wìr du sho, é wù yén taà cù wo wù lim e ghan fó, e yòŋ sho jii, ‹M tuúne e Nyùy wóm si e kishiíy ké lán ki jii, m nə̀ə́ ne e nsay ye Nyùy Tàr‑iì kàʼàn atàr vér ji wun wíy fo e vèr.›

⁴ «Á bèy, é taà cù nèn sə̀ ŋkaà fo wun kiwo, e tìír e mbìy kiy cù woo wó Nyùy Tàr woo Nyùy won.

⁵ Tiirì, é ŋgaà vifa nèn a remrí jí si e Nyùy Tàr woo Nyùy wón si, a yòŋ jii, ‹Tàr à ràm yém‑eè dzə̀ wír woó Aram wo wù‑uù ghán e yuv, e lò fo Kanan wùn à kfə́ə e shàr, e sə̀y é Ejiv, e nèn yàm fó yámén, a dzə kitúm ke wiy kí.

⁶ Wír veé Ejivi nèn wìy lò, a nə̀ʼsì ver é ŋàŋén, a màʼ ŋgeʼ ye tavín e věr kitu.

⁷ Vèr nèn tòŋ e Nyùy Tàr woo Nyùy atàr vér kitávín, wù yú tóŋ yér, e yèn ŋgeʼ sér, à nə̀ʼsì, à ŋkáymé wo á káy ver.

⁸ Wù‑uù dìn visəəm vé vitaaví və́, e yiì viŋgaʼnìn ve vinyò, e fə̀ə́r ver fó Ejiv e vitaáví və́ ve ghaʼán ví.

⁹ Wù nèn lì ver, e wìy sho fèn, e fò nsay rə̀n e vèr. Nsay, a vín nàʼ wùn à vilu vi tsəətìn sho tsə́ətin.

¹⁰ Haà, Nyùy Tàr, m nén a wìy lèn e mbìv ŋgòn se vifa yìmòʼ yeé nsay ye à foon e mò rə̀n.› «Wù yoŋ bèy, é wù ku nèn tìír ŋkaà e Nyùy Tǎr si, a sheʼrí wun.

¹¹ Á mo vèn kù wíy a yiì bèy, a sheʼrí vifá ve juŋ vi vidzə̀m ve Nyùy Tàr woo Nyùy won foon e vèn à kfə́ə yéné, é vèn à wír veé ram Levìi, à viŋgwìy ve ví dzə́ e věn mvəm ví wáa yi, a sàvnìn.

¹² «Wíy lóo dzə e kiya ke nsùʼ ke dzəə̀n kiyá ke kí mee ji taár kidzə̀m, vèn fò nsùʼ a dzə̀ kirə́ʼ kimòʼón fo vee ghvə̀m vi, e kù a fo bèy e wír veé ram Levìi, à viŋgwìy vi, à wón tsə̀ə́, à vikǐy ŋkfəə, aáwune fíʼ a yikír e věn ŋkà se laʼ, a kur.

¹³ À yii bèy, à nèn sùŋnín e Nyùy Tàr woo Nyùy wón si jii, ‹M fə̀ə́r ne nsùʼ wo dzəə̀n mbìv yè fo mǒ lav, a m fò ne e wír veé ram Levìi wùn à viŋgwìy vi, à wón tsə̀ə́, à vikǐy ŋkfəə, kù mo nsər yè ye à yòŋèn e mò dzəə̀n. Bó m yoʼ shòʼór nsər yè yìmòʼ, a bó m yoʼ làysìn yìmòʼ.

¹⁴ Bó m yòʼ‑oò lo yì kifá fo fo e ghan se mò‑oò diy kpú. Bó m yòʼ‑oò lo fə̀ə́r kifá fo fo, a m dzə̀ e *kifàn kí é wùn, kìn ji m li mbìv yìmòʼ, e tàŋrí ŋkfəsày sho. Rúrú, Nyùy Tàr woo Nyùy wom, m kù yùnín ne ji yè, e kù yiì vinyo vidzə̀m réŋréŋ mo wò‑oò yòŋèn ji m yii.

¹⁵ Màʼ sí yée fo wò laʼ yeé yuv, fo wò kirə̀ʼ ké dzə ke ranén kí, e səə̀vì wír vé veé Israyi wùn à nsay ye à foon e vèr mo wò‑oò kàʼàn atàr vér shó. Nsay, a vín nàʼ wùn à vilu vi tsəətìn sho tsə́ətin.› »

Wír ve dzəə̀n wír Nyùy Tàr

¹⁶ Mooser naàrì bèy, e sùúy jii, «Lán və̀n, Nyùy Tàr woo Nyùy won yoŋ ji vèn wáa yu a sáʼ rə́, a yiì a kinyo ke wù tínenè. Á bèy, é vèn ku nèn a yiì shilív shén shidzə̀m, a fo kitú kén shó kidzə̀m.

¹⁷ Lán və̀n, vèn bìnsí ne e shuu wóné ji Nyùy Tàr dzə̀ á Nyùy won, e kàʼ ji vèn wíy a ghan a e wun mbòv, a yu sáʼ rə́ wùn à nsər sə́ sí, à vinyo ve wù tínen vi, e kfə̀n a yunín jí rə.

¹⁸ Lán və̀n, a Nyùy Tàr yòŋ ne kùm ven ji vèn dzə̀ á wír və́ ntayi mo wù‑uù kàʼàn ven, e yòŋ ji vèn wíy a lèm a nsər sə́ sidzə̀m.

¹⁹ A kí kfə̀n dzə̀ jii, wù wíy koʼór ven, e bùʼ, e shaà vitúm ve wù‑uù bomen vidzə̀m, aá wáa burí ven, a ghvəm ven, é leŋ wóné wáa dù. Vèn wíy a dzə kén wír vee jeéyí ji vé Nyùy Tàr woo Nyùy won, mo wù‑uù kàʼàn.»