Remrí 23 - ŊWÀʼ NYÙY

Wír ve bó yòʼ dzə̀ á tàtí wír Nyùy

¹ Mooser kfə́n a suúy jii, «A dzə̀ wír wo á bvəʼtin ne báŋ sə́, kìn dzə̀ ji á tìn wún və́ vilum, lá wù yòʼ nə̀ə́ e kintatì ke wìr Nyùy Tàr.

² «Lá wan wo á dzəən é ndzə yòʼ wìy nə̀ə́ e kintatì ke wìr Nyùy Tàr. Lá wìr woo kùm wun yòʼ wìy nə̀ə́ sa, e wìy dù, e meé e ŋgwàʼ ye yì meen ji ghvə̀m.

³ «Lá wìr Ammon, kìn wir Moav yòʼ wìy nə̀ə́ e kintatì ke wìr Nyùy Tàr. A fə̀m wìy a dzə, e dù, e meé e ŋgwàʼ ye yì meen ji ghvə̀m, lá wìr woo kùm áwune yòʼ wìy nə̀ə́ e kintatì ke wìr Nyùy Tàr, e wìy dù, e mày.

⁴ Kí dzə̀ bey, bìʼ fo áwune‑eè tenen fóo fo ven vifá ve yi wùn à mendzə́v mè e dzəə, e ghan se vèn‑eè fəən fó Ejiv, a kfə̀n dzə̀ sá bìʼ fo vé‑eè beèn Balaam woo wan Beor fo Petor, e Mesopotamia, ji wù shóv ven.

⁵ Yii bèy, la Nyùy Tàr woo Nyùy won yòʼ biìmé ji wù shóv. Nyùy Tàr woo Nyùy won nèn siìr shóv yee shooy ji kisəəvì kén, bìʼ fo wù‑uù koŋ ven.

⁶ Kí nén a dzə jii, e wìy dù, e meé mo vèn wíy a dzə ji kitúm, lá vèn yòʼ wìy sə̀ áwune é kifa, kìn ji á tóm áwune, aá du fó mbìy.

⁷ «Lá vèn yòʼ wìy a nyàʼ wir Edom, bìʼ fo dzəə̀n afə́r vén. Lá á yòʼ nyàʼ wir Ejiv, bìʼ fo vèn‑eè dzəə̀n viŋgwìy aáwuné wòŋ.

⁸ A dzə̀ wón vév ve á dzəən é ŋgwàʼ ye yì meen ji taár, bo dzə̀ á nə̀ə́ é kintatì ke wìr Nyùy Tàr.

Á kú a lèm kiláʼáy ké vé rər kiránén

⁹ «Vèn wíy du ji vèn aàŋgaà vén vibàné tám é shùu rər, lóo dzə e věn kilaʼáy, vèn kìm vitú vén fó kifa ke *kifàn kí kidzə̀m.

¹⁰ A wìr lò, a dzə e kifàn kí é wùn, e věn mvəm ji bìʼ fo njèm ye shoòŋ kì shiin wun vitsə́ʼ, bo wù fəə́ fo kilaʼáy, e bàr wún, e dzə̀ʼtì, e làa yòʼ wìy e mentsə̀m me kilàʼáy.

¹¹ Wù dzəʼtì bèy, lóo dzə a shùy sí tóŋri, é wù su wún. Shùy nəə, é wù nèn kfə̀n é bàm é kilaʼáy.

¹² «Vèn wíy shoʼ kirə́ʼ kímóʼ kí é kwaʼ, aá fəə́sín ne kiláʼáy, fo a dzə̀ wìr dù kishwáŋ, kìn wù du, e jiìyì.

¹³ Wìr lóo way vifá ve rər, wù kù tàtí kicí shó, lóo dù kishwáŋ, é wù li, e tùŋ bií shó. Du kishwáŋ, é wù nèn bìnkìr, e sə̀tí.

¹⁴ Vèn kú a yiì bèy, bìʼ fo Nyùy won yii ghán e věn kilaʼáy ji wun wáa sə ven, a way aŋgàa vibàn vén e věn kiwo. Bo dzə̀ ji vèn kú a lèm kiláʼáy kén kiránén fo wù yén kifá ke kifàn kí e věn mvəm, e bìn ndzə̀m e vèn.»

Nsər símóʼ sí jeéy jeéy

¹⁵ Mooser kfən yòŋ jii, «A kwàné nyèŋ fo tàr wov fó wòŋ wúmóʼó, e wìy, e beè wir Isray, ŋgaàŋ wàa yen fóo siìr e bàm e tàr wov.

¹⁶ Vèn ku màʼtì, é wú wáa dzə e věn mvəm, e ŋkàlaʼ ye wú yíi shoʼ ji fóo bòŋ a wun. Lá vèn yòʼ a nə̀ʼsì.

¹⁷ «Lá wìr Isray woo lumèn, kìn woo wiíy yòʼ a dzə sàkì woó virə̀ʼ vé cù.

¹⁸ Lá wìr yòʼ wìy wìy e mbàm se wù kavin fó visàkì si e Nyùy Tàr woo Nyùy wón lav cù ji bìʼ ŋkàʼmé və, kìn dzə̀ mbàm se kavin wiíy, kìn se lumèn fiìnèn kitú kfə́ shó. Vinyo vee shooy vi kóʼoy Nyùy Tàr.

¹⁹ «Lá wìr Isray yòʼ wìy foòr fə́r və mbàm, kìn vifá ve yi, kìn dzə̀ ka, e dzə̀r séʼ e kitu wo.

²⁰ A dzə̀ wù dzə̀r séʼ e viŋgwìy vi, yii bèy, a dzə̀ wir Isray, lá vèn yòʼ mùm, e dzə̀r séʼ e wun. Vèn lóo yiì bèy, é Nyùy Tàr woo Nyùy won wáa səə̀vì vinyo vén vidzə̀m e nsay ye vèn wíy nəə́ sho, e yòv.

²¹ «Wìr wíy yii ŋkàʼmé ji wun yíi yiì kinyo bìʼ Nyùy Tàr woo Nyùy won, lá wù yòʼ laàtí fóo yiì kíwun. Nyùy Tàr woo Nyùy won kù shiy ji wù yii mo wù kàʼàn. Wìr wáa dzə, e làa yòʼ yiì, bo dzə̀ kinyo ke bi kí.

²² Yii bèy, aà dzə̀, e làa yòʼ kàʼ, lá à yòʼ a ker dzə̀rkìtu.

²³ Wìr kù kér fó yiì kinyo ke shuu vəə́ kàʼàn, bìʼ fo wù kàʼàn Nyùy Tàr woo Nyùy və é kimbòŋwùn.

²⁴ «Wìr lóo shaà e wìr mvə̀m sǔm vitiír vé *vayin, a báŋ si koóm shó, a wù koŋè, wù yì mo wù kòŋèn. Dzə̀ cáʼ ji lá wù yòʼ wày á kifá e kibàm.

²⁵ Wìr lóo shaà e wìr súm saŋ, a wù koŋè, wù tìnrí vitú e kiwo, e kfə̀r mo wù kòŋèn. Yii bèy, lá wù yòʼ tìn ji wun beʼey, e dù sho.»