Remrí 22 - ŊWÀʼ NYÙY

Nsər símóʼ sí

¹ Mooser kfə́n a suúy jii, «A wìr Isray yèn, a nàʼ, kìn bvəy fər və ghán, jáné, lá wù yòʼ tèn yén, e yàr fó koo, e siìr e fər və.

² A ŋgaà nyàm yee shó lò, a dzə kwaʼda, kìn dzə̀ ji wù yòʼ kì ŋgaàŋ, wù kù lì, e lèm e wun laʼ, a ker, e meé mo ŋgaàŋ yíi a tàʼ, a wìy, é wù nèn fò shó.

³ Kù dzə̀ sá mo a dzə̀ wìr yiì e kimbèʼbìy kí, kìn dzə̀ ndzə̀y, kìn dzə̀ kifá ke fər və kee ka, ke kí làyìn. Wìr tó shó, lá wù yòʼ yàr fó lì, e fo sho.

⁴ «A wìr Isray wìy lòo dù, e yèn, a kimbèʼbìy ké fər və kí gbú, kìn gbù nàʼ, lá wù yòʼ yàr fó sə wun. Wù kù sə̀ wun, é wùn wun nan.

⁵ «Lá wìr woo wiíy yòʼ wìy màʼ kifá ke maʼ vilum, é la lùmèn yòʼ wìy màʼ ndzə̀y sé vikìy, bìʼ fo wìr wo wù mum kee shooy dzəə̀n ŋgaà joònè e Nyùy Tàr woo Nyùy wón si.

⁶ «A wìr wìy tò é laʼ shinə̀n, kìn yí dzə̀ é kici, kìn é nsay, e yèn a wóné dzə̀ shó, kìn dzə̀ wúm, a shinə́n shí kúʼtí, lá wù yòʼ koò wán wùn à kiyìy kí.

⁷ À lóo koo wóné, à kù màʼtì kiyìy, é kí du. À yii bèy, bo à wíy a ker kisəəvì, a dzə kijuŋ, e kfə̀n bonén, e shiíy.

⁸ «Wìr bóm lav ye fíy, wù fèr kay e kitu ke káy lav, e kaàrí sho, é yí fíʼ a teʼtín fo wìr lo, e gbù fo fo, é ŋgaà lav wiy e njò mensə e wun lav.

⁹ «Lá wìr yòʼ wìy lì ŋgoòy kifa yìmòʼ, e wày é súm vitiír vé vayin. A wù mùm, bo báŋ se vitiír vé vayin wùn à vifá vee shooy vi tàtí ne, e shwì kitú, a bó yòʼ dzə̀ wù kfə̀n yì.

¹⁰ «Lá wìr yòʼ wìy lì nàʼ wùn à kimbèʼbìy kí, e tàtí, e kùr, a lìm lim sho.

¹¹ «Lá wìr yòʼ wìy a màʼ ndzə̀y se á baan é kinshwir e làv woo wúy njiì wùn à woo və̀y.

¹² «Vèn wíy a səə́y vijéréŋ é ndzə̀y se vèn taar fo yuv, aá wíy a səə́y, a dzə̀ é kor woo kweè.

Fo lum lo, a roòmè wiíy

¹³ «A wìr wìy kòóy wiíy, wùn wun shiíy, ŋgaàŋ yiì lò, a nyaŋsí,

¹⁴ a yòŋ vinyo ve ví wáa shoór wun, a bivír yír rə́, a suúy jii, ‹Mò‑oò lì wiíy və̀n, vèr wun shiíy, m táʼ kisəəm ke kí din ji wù yóʼ ne kìíy lumèn ntéŋ.›

¹⁵ Wìr yii bèy, bo tàr à wiíy wùn yìy à wiíy yíi lì ndzə̀y seé kikun se sí kér kisəəm kee ji wan wov‑iì dzə̀ á e fur, e dù sho fo atǎr ntèʼé yii tínen nsaʼ, e màʼ aáwuné si.

¹⁶ Á du, é kitàr ké wan kí naari fó jii, ‹Mò‑oò fò wán wom e wìr və̀n ji wiíy, wù nen lò, a nyaŋsí.

¹⁷ Wù lò ne lèn, a toy wun e vinyò ve ví wáa shoór wun, a suúy ji wun yoʼ sìíy, e yèn á kisəəm kee ji wan wom yóʼ ne kìíy lumèn. Vèn yén ri kisəəm kee ji wan wom‑eè dzə̀ e fur ki.› Wù suuy bèy, aá nèn sàŋrì ndzə̀y seé kikun áàtǎr ntèʼé si.

¹⁸ Saŋrì, áàtǎr ntèʼé nèn lì lumèn və̀y, e wùŋ virə́ʼ fó fo.

¹⁹ Aá kfən yòŋ, é wù soŋ kishóv, e làʼ *kisha ke mbàm ke fəvír kí *ashekel wií, aá fó e taà wàn, bìʼ fo ŋgaàŋ foon yír ye bií e wàn wìr Isray. Wù fó, é wan woo wiíy və̀y ku nèn a dzə wíiy və bey, a bó yòʼ dzə̀ wù kfə̀n wìy sìíy, e jùm.

²⁰ «Yii bèy, a kí kòóy rú ji kisəəm kee ji wan woo wiíy‑iì dzə̀ e fur ki búŋ,

²¹ bo á li wán, e dù sho e kitàr kí shùu lav, é vilum veé ŋkàlaʼ foo fèyi tsə́mrí e tíy sí, e yùyrí, bìʼ fo wù kì kiiyin lumèn, a wù dzə̀ə́ e tàr wóv lav, e wìy e nshoórsí e wír veé Israyí mvəm. Á ku yiì bèy, e fíʼ tuŋ liì kisaŋ, e fəə́r fo věn mvəm.

Nsər see kùm kinyo ke wiíy wùn lumèn

²² «A wìr lò, a lì wiíy wìr, á koó, bo á kù yúyri áwune adzə̀m. Á kù yúyri lumèn woo shooy, e yuyrí wiíy. Á ku yiì bèy, e fíʼ tuŋ liì kisaŋ, e fəə́r fo wír veé Israyí mvəm.

²³ «A wánlè wiíy lò a dzə, aá nəə́ ne, wìr lo, e tò é wùn wó e ŋkàlaʼ, e ghàtí,

²⁴ bo á li áwune, e fəə shúu kày ŋkàlaʼ sho, fəə́, aá tsə́mrí e tíy sí, e yùyrí. Aá yúyrí wiíy, bìʼ fo bó wù yoʼ lò bùʼ shirəə́ ji wìr sə́ wun, fə̀m mo wù kì dzəə̀n é ŋkàlaʼ, e yuyrí lumèn, bìʼ fo wù shoʼorin nsər, e lì wiiy fər və. Á ku yiì bèy, e fíʼ tuŋ liì kisaŋ, e fəə́r fo věn mvəm.

²⁵ «Yii bèy, a lò a dzə wánlè wiíy, a vé‑eè nə̀ə́ ne, lùmèn tó é wùn wó e kwaʼ, e ghàtí fo, bo á kù yúyrí a dzə̀ lumèn woo shooy.

²⁶ Fo ké wánlè wiíy ki, é la á yòʼ yiì kinyo sho, bìʼ fo wù yoʼ yiì kinyo ke dzə̀ á yùyrí wun yúyrín. Kinyo kìn ki dzə̀ moo ké wìr wo wù bamen fə́r və, e yùyrí.

²⁷ Á kì ghàtí wán woo wiíy wo vé‑eè juùrìn ne ghátín é kwaʼ, fə̀m mo wù kì rəə́me ji á sə́ wun, wìr wóo sə wun yòʼ kì dzə̀.

²⁸ «A lùmèn tò e wánlè wiíy wùn, aá yóʼ ne juùr, e ghàtí, á koó,

²⁹ bo lùmèn woo shooy laʼ juu e kitàr ké wan kí kisha ke mbàm ke fəvír kí ashekel mtàn, é wù nèn a dzə wíiy və. Kí dzə̀ bey, bìʼ fo wù‑uù ghatin wun ghátín e vitaáví ví, a bó yòʼ dzə̀ wù kfə̀n wìy sìíy, e jùm.

³⁰ «Lá wìr yòʼ wìy shòór tàr wov, e lì wiíy tàr wov ji və́ə, kìn ji wù shiíy shó.»