Remrí 18 - ŊWÀʼ NYÙY

Vidzə̀ vé atàá cù

¹ Mooser yòŋ e wír veé Israyi jii, «Rám Levi e dzə̀m ye kù dzəə̀n ji rám atàá cùu yòʼ wíy a ker nsay e Isray. Kév kí dzə̀ ji á wíy a fo mbìv sé cù se sí du e Nyùy Tàr aáwune.

² Áwune yòʼ wíy a ker nsay aàfə́r véví mvəm moo rám símóʼ sí. Nyùy Tàr sì vév vee vitsə́ʼ mo wù‑uù kàʼàn áwune.

³ «Wìr wiy e cúu, kìn dzə̀ nàʼ, kìn bvə́y, bo mbìv atàá cù dzə̀ kóy wùn à búbúʼ sí, à bvə́me.

⁴ Vèn kfə̀n wíy a fo ŋgòn se vifa ve á kavin wùn à meluʼ me mbìy mè, à meŋgvə́r me mbìy mè, a wúy njiì yee kóm mbìyi aáwune.

⁵ Nyùy Tàr woo Nyùy won‑eè shòʼ áwune fo věn ram sí sidzə̀m ji á wáa tiím e wùn si ji atàá cù, a lìm fo wun, e wìy dù, e mày.

⁶ «A wìr woo rám Levi wìy lò fo věn ŋkàlaʼ yìmòʼ é nsay Isray, kìn dzə̀ rəné fo wù dzə́, a kòŋ ji wun wiy é kirə̀ʼ ke Nyùy Tàr wíy shoʼ,

⁷ bo dzə̀ wù dù fó, a lìm e Nyùy Tàr woo Nyùy və́ yir mo afə́r və́ ámóʼó veé ram Levìi limè.

⁸ Wù wíy a ker kifá ké a yi réŋréŋ mo kí dzəə̀n fó kijàv, e bó a tatí ke kfə́ə rəə́ fiìnèn, a tom wun sho.

Nyùy sháʼnin fo wír vəə́ wáa bìʼnìn liì vitum

⁹ «Vèn wíy nəə e nsay ye Nyùy Tàr woo Nyùy won fó e vèn, lá vèn yòʼ bìʼnìn liì kisaŋ vitum ve ví dzə́ fo.

¹⁰ Lá á yòʼ wìy yèn wír e věn mvəm, a wù lí wán woo lumèn, kìn woo wiíy, e tòn ji cu. Lá á yòʼ wìy yèn wír wo wù shwéŋ vinyo, kìn wo wù sər fú, kìn dzə̀ wo wù wáy ŋgám, kìn wù sénin sə́m,

¹¹ kìn wír wo wù naa shív, kìn wo wù shóʼ ŋgàŋ, kìn wo wù báy sə́m, kìn wír wo wù mbaa aŋkfə.

¹² Nyùy Tàr woo Nyùy won nyaysì wír ve á yii liì virìm və̀n. Á kifá ke kí yiìn, bo wù wáa jùm vitúm vee shooy fo věn mbìy.

¹³ Vèn kú a dzə kén là njò e Nyùy Tàr woo Nyùy wón si.»

Nyùy wíy tsənsí ŋgaà ntum və e wír vəə́

¹⁴ Mooser yòŋ jii, «Vitúm ve vèn du, e yòv vìn, wír vee fóo lo, á wàa dù, a beè vé fùú, kìn vé ŋgàŋe. Yii bèy, fo kén kí, Nyùy Tàr woo Nyùy won yoʼ biìmé ji vèn wáa yiì bèy.

¹⁵ Nyùy Tàr woo Nyùy won wíy tum *ŋgaà ntum və wùmòʼ fo věn wùn moo mo, a wíy a dzə wír fo věn mvəm. Vèn kù wíy a yunín a dzə̀ wun.

¹⁶ «Yì‑iì dzə̀ é kishiíy ke vèn‑eè baʼtin é Gwan Horev, vèn lón ji lá á yòʼ dzəə wìy yù á kisúŋnìn ke Nyùy Tàr woo Nyùy wòsən, kìn ji á yén á shwínín rə́ yeé njà və̀y wo beeméné, bìʼ fo vèn‑eè fan ji á waà yíi kpukír.

¹⁷ Á bèy, Nyùy Tàr yòŋ e mò jii, ‹Kinyo ke áwune yòŋèn kí dzə̀ kijuŋ.

¹⁸ M wíy tum ŋgaà ntum wùmòʼ fo áwuné wùn moo wò, wír, a wù wíy fəə a dzə̀ fo áwuné mvəm. M wíy way jí sém é shuù wo, é wù wáa suúy kinyo kidzə̀m ke m yòŋèn shó aáwune.

¹⁹ A wìr wìy dzə̀ là fó a yuurí kinyo ke wù tiísi e mǒ yir, bo mómò, m wíy màʼ ŋgeʼ e ŋgaàŋ kitu.

²⁰ Yii bèy, a ŋgaà ntum wìy lò, e fəə̀, a suúy kinyo ji kí lò a fo mò, a bó m yoʼ yòŋ ji wù suúy, kìn wù súŋnin a dzə̀ é vitaaví vé anyùy kisaŋe, bo á kù yúyri woo shooy.›

²¹ «Mo Nyùy Tàr yòŋèn bey, bo a tàm vèn nèn lò, a moònìn e věn meliv ji vèn sà yíi ghan e le, e bóo kiíy ji kinyo ke wù yoŋ ki yòʼ lò fo wun a.

²² Vèn wáa leéy ji kinyo ke ŋgaà ntum yoŋ ji kí lò a fo Nyùy Tàr ki sà kù yòʼ yíi gheén a. Vèn yén, a kí téné, bo dzə̀ kinyo ke Nyùy Tàr yoʼ yòŋ. Kfə́ə woo bey yúʼti a dzə̀ wún və́. Lá vèn yòʼ wìy a fàn ŋgaà ntum woo shooy.»