Remrí 17 - ŊWÀʼ NYÙY

Nyùy shàʼnín nyam cù ye yì kér nsem

¹ Mooser suúy e wír veé Israyi jii, «Lá vèn yòʼ wìy a yiì cu Nyùy Tàr woo Nyùy won e nyàm ye yì kér nsem, kìn dzə̀ nàʼ, kìn njiì. Kee shooy ki kóʼoy fo wun.

Á ku yùyrí wír wo wù ghvə́m kifá kímóʼ kí ji Nyùy yúyrín

² «A kí lò, e kòóy ji lùmèn, kìn wiíy e věn ŋkàlaʼ yìmòʼ lo, a yiì vinyo ve bi ví e Nyùy Tàr, e shòʼór *mensaŋ me Nyùy Tàr woo Nyùy won,

³ a cù anyùy ámóʼó, e kfə̀n a ghvəm, kìn dzə̀ shúy, kìn dzə̀ ŋwee, kìn dzə̀ kifá kímóʼ kí é yuv, a mò‑oò shàʼnín ne,

⁴ vèn yú kfə́ə kinyò kee bey, vèn kù bònen tàr. Vèn tar, e yèn, a kí dzə̀ rú ji kfə́ə kinyò ke virìm kee bey ki kòóy a e Isray,

⁵ vèn lì ŋgaàŋ, kìn dzə̀ lumèn, kìn dzə̀ wiíy, e dù sho e shùu kày e ŋkàlaʼ, e tsə̀mrí fo e tíyí, e yùyrí.

⁶ A dzə̀ ji á wìy yùyrí wír, bo anjene kù kér fó a tiy, e kèʼ fo abaà, e shaà bèy. Bó yòʼ dzə̀ á wìy yùyrí wír, a njen dzə̀ e mòʼón cáʼ.

⁷ Kù wíy kèʼ anjen, a tsəmrí, é bo kibér ke wìr ki jumri. Á ku yiì bèy, e fíʼ tuŋ liì kisaŋ, e fəə́r fo věn mvəm.

Nsaʼ se tavkín sí

⁸ «A tàm kí wìy kòóy ji nsaʼ símóʼ sí távkír fo á tínén e věn ŋkà se laʼ, kìn dzə̀ nsaʼ yee ji á yùyrí wír, kìn ji á bìvír kifá, kìn ji á lèmér wír. Kí koóy bey, á lì, e dù sho e kirə̀ʼ kee shooy ke Nyùy Tàr woo Nyùy won wíy shoʼ.

⁹ Vèn du sho, á neèr áàtàá cù veé ram Levi wùn à taà kwàŋnsaʼ woó ghan fóo fèy si, aáwune tínén.

¹⁰ Kù wíy a dzə e kirə̀ʼ ke Nyùy Tàr wíy shoʼ fo áwune wíy a tinén nsaʼ. Á tínen bèy, bo vèn kù sí yii kinyo kidzə̀m réŋréŋ mo á yòŋèn.

¹¹ Á naarì mo á naàrìn, tínenè, é vèn ku nèn lì bèy, e làa yòʼ kfə̀n a bìnbìn.

¹² A taà kwàŋnsaʼ, kìn taà cù tìím e Nyùy Tǎr si, e tìnén kinyo, wìr ŋwáy, á kù yùyrí ŋgaàŋ yúyrín. Á ku yiì bèy, e fíʼ tuŋ liì kisaŋ, e fəə́r fo Isray mvəm.

¹³ Wìr dzə̀m wíy yú leŋ, é wù wáa fàn, é la wìr yòʼ kfə̀n wìy mùm, e ŋwày kfə́ə kinyò kee bey.»

Mooser tír wír veé Isray kùm wír wo dzə̀ á kòʼór ji fon

¹⁴ Mooser suúy e wír veé Israyi jii, «Vèn wíy nəə e nsay ye Nyùy Tàr woo Nyùy won fó e vèn, yovì, lóo dzə fo, ghanmóʼ, aá lo, e yòŋ ji vèn‑éè taʼ á fon wo wù wáa saʼ ven moo vitúm ve ví kaarin ven.

¹⁵ Kí lóo dzə bèy, vèn kù tàʼ wír a dzə̀ wo shavin Nyùy Tàr woo Nyùy won. Vèn ku shòʼ a dzə̀ fə́r won wùmòʼ. Lá vèn yòʼ mùm ji á shóʼ kiŋgwìy ji kí wáa saʼ ven.

¹⁶ Lá fòn yòʼ wìy a ker nyám se ŋkoʼ sinín ji sə́. Lá wù yòʼ wìy mùm, e tùm wíri é Ejiv ji á du, e yùn nyám se ŋkoʼ fo fo, bìʼ fo Nyùy Tàr‑iì shaʼnin ne ji lá wír vəə́ yòʼ kfə̀n wìy kfə̀n á e Ejiv.

¹⁷ Lá wù yòʼ wìy a tàʼ vikìy anín, fo kee shooy ki wìy lèvtí wun, é wù bin ndzə̀m e wun woo Nyùy Tàr. Lá wù yòʼ wìy a tàʼ sa ji wun kú a ker *kisha ke mbàm ke fəvír kí, kìn ke baar kí nyanyày.

¹⁸ «Á wíy kóʼor fon, é wù ku yiì, aá li Ŋwàʼ Nsər wo atàá cù veé ram Levìi wíy a ker, a yéʼéy Nyùy Tàr rə́ne dzə̀ shó, aá sáŋ və́ bey, é wù wáa ker.

¹⁹ Wù wíy a ker ŋwàʼ və̀n e wun ghaŋ, a yòŋ ghán sidzə̀m e wun dzə̀ʼə̀m, e kù a yiì rúrú mo nsər se sí dzəə̀n shó si dzəə̀n, a yeʼéy mo dzə̀ wù wàa ghvəm Nyùy Tàr woo Nyùy və.

²⁰ Kí wíy yiì, é la wù yòʼ a koʼór wún ji wun dzə̀ jeéy fo wír veé Isray vee afə́r vəə́, e kfə̀n yiì, é la wù yòʼ shòʼór nsər se Nyùy Tàr, kìn dzə̀ é dzəə rəné. Kí lóo dzə bèy, bo wù wíy saʼ Isray viyá vinín, é rám rəə́ kfən wìy bònen sàʼ.»