Remrí 14 - ŊWÀʼ NYÙY

Vinyo ve á lóo dìy kpú, lá á yòʼ a yiì

¹ Mooser kú a suúy e wír veé Israyi jii, «Vèn dzə̀ wón Nyùy Tàr woo Nyùy won. Wìr kpú, lá vèn yòʼ shùnrí wún wón, kìn ji á keŋri kitú kén fó vishi mo wír ámóʼó yii.

² Lá vèn yòʼ yiì bèy. Vèn dzə̀ kén wír vee jeéyí ji vé Nyùy Tàr woo Nyùy won, a wù shòʼ ne ven fo vitúm veé kitu ke nsay vidzə̀m ví mvəm ji və́ vee wír.

Nyám se dzə̀ á yì, à se bó yòʼ dzə̀ á yì sí

³ «Lá vèn yòʼ wìy yì nyám yìmòʼ fo nyám se sí kóʼoy si.

⁴ Nyám se dzə̀ vèn yì sí nén a dzə jii, nàʼ, njiì, bvəy loŋ,

⁵ ŋgav, njà, shisír, bvəy kwaʼ, bvəy aŋkoŋ, shishùy, njiì kòv.

⁶ Kí dzə̀ ji a dzə̀ vèn yì nyam mfay e dzə̀m, nyam mfay ye yì kér nsàn e kiwuù, a fèn dzə̀ ye yì shám, kóʼorì, a dzə̀ vèn yì.

⁷ Yii bèy, fo mbìv nyàm se sí shám, kóʼorì, à fó mbìv nyàm se sí kér mfay si, símóʼ sí dzə̀ se bó yòʼ dzə̀ vèn yì, a sí dzə̀ jii, *kamer wùn à waàŋgáa, à kùv. Mo nyám sìn si fə̀m shám, kóʼorì, a bó sí yòʼ kér mfay, bo kù dzə̀ nyam *kifàn fo vèn.

⁸ Yìmòʼ dzə̀ kǔnnyàm. Fə̀m mo wù kér mfay, a bó wù yòʼ shám, kóʼorì, bo kù dzə̀ nyam kifàn fo vèn. Lá vèn yòʼ mùm, e yì nyám see shooy, lá á yòʼ mùm, e kùm dzə́n sév.

⁹ «Fo kifa kidzə̀m ke kí dzəə̀n é ndzəv, a dzə̀ vèn yì ve ví kér ŋgáʼ si, kfə̀n kér vibá é wùn.

¹⁰ Ke kí yòʼ kér ŋgáʼ si wùn à vibá ví é wùn, lá vèn yòʼ yì, kù dzə̀ kifàn fo vèn.

¹¹ «A dzə̀ vèn yì shinə́n shee là kifàn shidzə̀m.

¹² Yii bèy, me bó yòʼ dzə̀ vèn wìy yì mè dzə̀ jii, lùŋ wo wiy wùn à kilùŋŋgùrúʼ kí, à kilùŋŋgùrúʼ ke sənér kí.

¹³ Memoʼ mè dzə̀ mbàŋkìnyè wùn à kòy, mo kfə́ə sév sí dzə̀kìn,

¹⁴ à viŋaʼ vi vidzə̀m, mo kfə́ə sév sí dzə̀kìn,

¹⁵ à kiŋkfə̀y ke loŋ ki, à kighvəŋ ki, à lùŋ màndzə̀v, à vilùŋ vi, mo kfə́ə sév sí dzə̀kìn.

¹⁶ Memoʼ mè kfə́n a dzə jii, sə́tí wo terí wùn à wo wiy, à gwàgwa ndzə̀v,

¹⁷ à kigùʼshuù ki, à kilùŋŋgùrúʼ ke fəvír kí, à kiŋkoòsə ki,

¹⁸ à kilìmbìy ki, à ŋgáʼ shinə̀n sheé ndzəv mo kfə́ə sév sí dzə̀kìn, à fèn sá, e bóo lì kilíim.

¹⁹ «Fo mbìv vintàn, kifá kidzə̀m ke kí kér vav si, kfə̀n ŋaŋrì e nsay, kù dzə̀ kifá ke koʼoyín kí fo vèn, lá vèn yòʼ wìy kfə̀r.

²⁰ Yii bèy, a dzə̀ vèn kfə̀r kifá ke kí kér vav si kee là kifàn.

²¹ «Lá vèn yòʼ wìy a yi kifá ke kí kpuun kpuún. A dzə̀ vèn koŋ, á fò kee shooy aàtókíshwáŋ ve á dzə́ vèn áwuneé. A dzə̀ vee shooyi yì. A vèn kòŋ, á fiìnè e kiŋgwìy ki, bìʼ fo vèn dzəə̀n kén wír vee jeéyí ji vé Nyùy Tàr woo Nyùy won. «Lá wìr yòʼ nàá wan bvəy e vín kiyìyí.»

Nsər kifa kee shóʼ fo vee ghvə̀m vi

²² Mooser kú a yòŋ e wír veé Israyi jii, «Wíy lóo dzə e kitu ke kiya kidzə̀m, vèn kù a jàv vifá vee káv fó sum, kirə́ʼ e ghvə̀m, a shoʼ kee kimòʼón ki, a lèm jeéy ji ké Nyùy.

²³ Lemè, é vèn nèn dù sho e kirə̀ʼ ke Nyùy Tàr woo Nyùy won shoʼon ji á wáa ghvəm wun fo, a yi fo e wun si, a dzə̀ ji vifá vee shóʼ fó viyikìr, à vee shóʼ fó melùʼ wùn à fó meŋgvə̀r ví. Vèn kfə́n a yi sa kifá kee dzə́ə mbìyi fó, ké ŋgoo nyàm, à ké ŋgoo bvəy ki. Vèn lóo yiì bèy, é vèn nèn a kiíy mó a ghvəm Nyùy Tàr woo Nyùy won ghán sidzə̀m.

²⁴ A kirə́ʼ ke Nyùy Tàr woo Nyùy won shoʼon ji á wáa ghvəm wun fo ki lò a dzə kwaʼda fo wìr wùmòʼ, ye bó yòʼ dzə̀ ŋgaàŋ yù fóo lì vifá ve Nyùy səə̀vìn wun sho, e dù sho fo,

²⁵ bo dzə̀ ŋgaàŋ fiìnè vifá vee shooy, e kùr mbàm, e dù sho e kirə̀ʼ fóo fèy.

²⁶ Wù du, é wù yún vifá vidzə̀m ve wù kér shií shó. Kìn dzə̀ nàʼ, kìn njiì, kìn meluʼ, kìn dzə̀ kifá keé njà melùʼ kímóʼ kí, a fə̀m dzə̀ ka ke wù kér shií shó, wù wàa yun, a yi fo e Nyùy Tǎr si, a sàvnìn wùn à lav rə e dzə̀m.

²⁷ «Kù dzə̀ ji lá vèn yòʼ wìy a làysìn fó a tom wír veé ram Levi ve á dzə́ vèn áwune é ntèʼ sí ntèʼ sí, bìʼ fo á yòʼ kér kirə́ʼ, kìn vitsə́ʼ e věn nsàn.

²⁸ Lóo dzə e bǎm viya vitaár, vèn bàʼtí vifá ve vèn kavin fo věn sum ví, vee kirə́ʼ kee kimòʼón ki fo vee ghvə̀m vi, e wìy sho e věn ŋkà se laʼ, e wày é vitàv.

²⁹ Kù wíy a dzə vifá ve wìr veé ram Levi mo bó á yòʼ kér kirə́ʼ, kìn vitsə́ʼ e věn mvəm, a dzə̀ sá vé abeèshaà, à vé wón tsə̀ə́, à vé vikǐy ŋkfə ve á dzə́ e věn mvəmé, aáwune wáa yi, a lùŋ fo fo. Vèn lóo yiì bèy, é Nyùy Tàr woo Nyùy won wìy a səə̀vì ven e věn lìm si sidzə̀m se vèn limè.»