Remrí 10 - ŊWÀʼ NYÙY

Mooser sə́ viwaŋ ve tiy ve sən ví

¹ «Wáa dzə e ghan fóo fèy, Nyùy Tàr yòŋ e mò jii, ‹Sém viwaŋ ve tiy ví vibaà moo vé mbìy vi bey, e kòʼ, e yèn mo shó e gwan fèn. À sémé, à fèr sá ŋkùv e kicí kí.

² À wiy e viwaŋ vee shooy vi, é m sáŋ kinyo ke kí‑iì dzəə̀n e vé mbìy vi shó, vee shooy ve wò‑oò bvəʼtin. M sáŋé, áà nèn wày é ŋkùv fèy.›

³ «M ku nèn fèr ŋkùv e kicí kee *akaasia ki, e sèm viwaŋ ve tiy vibaà moo vé mbìy vi bey, e nèn lì, e keèrí e mǒ wo, e kòʼ shó e gwan.

⁴ M dù, Nyùy Tàr sáŋ kinyo ke wù‑uù saŋen fó mbìy sho, a kù dzə̀ nsər see ghvə̀m se Nyùy Tàr‑iì yòŋèn e vèn é kishiíy ke vèn‑eè banen, wù wáa suŋnín e vèn fó gwan. Wù sáŋ bey, e nèn fò e mò.

⁵ Á bèy, m nèn bìnkìr, e sə̀ʼə́y sho fo gwan, e dù, e yiì mo Nyùy Tàr‑iì yòŋèn e mò, e wày viwaŋ ve tiy viy e ŋkùv wo mò‑oò fèrìn, a ví kù dzə̀ə́ fo, e wìy to lán.

Kpú Aaron

⁶ «Wír veé Israyi‑iì dzə̀ é woʼ, e wìy lò lò fo ndzəv se tuŋén sí se yì‑iì dzəə̀n sé wìr veé Jaakan, e nèn dù e Mosera. Aaron nèn kpù fó, á dzəə̀mè. Wù kpú bey, wan və Eleasar nèn lì kilíŋ kfə́, a lìm ji taà cù.

⁷ Á lò foo fèy, e dù e Gudgoda, e lò fo fo, e dù e Jotbata, a viwoóy vé ndzəv ví dzə̀kìr fó.

Lim wìr vee rám Levi

⁸ «Yì‑iì dzə̀ é ghan fóo fèy, Nyùy Tàr shóʼ rám Levi, e lèm jeéy ji á wáa beʼ ŋkùv mensàŋ Nyùy Tàr, a tiím e wun si ji atàá cù, a lìm fo wun, e kfə̀n a səə̀vì wíri e wun yir, a dzə̀ kinyo ke áwune kù dzəə́ yii, e wìy to lán.

⁹ Á kifá ke kí‑iì yiìn, la rám Levìi yòʼ a ker nsay aàfə́r véví mvəm ji vév vee vitsə́ʼ. Nyùy Tàr kù‑uù sì vitsə́ʼ vév bey, mo wun woo Nyùy Tàr woo Nyùy won‑eè yòŋèn aáwune.»

Nyùy Tàr yú bunrì Mooser

¹⁰ Mooser kú a suúy jii, «Mò‑oò shìíy é gwan mo mò‑oò shiiyin yé mbìyi, kishiíy mkweè wùn à vitsə́ʼ ví sá mkweè. Nyùy Tàr nèn kfə̀n yù tóŋ yém, e làa yòʼ dzə́ə a ker shií wóo laàr ven.

¹¹ Nyùy Tàr nèn sùúy e mò jii, ‹Lò lèn, a dù. Shém mbìy, a tsəəné wír veé Israyi, aá fiʼ dù, e nə̀ə́, e yòv woŋ wo mò‑oò kàʼàn atàr vév shó, e lìʼ ji m wíy fo a aáwune.›

Nyùy Tàr taʼ a dzə̀ ghvə́m wùn à yúníne

¹² «Wír veé Isray, ké lèn ki, kinyo ke Nyùy Tàr woo Nyùy won taʼ fo vèn kí dzə̀ cáʼ jii, vèn wáa ghvəm Nyùy Tàr woo Nyùy won, a ghan e wun mbòv, a kòŋ wun, a lìm fo wun shilív shén shidzə̀m, e fò kitú kén shó kidzə̀m,

¹³ e kù a lèm nsər sə́ sidzə̀m wùn à vinyo ve wù tinen ví vidzə̀m ve m yoŋ e vèn lán və̀n, é ví wáa sə ven.

¹⁴ E ké ru kí, yúv wùn à kifá kidzə̀m ke kí dzəə̀n fó ki kù kér Nyùy Tàr woo Nyùy won. Kitú ke nsay wùn à kifá kidzə̀m ke kí dzəə̀n shó ki kú a ker wun.

¹⁵ Yii bèy, Nyùy Tàr ku wày shilív, a kòŋ atàr vén é ŋàŋ, e shòʼ rám yév, e shaà vitúm vidzə̀m, a kí kù dzə̀ə́ bèy, e wìy to lán.

¹⁶ «Kí nén a dzə jii, kèʼ fo lèn, vèn kú a yunín a dzə̀ Nyùy Tàr, e làa yòʼ dzə́ə a tav kitú,

¹⁷ bìʼ fo Nyùy Tàr woo Nyùy won dzəə̀n Taà Vitu. Wù shaà anyùy adzə̀m. Wù dzə̀ Ŋgaà Vitaàví, a wù ghàʼtí feyì, a kí dzə̀ ji á wáa ghvəm a wun. Bó wù yòʼ yii binbìnè, a bó wù yòʼ yii bin nsaʼ mbvə́nkíwó.

¹⁸ Wù yii tíy e kinyò ke wón tsə̀ wùn à ké vikǐy ŋkfə ki, fo á bvə́ʼ ghay wóv. Wù koŋ viŋgwìy, yiir áwune, kfə̀n fó áwune ndzə̀y.

¹⁹ Bo dzə̀ ji vèn ku wìy a kòŋ a kiŋgwìy, bìʼ fo vèn‑eè dzəə̀n viŋgwìy e wòŋ Ejiv.

²⁰ Vèn wáa ghvəm Nyùy Tàr woo Nyùy won, a lìm fo wun, e kù a yeʼtí e wùn wó, lóo yiì kilìʼ, vèn wàa kàn yír rə́.

²¹ Vèn wáa sùyrì wun. Dzə̀ wun Nyùy won wo wù‑uù yiìn viŋgaʼnìn ve vinyò e vèn, a ví gháʼ kfə̀n beéme, a vèn‑eè yén e sí yéné.

²² Atǎr ram véné‑eè sə̀y é Ejiv wír msaàmbà cáʼcáʼ, lèn və̀n, Nyùy Tàr woo Nyùy won lìy ne ven, vèn wáa dzə nyanyày moo mejiy meé yuv.»