Remrí 1 - ŊWÀʼ NYÙY

Mooser súŋnín e wír veé Israyi é Moav

¹ Vinyo ve ví dzəə̀n é ŋwàʼ fèn vi kù dzə̀ jí se Mooser‑iì loòn, e sùŋnín e wír veé Israyi adzə̀m, aá dzə̀ é woʼ yeé ghaa ndzəv yee Jordan, e mbìv yee fo shùy yii tó. Vé‑eè dzə́ e mbuŋ Jordan foo fèy e ŋkìʼnìn Suv, aá dzə̀ é ntìntìn mvə̀m sé laʼ símóʼ sí. Mvə̀mlaʼ yee Paran‑eè dzə̀ é mbìv yìmòʼ, a see Tofel wùn à Laban, à Haserot, à Disahav si dzə̀ e yìmòʼ yee mbìv.

² Móo lò fo Gwan Horev, e dù e Kadesh‑Barnea, e shaà dzə́ə fó Gwan Seir, dzə̀ ghán yee kishiíy nshòv mòʼón e ghvə̀m.

³ Mooser nèn lò, e sùŋnín jí sìn e wír veé Israyi, a kiyá ki meé ne ji mkweè mo áwune‑eè kèʼèn, a ghan, a kishiíy kí‑iì dzə̀ kishiíy ké mbìy ki fó ŋwee woo nshòv mòʼón e ghvə̀m. Wù wáa remrí kinyo kidzə̀m ke Nyùy Tàr‑iì yòŋèn ji wù suúy aáwune.

⁴ Ghán sin si‑iì dzə̀, a Mooser tón ne Sihon woo fon wìr veé Amor wo wù‑uù dzə́ e Heshbon, e kfə̀n tòn Og woo fon woó Bashan wo wù‑uù dzə́ e Ashtarot, kfə̀n dzə́ e Edrey.

⁵ Yì‑iì dzə̀ é wòŋ Moav, e mbìv Jordan yee fo shùy yii tó, fo Mooser‑iì liìn ghán, e bònén, a naàrì yéʼéy Nyùy rə̀n wùn à nsər si e wír veé Israyi. Wù‑uù yòŋ áwune, a suúy jii,

⁶ «Nyùy Tàr woo Nyùy wòsən‑eè sùŋnín e vèsən, a vèsən dzə̀ é Gwan Horev. Wù‑uù yòŋ jii, ‹Vèn dzə̀ʼə̀m ne e gwan fèn e ŋàŋ, kí gheén.

⁷ Vèn ŋáʼáy lèn, a dù e wír veé Amorí wòŋ, e mbìv seé agwan. Vèn wáa dù e wòŋ se sí kaarin fó sidzə̀m. A sí dzə̀ jii, mbuŋ Jordan, woŋ agwan, à woŋ seé mboʼ si, a dù e wòŋ woó tsən, a dù e ŋguùŋè Rìbà Ndzə̀v, a dù e wòŋ Kanan, e dù, e yàʼáy agwan veé Lebanon, e dù bèy, e bàʼ e ndzəv ye wiyí yee Yufret.

⁸ Vèn yén ri mbà, m fò ne nsay rə̀n e vèn. Vèn nəə́, e faàsì nsay rə̀n, e yòv. Dzə̀ nsay ye mo woo Nyùy Tàr‑iì kàʼàn atǎr ram vén vee Abraham wùn à Aysi, à Jakov sho, e lìʼ ji m wíy fo a aáwune wùn à rám sév sí.› »

Mooser shóʼ atǎr saʼ

⁹ Mooser yòŋ bèy, e kuùmé e wíri jii, «Yì‑iì dzə̀ é ghan fóo fèy, m yòŋ e vèn jii, ‹A dzə̀ mo vèr mòʼón, la m yòʼ yù fó a saʼ ven.

¹⁰ Nyùy Tàr yiì ne, vèn wáa dzə wír nyanyày moo mejiy meé yuv.

¹¹ Nyùy Tàr woo Nyùy atǎr ram sén ku yiì rì, é vèn kfən dzə̀sì akàŋ nsə̀kì, e shaà mo vèn dzəə̀n lèn, é wù ku səə̀vì ven mo wù‑uù kàʼàn ne.

¹² Yii bèy, a jòʼsì mo, m wàa beʼ kibeʼèy kee ven kin, a sìysì vinyo vén, a jàvsìn kinyam kén vèr mòʼón e le?

¹³ Vèn shóʼtí wíri mo rám sén sí dzə̀kìn, é m lem áwune ji atǎr saʼ vén. Kú a dzə wír ve á kér vifií, aá kì vinyo, kfə̀n kér ghvə́m.›

¹⁴ Mò‑oò shù bey, vèn bínsí ji kinyo ke m shuùn kí dzə̀ á kinyo ke juŋ ki kée yiì.

¹⁵ Á bèy, m nèn yiì lò, e lì wír vee shooy fo věn ram sí, a kù‑uù dzə̀ wír ve á kér vifií, aá kfə̀n kì vinyo, e lèm ji á wáa saʼ ven. Aàtǎr saʼ ámóʼó sáʼ wír nsə̀kì nsə̀kì, ámóʼó wií wií, ámóʼó mtàn mtàn, ámóʼó wáa saʼ wír ghvə̀m ghvə̀m. M kfən lèm sa ntom se saʼ rám sén sidzə̀m.

¹⁶ «Kú a dzə e ghan fóo fèy, m yòŋ áwune ve vé‑eè yíi a tinén nsaʼ sén, e sùúy aáwune ji á wáa yuurí a nsaʼ sén, a tinén là kiloʼ, kìn dzə̀ se sí kùmèn a dzə̀ ven, kìn dzə̀ se sí kum viŋgwìy ve ví dzə́ vèn áwune.

¹⁷ Aá kú a tinén nsaʼ si là kiloʼ, a lì ghéʼncey wùn wìr wo kuʼùn réŋréŋ, e làa yòʼ a fàn sí wìr, bìʼ fo kinyo ke áwune tínen ki dzə̀ ji tínen a Nyùy. Nsaʼ tiŋè, á lì, e wìy, e beè mo shó, é m bin fó fo.

¹⁸ E ghan fóo fèy, mò‑oò yòŋ kinyo kidzə̀m ke vèn wáa yiì.

Á tsə́nsí vé ŋkiyi é Kanan

¹⁹ «Nyùy Tàr wìy lò, e yòŋ, vèsən ŋáʼáy fó Gwan Horev, e ghàn, e tòsín kirə́ʼ ké woʼ kí, a kí dzə̀ kiwíy, kfə̀n beéme. Vèsən‑eè tòsín, e dù e wír veé Amorí wòŋ, a fóo dzə̀ agwan agwan, e dù bèy, e bàʼ e Kadesh‑Barnea.

²⁰ Vèsən meé fó, m nèn sùúy e vèn jii, vèsən nə̀ə́ ne e wòŋ wo Nyùy Tàr woo Nyùy wòsən fó e vèn, a dzə̀ woŋ wìr veé Amor, a wú dzə̀ agwan agwan.

²¹ Vèn leéy ri, Nyùy Tàr fò ne ven nsay. Vèn nəə́ shó, e faàsì, e yòv, kù mo Nyùy Tàr woo Nyùy atàr vén‑eè kàʼàn. Lá vèn yòʼ fàn, lá vèn yòʼ weèy.

²² «Vèn‑eè lò, e wìy wír adzə̀m, e yèn mo, e bà ntaŋ ji vèsən tsə́nsí á wíri, aá du, e shwèʼ woŋ woo shooy, e nèn kfə̀n é bàm, e naàrì a e vèsən mo ŋkà se laʼ see fó si dzəə̀n, e naàrì dzə́ə ye dzə̀ á shaà shó, e bóo nəə́ fo, e faàsì woŋ.

²³ Ntaŋ woo shooy‑iì ghèén mo féyì, m nèn shòʼtí wír nshòv sibaà e ghvə̀m fo věn mvəm, wír e mòʼón mòʼón fo ram yee shó.

²⁴ Áwune kóʼ é wòŋ agwan, e dù, e bàʼ e Kiwoóy ké Eshkol, e shwèʼ fó.

²⁵ Á dù bèy, e lòo kfən e bàm, e lì vifá ve dzəə̀n kéŋ yeé nsay foo fèy, e wìy, e yèn vèsən shó. Á kfə́n bey, e sùúy jii, nsay ye Nyùy Tàr woo Nyùy wòsən fó e vèsən rə̀n dzə̀, a yì dzə̀ á e juŋ feyì.

²⁶ «Yii bèy, vèn táv kitú, e tèn fóo yunín kinyo ke Nyùy Tàr woo Nyùy won yòŋèn e vèn, e nèn tèn ji bó vèn yòʼ du a fo.

²⁷ Vèn góʼ e věn tàv sí, a ghvə̀vrì, a suúy jii, ‹Nyùy Tàr‑iì ban ver, e bóo fəə́r fo Ejiv, e wìy, e way e wír veé Amor vìné wo ji á laar.

²⁸ A dzə̀ vèr wàa dù ka fó? Afə́r vérí wày ne kindzə́m e věr shiliv. Áwune yoŋ ji wír vee fóo dzə̀ á viŋgáʼ viŋgáʼ, aá waà kfə̀n tàvkír, e shaà a ver, a ŋkà se laʼ sév sí dzə̀ á vikum, a virə́v vév vé kày vi kóʼ, kum a yúv. Kífoy wáa dzə ké rám Anak ye áwune‑eè yenen á fo.›

²⁹ «M nèn yòŋ e vèn jii, lá áwune yòʼ a beemé ven. Lá vèn yòʼ a fàn áwune.

³⁰ Nyùy Tàr woo Nyùy won wo wù danèr ven, wúnwun yíi fùnèn, e màʼ rə́r sén réŋréŋ mo wù‑uù fùnèn é Ejiv, a vèn yéné.

³¹ Wù kfə̀n‑eè leey fo vèn é kirə̀ʼ ké woʼ kí, a vèn‑eè yèn mo wù koytin ven mo kitàr kí kòytí wán. Wù kóytí bey, e ghàn shó, e wìy, e mèé e kirə̀ʼ fen.

³² Fə̀m mo mò‑oò yòŋèn bey, vèn ku tèn fóo way shilív e Nyùy Tàr woo Nyùy wón wùn.

³³ Dzə̀ wun wo wù‑uù danèr ven, ghán sho, kfə̀n taʼ virə́ʼ ve dzə̀ vèn tùúy táv sí shó. Lo, wù wàa dànèr ven vitsə́ʼ e və́yí, a dànèr e shùy e mbàʼ, a dìn dzə́ə ye vèn wáa dù sho.

Nyùy Tàr máʼ ŋgeʼ e wír veé Israyí kitu

³⁴ «Nyùy Tàr yú mo vèn ndzə́kirì, dòʼshwíiy və kóʼ. Wù yòŋ ven, e shìvtì jii,

³⁵ ‹Feyì feyì, bó wìr fo vèn vee rám ye bi rəne yòʼ wíy shov woŋ wo juŋ wo mò‑oò kàʼàn ji m wíy fo aàtàr véné.

³⁶ Kù jòʼsì Kalev woo wan Jefunne wo wù wíy yen. M wíy fo woŋ wo wù‑uù ghanen shó e wùn à wón vəə́, a dzə̀ bìʼ fo wù kù‑uù yúnin mo woo Nyùy Tàr shilív sə́ shidzə̀m.›

³⁷ Nyùy Tàr‑iì shwìíy sá kilòŋ vèr wun bìʼ ven, e yòŋ jii, à wò woo Mooser sho, bó à yòʼ wíy nəə́ e wòŋ foo fèy.

³⁸ Kù wíy nəə́ Joshua woo wan Nun, wun woo ŋgaà wò ntom. Ku tàvír wun, bìʼ fo wíy tsəəné wun wír veé Isray, aá du, e yòv fó.

³⁹ «Nyùy Tàr kfə̀n‑eè yòŋ e vèsən jii, ‹Ké won vén ve vèn‑eè yoŋ ji á wíy kfən ji kiyínsam, wón vén ve á yóʼ ne kìíy jeéyjeéy fó kinyò ke juŋ ki, kìn ke bi kí, e wìy to lán, vee shooyi wíy nəə́ fo. M wíy fo fó aáwune, aá yov.

⁴⁰ Yii bèy, fo kén kí, vèn binkir, a kfən e woʼ, a dù e dzəə̀ Rìbà Ndzə̀v wo Baar.›

⁴¹ «Nyùy‑iì yòŋ bey, vèn bìnèr e mò jii, ‹Vèr jày ne e Nyùy Tàr, a vèr‑íì du, e màʼ rə́r, kù mo Nyùy Tàr woo Nyùy wor yòŋèn e vèr.› Vèn nèn a baʼ vifá vén vé rər, báʼ bèy, kwaʼtì ji dzə̀ á kilélé móo koʼ, e faàsì woŋ agwan woo shooy.

⁴² «Nyùy Tàr nèn yòŋ e mò jii, ‹Kàntì áwune ji á wáa yen a fóo dù, e taamé wír vee fó e rə́r sí. Aá mùm, bo aŋgaà vév vibàné du, e tòn a áwune, bìʼ fo bó m yòʼ yíi a dzə aáwuné mvəm.›

⁴³ Á bèy, m nèn sùúy e vèn, la vèn yòʼ kwè. Vèn tén fó yunín sáʼ Nyùy Tàr, e ŋwày ŋwáyín, e kù kòʼ é wòŋ agwan fèy.

⁴⁴ Wír veé Amor ve vé‑eè dzə́ e wòŋ agwan foo fèyi fəə́, e shòʼ e věn bàm, a jùm moo yúu. Á jùm bèy, e sə̀y é nsay Seir, e nèn a laàr ven, e laàr bèy, e dù, e bàʼ e ŋkàlaʼ yee Horma.

⁴⁵ Vèn‑eè kfə̀n é bàm, e tòŋ e Nyùy Tàr, la wù yòʼ yù tóŋ yén, wù ŋwáy ven ŋwáyín.

⁴⁶ Kee shooy ki nèn yiì, vèn bónén, e dzə̀ʼə̀m e Kadesh ntàmda, e dzə̀ʼə̀m fo bèn viyá viyá.»