Ŋwàʼ woó Rom 5 - ŊWÀʼ NYÙY

Vijuŋ ve wìr ve Nyùy li ji wír və́

¹ Mo Nyùy liìn ne vèsən ji wír vee là jay, bìʼ fo vèsən wayin shilív e wun wùn, vèsən áwune nen suùsín, a dzə kijuŋ, a kù yiì Tàr wòsən Jesus Kristu.

² Ku kfə̀n yiì wun, vèsən wáa dzə lèn, a koʼtí e Nyùy wo wù‑uù bùʼùn vèsə́n si, a leéy a dzə̀ fó mbìy, a sheʼrí ghán se vèsən à Nyùy wíy a dzə, é wù yii, é vèsən wáa dzə moo wun.

³ Yii bèy, mo vèsən kù dzəə́ dzə́ lèn, yén ŋgeʼ, vèsən ku yòʼ a sheʼrí sa ŋgeʼ see shoon, bìʼ fo vèsən kiìn ji ŋgeʼ sìn si yii, a vèsən yéʼti a dzə̀ e Nyùy wùn.

⁴ Vèsən lóo yeʼtí bèy, é liì wòsən nèn màysì ghèén Nyùy. Gheenè, é vèsən ku nèn a leéy a dzə̀ fó mbìy, a shìy ghán se vèsən à Nyùy wíy a dzə.

⁵ A bó yòʼ dzə̀ kinyo kee shoon ki shaà fó ghaŋ, bìʼ fo Nyùy foon ne kitiír, a dzə̀ Kiyoy ke Ranén kí ke wù wayin e vèsə́n meliv, kí wáa yiì, vèsən wáa kiíy rú mo wù koŋ vèsən.

⁶ A kí dzə̀ jii, vèsən‑eè dzə́, aá kér lòn, a bó yòʼ dzə̀ vèsən sə̀ vitú vesən fó lòn foo fèy. Nyùy nèn sìysì, ghán sí gheén, wù túm Jesus Kristu, wù wìy, e kpù fo vèsən vee aŋgàa vinyò ve bi ví.

⁷ A dzə̀ kinyo kigháʼán féyì fo wìr kpú ji wun tín wír fo kpu, a fə̀m dzə̀ wír wo á taʼ, e yuyrí là njò. Yii bèy, a tàm wìr wùmòʼ kù yòʼ biìmé kpú bìʼ wír wo juŋ wùmòʼ.

⁸ Mo Nyùy‑iì tumen Jesus Kristu, wù kpú a dzə̀ fo vèsən vee aŋgàa vinyò ve bi ví, kí nén a dìn mo wù koŋ vèsən é ŋàŋ.

⁹ A wù lì ne vèsən lèn ji wír vee là jay, bìʼ fo Kristu‑uù foon kitú kfə́, e kpù fo vèsən. Vèsən nén a kiíy sa jii, mo Kristu‑uù yiìn kee shooy, bo wù kù wíy tin vèsən sáa fo ŋgeʼ ye Nyùy wíy màʼ e wírí kitu bìʼ vinyo vév ve bi ví.

¹⁰ Kí kfə́n a dzə jii, vèsən‑eè dzə́, yii vinyo ve bi ví, ban Nyùy bánen. Mo wù‑uù yiìn, Wan və kpú, e màn vinyo vee shooy, vèsən wáa dzə ŋkar sə́ lèn, bo dzə̀ vèsən wàa kiíy sa jii, mo Wan və fəən ne fo kpu, a wù kù yíi a dzə sho, bo wù kù wíy yiì sa, é vèsən luŋ, a dzə a vèsən à Nyùy.

¹¹ A bó yòʼ jòʼsì kishéʼrì ke vèsən wíy a ker e ghan see shooy. Vèsən sí yú vijuŋ lèn vèsən à Nyùy, mo Tàr wòsən Jesus Kristu yiìn ne, vèsən à Nyùy koó viŋkar.

Kisəəm ké Adam wùn Kristu

¹² Kinyo ke bi kí kù‑uù kèʼ fo wìr mòʼón, a dzə̀ Adam woo wir mbìy, e nèn ràm kfə́ə wìr msòŋ e dzə̀m. Kpúu nèn kèʼ sa, a dzə̀ lǒn vinyò vee shooy, e ràm wir dzə̀m, bìʼ fo wìr dzə̀m kù sí yii vinyo ve bi ví.

¹³ A kù dzə̀ mo vé‑eè sí yii vinyo ve bi ví, é bo Mooser wìy a wìy e nsər Nyùy, é yì wáa dìn jay. Kù mày cáʼ ji a nsər‑iì bùŋ, bo bó á yòʼ kív njò jay.

¹⁴ Yii bèy, wír vee kèʼ fo Adam, e dù, e meé e Mooser vìne kù yòʼ‑oò ló a kpukír. A vé‑eè kpúkir a dzə̀ bìʼ vinyo vév ve bi ví ve vé‑eè yii, a bó á yòʼ fə̀m‑eè lo jày moo Adam wo wù‑uù shoʼorin kfə́ nsər ye Nyùy‑iì foon. Mo kinyo ke Adam ki‑iì raàrìn wir dzə̀m, wù nèn a dzə mfìʼ Jesus Kristu wo wù‑uù wíy wìy.

¹⁵ A bó yòʼ dzə̀ á wàa fìʼsìn mbùʼme Nyùy wo Jesus Kristu wìyìn shó e lǒn vinyò ve bi ví ve wíri liìn fo Adam kitu. Bìʼ fo wìr mòʼón‑eè jayin, kpúu raàr wir dzə̀m, a ke yii Nyùy ki shaà kee shooy feyì. Wù‑uù yiì ji dzə̀ wír adzə̀me lùŋ lúŋen fo wìr mòʼón, a dzə̀ Jesus Kristu wo wù‑uù shamen wíri, e kpù fo áwune, wáa dzə mbùʼmé wo Nyùy buʼ wíri shó kisáŋ.

¹⁶ Kinyo ke mbùʼme Nyùy və̀n yii ki dzə̀ jeéy fó kinyò ke jay wo Adam‑eè yiìn. Mo Adam‑eè jayin kinyo kimòʼón, nsaʼ koó wir dzə̀m. Jesus Kristu nèn wìy kfə́, a wíri jáy ne vinyo nyanyày, wù rə́r mendzən mev, e tìn áwune adzə̀m fo nsaʼ kisáŋ.

¹⁷ Mo jay wo wìr mòʼón‑eè jayin yiìn ne, kpúu raár wir dzə̀m, bo kinyo ke wùmòʼ woo wír wo dzəə̀n Jesus Kristu yiìn kí yii kinyo e shaà kee shooy feyì. Kí yii ji wír ve Nyùy buʼ e mbùʼmé nyanyày kisáŋ, li liìn ji wír vee là jay adzə̀me wáa dzə, a yu a dzə̀ fo Jesus Kristu, a ghaʼ vinyo ve bi ví.

¹⁸ Vinyo vìn vi nén a dzə jii, mo wìr mòʼón‑eè jayin ne, nsaʼ koó wir dzə̀m, dzə̀ sá réŋréŋ mo wùmòʼ woo wír yiìn kfə́ kinyo ke juŋ ki, kí yií ye dzə̀ wìr dzə̀m bòy fó nsaʼ, a ker dzəʼə̀m yee dzəʼə̀m.

¹⁹ Kí kfə́n a dzə sa jii, mo wìr mòʼón‑eè tavin kitú fo Nyùy, e yiì wír aníne kfə́n ji aŋgàa vinyò ve bi ví, dzə̀ sá mo wùmòʼ woo wír yuun Nyùy, e yiì kinyo ke wù suuyin, kí nen yiì, Nyùy lí wír anín, e nàŋsín ji vee là jay.

²⁰ Ké nsər ki nén a dzə kfə́ jii, Nyùy‑iì fó nsər, a wíri sí yii vinyo ve bi ví ji á fíʼ a yen ajay vév, a shaà bèy. Mo ajayi sí yénsin akuʼùn, dzə̀ sá mo wíri lón fo Nyùy, a wù buʼ áwune, laysìn ajay vév, shaa bèy.

²¹ Kidzə̀m ki nén a dzə jii, mo kinyo ke bi kí yiìn ne, a wíri kù kér fó a kpu, dzə̀ sá mo Nyùy koŋ wíri lèn, li áwune ji wír vee là jay, aá nəə e dzə̀ʼə̀m yee là may. A wù li a dzə̀ wír ve á wáy shilív e Tàr wòsən Jesus Kristu wùn.