Ŋwàʼ woó Rom 2 - ŊWÀʼ NYÙY

Nyùy wíy a tinén nsaʼ wìr mo yì dzəə̀n

¹ A tàm wìr lo lèn, wù wàa roòmè wír ve á yii kfə́ə vinyò vee bey. Wò woo ŋgaà roòmè, kù yòʼ a kiíy ji à kér sa nsaʼ, a fə̀m dzə̀ wò la. Mo à roomè bèy, kfə̀n yii víwun vee vinyo, à roomè a dzə̀ á wo woo jay.

² Vèsən yii bínsi jii, a Nyùy màʼ ŋgeʼ e wír ve á yii kfə́ə vinyò vee shoone, bo wù yiì a réŋ.

³ Mo kí dzəə̀n bey, a dzə̀ wò wo à roomè wír fo vinyò vee shooy, kfə̀n yii sa víwun, à wàa kwàʼtì ji dzə̀ à wìy bòy fo ŋgeʼ ye Nyùy wíy fo moó le?

⁴ A dzə̀ é ghanmóʼ, à wàa kwàʼtì ké jii, mo Nyùy kfəmen, a leéy wíri ji nyaáŋ, a rər mendzən mev, bo bó wù yòʼ wíy màʼ a ŋgeʼ e wò. Aà kwaʼtì bèy, à kù yòʼ a kuumé jii, Nyùy yii lèn bèy a dzə̀ cáʼ ji à fiʼ yèn jay wò, e bìnèr shilív shé.

⁵ Yii bèy, à lo, à nèn tèn fó bìnèr shilív shé, shí kú lóo taaví taavín, à nèn kfə̀n dzə̀sì a dzə̀ ajay, e màysì, e tìnsín shilív shé Nyùy. Aà káv a dzə̀ lòn, mo à wíy nəə́ sho e kishiíy ke Nyùy wíy dìn mo wù yii tínen nsaʼ wìr réŋréŋ mo yì dzəə̀n.

⁶ A dzə̀ jii, wíy lòo dzə e kishiíy foo fèy, é Nyùy wáa fo ké wìr réŋréŋ mo wù yiìn.

⁷ Lóo dzə wír wo wù‑uù rə́si yii a dzə̀ vinyo ve ru ví, leey ji wáa binsí Nyùy, shiy mbùʼmé a dzə̀ wo Nyùy ji wùn Nyùy ku wìy a dzə ghán sidzə̀m, é Nyùy nèn fò ké ŋgaàŋ a dzə̀ dzəʼə̀m yee là may.

⁸ Lóo dzə wír wo wù‑uù rə́si kfə́, táv a dzə̀ kitú, ŋwáy kinyo ke dzəə̀n ke ru kí, tíy a dzə̀ e vé kisaŋ vi, é Nyùy nèn dìn mo wù shwiiy kilòŋ fó vinyò foo fèy, e fò ké ŋgaàŋ a dzə̀ lòn wo biibií.

⁹ Wír ve vé‑eè yii a dzə̀ vinyo ve bi ví adzə̀me wíy nəə́ e ŋgeʼ ye tavín ye dzə̀ á wàa yu nyár, a saŋrí, kìn ŋgaàŋ dzə̀ wír woó Juda ve vé‑eè tòmbìy yù kinyo ke Nyùy, kìn wír woó kitum ke sən kí.

¹⁰ A ké wìr ve vé‑eè yii kév a dzə̀ vinyo ve ru ví kí wíy a dzə jii, Nyùy wíy binsí a kinyo kév, e bùʼ áwune e vikuʼùy və́ ví, aá wáa dzə e wùn ghaŋ ji nyaáŋ, kìn ŋgaàŋ dzə̀ wír woó Juda ve vé‑eè tòmbìy yù kinyo kfə́, kìn wir kitum ke sən kí.

¹¹ Á mo wíri wíy a koóy a dzə̀ mo áwune‑eè yiìn, bìʼ fo Nyùy yii tínen nsaʼ wìr dzə̀m réŋréŋ mo yì dzəə̀n, a bó wù yòʼ nyaʼ wír.

¹² A wìr jày kinyo, a bó ŋgaàŋ yòʼ kì nsər se Nyùy‑iì foon e Mooser, bo wù kù wíy gbù nsaʼ, a bó wù yòʼ fə̀m kì nsər see shooy. Ŋgaàŋ wáa dzə wír woó Juda wo wù kiiyin ne nsər see shooy, bo wù kù wíy gbù kfə́ a dzə̀ bìʼ nsər see shooy.

¹³ A kí dzə̀ bey, bìʼ fo bó yòʼ dzə̀ wìr ghèén fo Nyùy ji wù kì nsər Nyùy. A dzə̀ nsaʼ kù ràn wun cáʼcáʼ bìʼ fo wù lem nsər yee shooy.

¹⁴ Wír ve bó yòʼ dzəə̀n veé Judàa dzə́, a bó á yòʼ fə̀m kì *Nsər Mooser, yii bèy, á lo, á kù yòʼ a yiì vinyo ve á yén ji ve ru ví a dzə̀ fo áwuné vitu, a kù dzə̀ víwun ve nsər suuy ji wíri wáa yiì. Mo á yii bèy, bo áwune sí lem sa nsər see shooy, a bó á yoʼ kìíy a dzə̀ fó ŋwàʼ.

¹⁵ Kí nén a dìn jii, Nyùy‑iì lo wày á nsər see shooy sa aáwuné meliv. Melív mev mè kfə́n a dìn sa bèy, bìʼ fo áwune lóo yiì mo nsər taʼà mè wàa binsí, á lóo shoʼór, mè nèn a saʼ áwune.

¹⁶ A kù dzə̀ mo sáʼka Nyùy wo m fiʼtì və̀n din ji Nyùy wíy tinén nsaʼ wìr dzə̀m. Wíy lòo dzə e kishiíy fóo fèy, é wáa ghemrí Taàtá Jesus Kristu vinyo ve wíri lem aáwuné meliv vidzə̀m, e bó a tinén nsaʼ yev shó.

Nyùy‑iì bùʼ wír veé Juda e nsər

¹⁷ Mo ké wìr ve bó á yòʼ kiìn *Nsər Mooser ki dzəə̀n bey, bo ké ki dzə̀ é le, wò wo à yoŋ kitú ké ji wír woó Juda? À suuy ji à tíy ké vèn à Nsər Mooser, nèn sumrì wún ji à sì wir Nyùy.

¹⁸ Mo vé‑eè yeʼeyin ne wò a dzə̀ nsər yee shoon, à kìíy ne a kinyo ke Nyùy taʼ ji wíri wáa yiì, aà kù tíy ké a dzə̀ é kinyò ke dzəə̀n ke ru kí.

¹⁹ À yén kitú ké feyì ji wír wo wù caacà amfìr, kaʼày wír ve á ghán e ndzə vitsə̀ʼ, a bó á yòʼ kì Nyùy.

²⁰ Yéʼey a wò ambuʼŋgàŋ vee shooy, a kfə̀n merìr wò áwune ve bó á yóʼ ne tùúy e Nyùy kinyò. À kí ké feyì jii, mo à kiìn nsər Nyùy, à kìíy ne a vinyo vidzə̀m, a bó yòʼ dzə̀ à kfə̀n dìn wír kintéŋ ke kinyò.

²¹ M nén a dzər e wò woo shooy jii, à sà kù yòʼ yéʼey wíri bey, yéʼey sa ké kee kitú a? À lo, à wàa fìʼtì ji Nyùy suuy ji lá wìr shòŋ kifá, à kù yòʼ yar saa?

²² Aà kfə̀n suuy ji lá wìr lì wiiy wìr, à kù yòʼ lem saa? À nyaysì anyùy ve wíri cu, kù yòʼ du e virə̀ʼ vé cù foo fèy, taʼ kifá kée bàʼ shuu wó sho a?

²³ À sumrì wún ji à kì á nsər Nyùy, a kù dzə̀ wò, wo à shóʼor nsər yee shooy e dzəə foo fèy, shoor wun woo Nyùy.

²⁴ A dzə̀ kíwun ke vé‑eè saŋen é Ŋwàʼ Nyùy jii, «Wír ve bó yòʼ dzəə̀n veé Judàa leey Nyùy ntéŋ, a kù yii ven vee wír veé Juda.»

²⁵ Kí nén a dzə jii, a vé‑eè lì ne wò e liì woó Juda, e sàŋ *mbèʼ ji à sì wir Nyùy, bo à kù kér fó a lèm sa nsər Nyùy, é bo wù wáa yen náŋsín yee shooy ji kinyo. Là bey, bo yí lày kisáŋ.

²⁶ Wáa dzə wír, á bó á yoʼ nàŋsín bèy e liì woó Juda, a wù yii a dzə̀ kinyo ke nsər Nyùy taʼà, la Nyùy yòʼ lì ŋgaàŋ ji və́ə woo wír wo wù siìn e náŋsín a?

²⁷ Kù dzə̀ mo wír ve bó yòʼ dzəə̀n veé Judàa wíy màʼ ven vee wír veé Juda, bìʼ fo áwune lem nsər Nyùy, a bó á yòʼ fə̀m‑eè lo nàŋsín ji wír Nyùy, a vèn shóʼor kén shóʼórín, a wù‑uù sàŋ é ŋwàʼ, e fò a dzə̀ e vèn, e kfə̀n fò *mbèʼ se saŋén sí ji kisəəm ké wìr və́.

²⁸ Vèn wáa kiíy jii, wìr woó Juda woó rú yòʼ dzə̀ wo á səə̀mèn a dzə̀ fó wùn. A bó náŋsín ye á naŋsin wír rú ji wo Nyùyi yòʼ dzə̀ kifá ke á sáŋ a dzə̀ e ŋgaàŋ wùn mo dzə̀ á yèn.

²⁹ Wìr woó Juda woo rú dzə̀ woo fó shiliv, a dzə̀ ji á nàŋsín a dzə̀ shilív sə́. A kù nàŋsín Kiyoy ke Nyùy, a bó yòʼ dzə̀ nsər ye á saŋen ji á mo wìr wáa yiì, yì nàŋsín. Ku nèn a binsí Nyùy kinyo ke ŋgaàŋ, a bó ŋgaàŋ yòʼ dzəə́ leey ji wáa binsí a wír.