Ŋwàʼ woó Rom 16 - ŊWÀʼ NYÙY

Por shaʼtì wíri

¹ M nén a tàʼ, é vèn kiíy fər wòsən woo wir Kristu wùmòʼ, aá yoŋ ji Febe. Dzə̀ wiíy wo wù rə́si leey fo vé ŋgeʼe e kintatì keé Sencuri.

² Wù wíy wiy fo věn wùn, vèn kù keèrí wun ji fə́r won wùmòʼ é kinyò ke Tàr wòsən Jesus Kristu réŋréŋ mo dzə̀ wír Nyùy, á wàa yiì. Vèn yén, a kinyo ki gháʼ wun, vèn kù sə̀ wun, a kiíy ji wù dzə̀ ben, a wù sə̀ ne wír anín feyì, e kfə̀n sə̀ sá mo.

³ Vèn ku shàʼtì Piisila wùn lum və Akwila e fò e mò. Áwune dzə̀ wír ámóʼó ve vèr áwune tatin, a lìm fo Jesus Kristu.

⁴ Aáwune‑eè lo wày féyì ji a fə̀m dzə̀ kpú, á kù kpù á fo mǒ kitu. A bó yòʼ jòʼsì mo wo m shéʼri áwune gheéy. Vintatì ve wìr Kristu ve ví dzəə̀n é vitum ve bó yòʼ dzəə̀n veé Juda vidzə̀m vi shéʼri sa áwune.

⁵ Vèn lóo shàʼtì, á shàʼtì sá kintatì ke kí dzəʼə̀m aáwuné lav. Vèn shaʼti ŋkar yem tìm yee Epanetur e fò e mò. Dzə̀ wun wir mbìy wo wù‑uù wayin shilív e Jesus Kristu wùn é wòŋ Asia.

⁶ Vèn shaʼti sá Maria wo wù wayin ŋàŋ, a lìm fo vèn ji wun wáa sə ven.

⁷ Vèn shaʼti Andonikur wùn Juniar ve dzəə̀n afə́r vém veé Juda ve vèr áwune‑eè lim sháŋ amòʼón. Áwune dzə̀ aŋgàa ntum Jesus Kristu ve á din vitú vév féyì ji á lim a fo Kristu. A vé‑eè biìmé kinyo kfə́, é bo m wìy sìíy, e biìmé.

⁸ A m kfə̀n shaʼtì sa Ampilatur wo vèr wun koŋnìn bìʼ Tàr wòsən Jesus.

⁹ Vèn shaʼti sá Ubanur wo wù tatin, vèr áwune wáa lìm kinyo ke Jesus Kristu, e shàʼtì sa Shitakir woo ŋkar yem tìm.

¹⁰ Vèn shaʼti sá Apeler wo wù dìnèn ji wun tíy wùn Jesus Kristu kitávín. Vèn kfən shàʼtì wir dzə̀m wo wù dzəə̀n é Aritobulur laʼ.

¹¹ Vèn shaʼti sá Herodiyon woo fə́r wom woó Juda, e shàʼtì aŋgàa biimé adzə̀m ve á dzəə̀n e Nasisur laʼ.

¹² Vèn shaʼti sá vikìy vin, Tifena wùn Tifoosa ve á lim fo Tàr wòsən Jesus Kristu, à ŋkar yem Pesir wo wù lìmèn ne fo Tàr wòsən Jesus Kristu e ŋàŋ.

¹³ A m shaʼtì Rufur wo wù dìnèn kitú kfə́ ji wun dzə̀ wir Tàr wòsən Jesus Kristu feyì, kfə̀n shaʼtì yè wov wo wù‑uù kér mo ghán sidzə̀m moo wán və.

¹⁴ Vèn shaʼti Asəŋkritur wùn à Filegon, à Hemer, à Parobar, à Hemar wùn aàŋgàa biimé ve wùn à wír vìne dzəʼə̀me adzə̀m.

¹⁵ A m kfə̀n shaʼtì sa Filoogur wùn Julia, shaʼtì Nerur wùn jèmèr rə, kfə̀n shàʼtì Olimpar wùn à wír Nyùy ve wùn à wír vìne dzəʼə̀m adzə̀m.

¹⁶ Vèn shaʼnin, é wìr baámé wír moo fə́r və woo wir Nyùy. Vintatì ve Kristu vee fen vidzə̀m vi shaʼtì ven.

¹⁷ Afə̀r vem, m nen kfə̀n a tir ven jii, vèn wáa baàmè a wír ve á ghán, yéʼey vinyo, a bó yòʼ dzə̀ ve vé‑eè yeʼeyin ven shó, bvəər vifií vé wíri, aá javsìn, dzə́ jeéy jeéy. Vèn wáa nyeŋ kfə́ə wìr vee bey,

¹⁸ a kiíy jii, áwune yòʼ lim a dzə̀ á fo Tàr wòsən Jesus Kristu gheéy. Áwune diy a dzə̀ wóv woo shuu. Á lo, á wàa naŋsín kinyo, a fèr, kí wàa nyòm, e nèn a boʼtí wír ve bó á yóʼ ne kìíy vinyo.

¹⁹ Mo wìr dzə̀m fə̀m kiìn ji vèn tíy kitávín é kinyò ke vé‑eè yeʼeyin ven shó, a m shéʼri ven féyì, m ku kfə̀n a tàʼ, e tir ven jii, vèn ku wày vifií, a tàr vinyo vidzə̀m, e fíʼ kiíy ke dzəə̀n ke juŋ ki, e baàmè ke bi kí.

²⁰ Vèn lóo yiì bèy, é Nyùy wo wù yii, a melív mèsən mè dzə́ nyaáŋ, ku nèn màʼ Satan, é vèn kóʼ é kitu wo. M nén a shàʼtì ven, a lon jii, Tàr wòsən Jesus Kristu kú a kòŋ ven, a leéy a fo vèn.

²¹ Timoti wo vèr wun lim lim e mòʼón shaʼtì sa ven. A Lushor, wùn à Jason, à Sosipatar woo fə́r wom woó Juda shaʼtì sa ven.

²² Mo woo Titiyur wo Por shòŋrìn, m sáŋ ŋwàʼ və̀n, shaʼtì sa ven moo fə́r won woo wir Kristu.

²³ Gayur wo mo woo Por shiiy e wùn lav, shaʼtì sa ven, à kintatì ke kí tár a dzə̀ e wùn lav foo fèn ki. Eratur woo ŋgaà kitàv keé mvə̀mlaʼ fèn wùn fər wòsən Kwatur shaʼtì ven. [

²⁴ A m kfə̀n lón ji Tàr wòsən Jesus Kristu kú a kòŋ ven, a leéy fo vèn. Amen.]

²⁵ M nén a way ven a dzə̀ e Nyùy kiwo. Dzə̀ wun wo dzə̀ wù yiì, vèn wàa tiy kitávín, e màysì, e wày shilív e wun wùn. A dzə̀ mo sáʼka Nyùy wo m fiʼtì wùn à vinyo ve á fiʼtì kùm Jesus Kristu vidzə̀m vi limè. Nsàv kinyò ke Kristu rə̀n‑eè dzə̀ é kilìr, e kèʼ fo yàŋgùʼ.

²⁶ Nyùy nen yiì, vèsən kiíy lèn, a dìn fo aŋwàʼ aŋgàa ntum Nyùy mo vé‑eè sí gáʼ fo ŋgùʼ, a fìʼtì lèn e vitúm vi vidzə̀m. Aá kù fiʼtì a dzə̀ mo wun woo Nyùy wo wù dzəə̀n shó ghán sidzə̀m suuyin, é wíri wáa bìnkìr, a way shilív e wun wùn, a yu a dzə̀ fo wun.

²⁷ Kù jòʼsì wun woo Nyùy wo wù kiìn móo sìysì kinyo. Vèsən ku nèn a beè Jesus Kristu, a burí Nyùy ghán sidzə̀m, là may. Amen.