Ŋwàʼ woó Rom 15 - ŊWÀʼ NYÙY

Wìr wáa dìy a dzə̀ kinyo ke fər və

¹ Afə̀r vem, kinyo ke dzə̀ vèsən wàa yiì ki dzə̀ jii, wìr wo wù kiìn ji dzə̀ wun wàa yiì vinyo, la shilív shí yòʼ a saʼ wun fo fo, ku yòʼ màʼtì vinyo vee shooy, e fíʼ sə fə́r və wo bó wù yòʼ kiìn bey. Lá vèsən yòʼ a yiì kinyo ji kí wáa bòŋ a dzə̀ á vèsən.

² Wìr wáa yiì kinyo a dzə̀ ke kí wáa bòŋ a dzə̀ fə́r və, a sə wun, é wù maysi, e wày shilív e Nyùy wùn.

³ Vèn kì sá jii, Jesus Kristu yòʼ‑oò ló a yiì vinyo a ji kú a yu wun vijuŋ. Wù‑uù biìmé kfə́ a dzə̀ kinyo ke vé‑eè saŋen jii, «Liy se vé‑eè shur Nyùy sho si bìnkìr, e kfə̀n a dzə̀ e mǒ kitu.»

⁴ Vinyo ve vé‑eè saŋen é Ŋwàʼ Nyùy fo mbìy vi‑iì dzə̀ ji ví wáa yeʼéy vèsən, a lùmèr melív mèsən, é vèsən wáa yeʼtí a dzə̀ e Nyùy wùn, a leéy fó mbìy, a yu a dzə̀ fo wun.

⁵ A m lón ji wun woo Nyùy wo wù lumèr melív mèsən, yii, a vèsən yéʼti a dzə̀ e wun wùn və̀n kú a yiì, é vèn wáa dzə, é wìr wáa yiì kinyo e fər və, a dzə̀ mo Jesus Kristu‑uù yii.

⁶ Vèn lóo yiì bèy, é vèn nèn a dzə kijuŋ, a dzə shuu e mòʼón, e tatí, a sùyrì Nyùy woo Tàr à Taàtá wòsən Jesus Kristu.

Jesus Kristu‑uù wìy, e dìy wir dzə̀m

⁷ Kí nén a dzə jii, vèn wáa lì wir dzə̀m e věn wùn réŋréŋ mo Jesus Kristu‑uù liìn ven, é wíri lóo yen, aá nèn a burí Nyùy.

⁸ Vèn wáa kiíy jii, Kristu‑uù wìy, e lì kitú kfə́ ji wánlè wìr veé Juda, e fíʼ dìn aáwune ji Nyùy kù yii yii kinyo ke wù kàʼàn, a wù yiì ne kíwun lèn ke wù‑uù kàʼàn atǎr ram vév vee fó mbìy sho.

⁹ Wù kfən wìy sa ji wun yii, é wír ve bó yòʼ dzəə̀n veé Judàa luŋ sá, a sùyrì Nyùy bìʼ mendzən me Nyùy kér fo áwune. A dzə̀ mo vé‑eè saŋen é Ŋwàʼ Nyùy jii: «M yíi a nàn vikuʼùy vé, e vitúm ví mvəm. M yíi a yòv, a wùʼsì yír yé.»

¹⁰ Aá kfə̀n‑eè sàŋ sá jii: «Haà vitum, vèn à wír Nyùy Tàrí tátí, a sheʼrí.»

¹¹ Á kfən sàŋ jii: «Vitúm vidzə̀m, vèn wáa burí Nyùy Tàr. Rám e dzə̀me wáa sùyrì wun.»

¹² Aysaya kfən sùúy jii: «Taà saʼ wo fíy wíy fəə fo Jessi ram. Dzə̀ wun wo wù wíy saʼ vitúm ve bó yòʼ dzəə̀n veé Isray, aá wíy way vifií é wùn wó ji á luŋ fó fo.»

¹³ M nén a lon jii, Nyùy wo vèsən shiy ji wù wíy lùŋèr vèsən və̀n ku yiì, é vèn maysi, e wày shilív e Jesus Kristu wùn, é kishéʼrì ki rún e věn meliv, é mè wáa dzə nyaáŋ. Vèn lóo yiì bèy, é Kiyoy ke Ranén kí kfə́n a tavír melív men, é vèn wáa dzə, a leéy a dzə̀ fó mbìy, a shìy ŋkàʼme Nyùy, é wù luŋer ven.

Por naarì lim rə́

¹⁴ Afə̀r vem, m sáŋ vinyo vìn bèn, a m kì kijuŋ ji vèn kìíy ne vidzə̀m, a vèn kér shilív she juŋ shi fó a yiì mo Nyùy taʼà, a vèn mèé ne mo dzə̀ wìr yèʼéy wùmòʼ woo wír.

¹⁵ Yii bèy, m lo ŋeèvì vímóʼ vee vinyo, e sàŋ é naáy naáy, a m kì kuúme kuùmén. A m sáŋ a dzə̀ mo dzə̀ m kù sàŋ, bìʼ fo dzəə̀n wóom woo mbùʼmé wo Nyùy bùʼùn mo shó.

¹⁶ Wù‑uù lì mo ji m wáa dzə ŋgaà ntum Jesus Kristu, a fìʼtì sáʼka və wo juŋ e wír ve bó yòʼ dzəə̀n veé Judàa. A m fiʼtì bèy ji Kiyoy ke Ranén kí fiʼ bìnèr áwune, aá wáa dzə wír wun woo Nyùy, é m wáa dzə kém moo taà cù wo wù báʼti áwune, e cù Nyùy sho, é wù wáa kòŋ.

¹⁷ A dzə̀ m wàa tuy shwín fó lìm ye Nyùy foon e mò rən. A m túy moo wír wo wù gheenen é lìm fèn a dzə̀ bìʼ Jesus Kristu.

¹⁸ M ku nèn a fèr kinyo a dzə̀ ke Jesus Kristu yiìn, m wáa yiì, kìn dzə̀ kinyo ke m fiʼtì fìʼtìn, kìn ke m yii yiìn, wír ve bó yòʼ dzəə̀n veé Judàa bínkír anín, a yu lèn a dzə̀ fo Nyùy.

¹⁹ A wù lo, wù yiì, m wàa yiì viŋgaʼnìn ve vinyò, a ví din vitaáví vé Nyùy, kfə̀n yiì, m wàa fìʼtì kinyo, Kiyoy ke Ranén kí wàa lùmèr melív me wíri, á wàa biimé. A kù dzə̀ mo mò‑oò kèʼèn fó Jerusalem, a ghan, a fìʼtì sáʼka Nyùy woo kùm Kristu feyì, e dù bèn, e dù, e mèé e wòŋ woo Ilirikum, wìr dzə̀m wáa yu.

²⁰ Mo m ghán bèy, kém kí kù dzə̀ jii, m wáa fìʼtì sáʼka wo juŋ və̀n a dzə̀ fo bó á yóʼ ne yù kinyo ke Kristu gheéy, fo m kfən dù, a bàʼrì e wìr wo sə́n kinsə̀ŋ.

²¹ A m yii a dzə̀ mo vé‑eè saŋen jii: «Wír ve bó á yòʼ‑oò yiì ne fìʼtì kinyo aáwune, á wíy yen mo kí dzəə̀n, é wír ve bó á yòʼ‑oò yiì ne yù, aá kiíy mo kí dzəə̀n.»

Por siysì ghán yeé Rom

²² Kù‑uù jívir ghán yee shoon fo m tav wìy, e yèn ven é Rom.

²³ Á bèy lèn, mo m màysìn ne lim yeé virə̀ʼ fen, a mò‑oò sí kwaʼtì fo bǎm viya vímóʼ ví ji m wiy, e ghàn ven,

²⁴ á lèn wo m kwaʼ ji m kù sí yìi yen a ven. A dzə̀ jii, m wíy lòo dù e wòŋ woo Spen, é m shaa, e ghàn ven. Vèsən dzəʼtì shishàr, shilív shí rəsìn mo, é m nèn tòsín. Lóo dù, ghan símóʼ sí, é vèn koóy kifá kée sə mo shó, é m du, e mèé fo.

²⁵ Yii bèy, lèn və̀n, a m kér fó dù e Jerusalem ji m fó á kifá ke á baʼtin ji á sə́ wír Nyùy vee fó sho.

²⁶ Mbàm sìn si dzə̀ se vintatì veé Masedonia wùn à veé Akaya vi‑iì kér shilív she juŋ shi, e sùʼtì ji á sə́ aŋgàa biimé ámóʼó ve á yén ŋgeʼ e Jerusalem.

²⁷ Kù‑uù kwàʼtì áwune, e sìysì kee shooy. A dzə̀ mo dzə̀ áwune kù yiì bèy, bìʼ fo sáʼka woo kùm Jesus Kristu‑uù loòn a dzə̀ fo wír veé Judàa, é bo á wáa fìʼtì aáwune ve bó yòʼ dzəə̀n wír veé Juda, aá wáa dzə sa wír Nyùy lèn, a yu vijuŋ. Mo áwune yú vijuŋ a dzə̀ bìʼ wír veé Juda, Nyùy fó áwune kifá, á sə́ sá wír veé Juda sho.

²⁸ Kí nén a dzə jii, m wíy dù, wáy mbàm sìn aáwuné kiwo, é m nèn lì dzə́ə, a dù e wòŋ woo Spen. Lóo dù, é m shaa, e ghàn ven.

²⁹ A m kì kijuŋ jii, m wíy wìy, é Jesus Kristu yii, é vèn maysi, a yu vijuŋ fo wùn vinyò ve m yíi a fèr e vèn.

³⁰ Afə̀r vem, m nén a lon jii, mo vèsən à Tàr wòsən Jesus Kristu tatin ne, Kiyoy ke Ranén kí wáa yiì, vèsən wáa kòŋnìn, vèsən ku tàtí sa, a bùnrì, a lon fo Nyùy jii,

³¹ m lóo dù e Jerusalem, lá wír veé Juda ve á tún kinyo ke Kristùu yòʼ yiì mo e kinyo ki. Vèn kfə́n a lon sa jii, wír Nyùy vee fóo ghár kifá ke m du sho kìn, kí kù sə̀ áwune, aá wáa yu vijuŋ.

³² M du bèy, Nyùy sə́, é m nèn tòsín, e wìy, e yèn ven, é vèsən dzəʼti kisəʼtìn kimòʼón, é m wáa yu vijuŋ.

³³ M nén a lon jii, Nyùy wo wù yii, a melív mèsən mè dzə́ nyaáŋ kú a dzə e věn mvəm, a leéy a fo vèn. Amen.