Ŋwàʼ woó Rom 13 - ŊWÀʼ NYÙY

Wír Nyùyi wáa yu sáʼ yeé wòŋ

¹ Kímóʼ kí nén a dzə jii, wìr dzə̀m kér sa fó a yu sáʼ yeé wòŋ, bìʼ fo bó yòʼ dzə̀ woŋ wú wàa ker sáʼ, a bó Nyùy kì fó fo. A bó sáʼ yímóʼó yòʼ dzə̀ é kirə̀ʼ kímóʼ kí, a bó yòʼ lèm Nyùy.

² A wìr lò, a meŋ sáʼ yeé wòŋ, bo ŋgaàŋ méŋ a dzə̀ kinyo ke lèmèn Nyùy, a wù kù yíi nəə́ e ŋgeʼ.

³ A dzə̀ mo dzə̀ kí kù a dzə bèy, é wìr wo wù bívir nsər fíʼ a fàn ŋgaà nsər. A bó yòʼ dzə̀ wír wo wù lem nsər wù kfə̀n a fàn. Kí nén a dzə jii, a wìr taʼ ji lá wun yòʼ a ghan, a fàn, wù wàa lèm a nsər, é wùn à woŋe nèn a dzə kijuŋ.

⁴ Lèm Nyùy ŋgaà saʼ ji wù wáa leéy a fo wíri, aá wáa dzə kijuŋ. Yii bèy, a wìr lò, a yiì kinyo ke bi kí, bo dzə̀ wù kù a fàn ŋgaà nsər, bìʼ fo dzə̀ wù wày wun e ŋgeʼ. A wù yii lim yee shooy, a dzə̀ mo Nyùy sìysìn ji wù wáa yiì.

⁵ A dzə̀ wìr kù a yu nsər se wòŋ, bìʼ fo foon Nyùy vitaáví ji dzə̀ vé saʼa wày wun e ŋgeʼ, e kfə̀n a yu sa bìʼ fo dzə̀ kitú kfə́ kí kù a saʼ wun ji dzə̀ á kilíŋ kfə́ fó a yu.

⁶ Á kinyo kìn ke kí yiìn, bo vèn wáa màʼ mbàm se vé saʼa náŋsin woŋ sho. Aá kù leey a dzə̀ fo vèn mo Nyùy‑iì sìysìn.

⁷ Vèn ku nèn a yiì mo dzə̀ á wàa yiì e vé wòŋe. Lóo dzə wo á maʼ mbàm sho, vèn màʼ shó, kìn dzə̀ se wìr maʼ bìʼ kitú kfə́, kìn dzə̀ see bìʼ kéŋ rə́. A dzə̀ wo dzə̀ vèn wàa yu fo fo, a ghvəm, vèn wàa ghvəm.

Wìr wáa kòŋ fə́r və

⁸ Lá wìr yòʼ a ker káa yímóʼó wùn wìr, e shaà yé kikòŋnìn. A dzə̀ mo vèn kú a kòŋnìn bèy, bìʼ fo wìr wo wù koŋ fə́r və sí yii a dzə̀ mo nsər Nyùy taʼà.

⁹ Nsər sə́ sidzə̀m si tàtí a dzə̀ é kitu ke nsər fèn, a dzə̀ jii, «Wìr wáa kòŋ fə́r və mo wù koŋ kitú kfə́.» A wìr yii bèy, la wù yòʼ dzəə bìvír nsər see jii, «Lá wìr yòʼ lì wiiy wìr, kìn ji wiíy wáa ghan viŋkar. Lá wìr yòʼ yùyrí wír. Lá wìr yòʼ a shoŋ vishóŋ. Lá wìr yòʼ siìmé kifá ke dzəə̀n ké wìr wùmòʼ.»

¹⁰ A wìr koŋ fə́r və, la wù yòʼ dzəə yiì kinyo ke bi kí shó gheéy. Wìr lóo kòŋ fə́r və, bo ŋgaàŋ sí yii a dzə̀ vinyo ve nsər taʼ vidzə̀m.

¹¹ A dzə̀ vèn kù a yiì vinyo vìn vidzə̀m, bìʼ fo vèn kiìn mo ghán sí dzəə̀n lèn. Ghán sí bàŋrìn ne, a Tàr wòsən Jesus Kristu sí wìy a kfən. A dzə̀ vèn yìmèn, bìʼ fo ghán see shooy si siìn fó mentsə̀m lèn, e shaà ghán se vèsən‑eè tòmbìy tàtí vèsən áwune.

¹² Ndzə sí ráné, a shùy tó. Vèsən maʼti vinyo ve á yii yii a dzə̀ vitsə́ʼ, e bàʼtí wún wósən, a dzə, a yiì vinyo ve á yii yii a dzə̀ e shùy moo wír wo wù báʼti vifá ve rər ji wun fəə́ e shùu rər.

¹³ Vèsən wáa ker liì a dzə̀ wo wìr veé ndzə ye ranén. Lá vèn yòʼ a ghan, a no a dzə̀ meluʼ, a yi vitú. Lá vèn yòʼ a jàŋ kinjàŋ, a yiì joonè woo bey. Lá vèn yòʼ a nyàmnìn. Lá wìr yòʼ a ghèʼ sa wír.

¹⁴ Vèn wáa yu a dzə̀ fo Tàr wòsən Jesus Kristu. Lá vèn yòʼ a yu a dzə̀ mo mensə́ mè báyri ven, fo mè ŋáʼár melív men, é vèn wáa yiì mo mè taʼà.