Ŋwàʼ woó Rom 12 - ŊWÀʼ NYÙY

Mo dzə̀ wìr fò kitú kfə́ e Nyùy

¹ Afə̀r vem, mo Nyùy rə́si shám vèsən é ŋàŋ ben, m nén a lon feyì jii, vèn ku tàtí vitú vén adzə̀m, e fò e Nyùy, a dzə, a yu a dzə̀ fo wun. Vèn ku yiì bèy ji vèn wáa dzə a moo kifá ke á liìn, e cù Nyùy sho, wù wáa yu vijuŋ. Á dzə́ə yee réŋ ye dzə̀ vèn fò melív men e Nyùy, a bùnrì fo fo.

² Vèn wáa yen fo ndzə bóʼtí ven, é vèn wáa yiì vinyo ve wír veé ndzə fène yii. Vèn kú a yu a dzə̀ fo Nyùy, é wù sheŋri melív men, é vèn wáa kwàʼtì a dzə̀ vinyo və́. Vèn lóo yiì bèy, lóo yiì vinyo ve vèn yii vidzə̀m, é vèn nèn a kiíy mo Nyùy taʼ ji vèn wáa yiì. A dzə̀ ve ví dzəə̀n vijuŋ, e kfə̀n a dzə ve ru ví, a bòŋ wun.

³ Mo moo wír wo Nyùy tumen, e yiì, m wáa kiíy vinyo və́, m nén a tàʼ, e tir ven mo dzə̀ vèn wàa yiì. Wìr mòʼón mòʼón wáa yen fó a lì kitú kfə́, é kí wáa kuy, a shaà mo wù dzəə̀n. Vèn wáa lò ji weè, a səʼə́m, é wìr mòʼón mòʼón wáa tiy a dzə̀ é ntuʼ ye wù wayin shilív shó ji fò á Nyùy ji wun wáa yiì.

⁴ Vèn li mfìʼ fo wìr wùn. Wúné dzə̀ vibar vinín jeéy jeéy, a kimòʼón kimòʼón ki kù kér rə́ yee lim.

⁵ Kù dzə̀ sá réŋréŋ mo vèsən loòn wír anín jeéy jeéy, vèsən à Jesus Kristu tátí, a dzə ji wún e mòʼón, a wìr tóm wír, a wìr tóm wír.

⁶ Mo Nyùy bùʼùn vèsən é dzəə sí dzəə sí, wìr mòʼón mòʼón ku nèn a yiì kinyo ke Nyùy wayin e wùn kiwo. A dzə̀ ji wìr wáa fìʼtì a dzə̀ kinyo ke Nyùy, wù wàa fìʼtì mo wù wayin shilív, Nyùy sə́ wun, wù wáa fìʼtì.

⁷ A ŋgaàŋ sə́ a dzə̀ kintatì, wù wàa tiy a dzə̀ shó. Kìn wù duŋrì kinyo ke Nyùy, wù kù a tiy sa sho.

⁸ Wìr wáa dzə, a mbùʼmé və dzə̀ ji wù wáa lùmèr melív me wíri, wù kù a yiì a dzə̀ kíwun. Kìn dzə̀ wo Nyùy bùʼùn e vifá vi ji wù wáa sə wíri shó, wù wàa ker kiwó kfə́ tèéter. Wìr wo wù leey fo wíri, ku wày shilív, a leéy fo fo kijuŋ. A wo wìr dzə̀ ji wù wáa rəə̀r melív me aŋgàa ŋgeʼ, wù wàa rəə̀r, a ŋwàŋ.

Mo dzə̀ wír Nyùyi wàa kòŋnìn

⁹ Vèn wáa kòŋ wíri rú e shilív shí, lá vèn yòʼ a suúy a dzə̀ fó shuù. Vèn wáa leʼ kinyo ke bi kí, a ghar a dzə̀ ke juŋ ki.

¹⁰ Vèn wáa kòŋnìn mo wìr yii koŋ fə́r və, é wìr wáa yen wír, a shaà kitú kfə́.

¹¹ Lá vèn yòʼ a yiì ŋgòy. Melív men mè kú a baári fo Nyùy ghán sidzə̀m, é vèn wáa yiì lim rə́.

¹² Vèn kú a kuumé vinyo ve Nyùy kàʼàn ven shó vi, a sheʼrí. Ŋgeʼ ye tavín lóo koóy, vèn kù a dzə ji nyaáŋ, a yu a dzə̀ fo Nyùy. Vèn wáa bùnrì ghán sidzə̀m.

¹³ Wìr yén, a fər və woo ŋgaà biìmé búŋ kifá, wù kù kòóy kifá, e sə̀ wun sho. Vèn kfə́n a səəsí afə́r vén e věn melav.

¹⁴ A wíri dzə wúu yén ji bìʼ fo vèn dzəə̀n wír Kristu, lá vèn yòʼ a lon ji Nyùy shóv á áwune. Vèn kù a lon a dzə̀ ji wù wàá shám á wír vee shooy.

¹⁵ Wíri lóo sheʼrí, vèn áwune wàa sheʼrí adzə̀m. Á lóo sòv kitú, vèn áwune wàa sòv adzə̀m.

¹⁶ Vèn wáa sham wir dzə̀m réŋréŋ. Lá vèn yòʼ a koʼór wún. Vèn kú a koo viŋkar vèn à wír vee fó tèri. Lá wìr yòʼ a dìn ji kù kì wun vinyo.

¹⁷ Wìr yii kinyo ke bi kí e wìr, lá ŋgaàŋ yòʼ siìr. Vèn wáa yiì kinyo a dzə̀ ke wíri wáa yen, é kí wáa bòŋ.

¹⁸ A fə̀m kooy ka ven, vèn kù a mùm ke dzə̀ vèn mùm ji vèn à wíri wáa dzə a nyaáŋ.

¹⁹ Ŋkar sem, lá vèn yòʼ a siìr ŋkfə́tír. Vèn maʼti, é wáa siìr Nyùy kinyo ke wìr e ŋgaàŋ. A dzə̀ mo vé‑eè saŋen ji Nyùy suuy a jii, «Kù wíy siìr mo ŋkfə́tír, e màʼ ŋgeʼ e ŋgaàŋ kitu.»

²⁰ Ke dzə̀ vèn wàa yiì ki dzə̀ ke vé‑eè saŋen sá jii, «A jìŋ yár ŋgaà wò vibàn, à fò vifá ve yi sho. Kilòŋ kí wáa yúm wun, à fò mendzə́v shó, é wù nó. À yii bèy, é dzə̀rkìtu koó wun.»

²¹ Kidzə̀m ki nén a dzə jii, lá vèn yòʼ fò á kintóʼ e kinyo ke bi kí. Vèn wáa yiì vinyo ve juŋ vi, a so ve bi ví shó.