Ŋwàʼ woó Rom 10 - ŊWÀʼ NYÙY

Wír veé Israyi màʼày Kristu, e jày dzə́ə

¹ Afə̀r vem, kinyo ke kí tíy e mǒ shiliv féyì, a m lón fo Nyùy ki dzə̀ jii, wír veé Isray vìne ku waà wìy lùŋ.

² A kinyo ke m kiìn ke dzə̀ m wàa suúy ki dzə̀ jii, áwune wày ŋàŋ féyì, a mùm a ji á fiʼ ghèén fo Nyùy. Aá mum bèy, e làa yòʼ a kiíy a dzə́ə yee réŋ.

³ A kí dzə̀ jii, áwune yòʼ‑oò ló a səə̀m a mo Nyùy yii ghán, e bó a naŋsín wír, é wù wáa gheén fo wun. Áwune ló fó fo, e nèn a mùm a dzə̀ yéev yee dzə́ə. Á yií bey, e nèn màʼày dzə́ə ye yì‑iì sìysìn Nyùy mo dzə̀ wìr ghàn, e bóo fíʼ gheén fo wun.

⁴ Mo Jesus Kristu wìyìn, e ndzəə̀r dzə́ə ye wíri‑iì rə́si mum sho fo nsər ji á fíʼ gheén fo Nyùy, é kí wáa dzə lèn a ji wír ve dzə̀ Nyùy lì, e nàŋsín ji vee là njòó dzə̀ á ve á wáy shilív a dzə̀ e wun woo Kristu wùn.

Nyùy lém dzə́ə ji dzə̀ wìr dzə̀m lùŋ

⁵ A Mooser‑iì lo yiì sùúy mo dzəə̀ ye dzə̀ wìr ghàn a dzə̀ fo nsər, e bóo gheén fo Nyùy rə̀n dzəə̀n. Wù‑uù sàŋ jii, «Wìr wo wù ŋeevì nsər sidzə̀m, yii mo sí dzəə̀n, wíy lùŋ.»

⁶ A kinyo kee kùm dzə́ə yee ji wìr wáy shilív e Nyùy wùn, e bóo gheén fo wun, kí yòʼ dzə̀ ji wìr wáa kwàʼ fo wùn shiliv jii, wìr kér fó tàʼ Kristu fo yuv, é bo wù sə́ wun. Vé‑eè sàŋ jii, «A dzə̀ kòʼ la é yuv?»

⁷ A bó yòʼ dzə̀ sá ji á kér fó tàʼ fo aŋkfəə́ wòŋ, bìʼ fo vé‑eè saŋen sá jii, «A dzə̀ sə̀y la áàŋkfəə́ wòŋ?»

⁸ Ke kí dzəə̀n kí dzə̀ ke vé‑eè saŋen jii, «Kinyo kìn ki dzə̀ e věn mentsə̀m, kfə̀n a dzə e věn shuù, e kfə̀n a dzə sa e věn meliv.» A dzə̀ kíwun ke vèr fiʼtì lèn ji wíri wáa way shilív e Jesus Kristu wùn.

⁹ A kí dzə̀ jii, a wìr fiʼtì fo wùn shuù ji Jesus dzə̀ Tàr wov, e kfə̀n biìmé fo wùn shiliv ji Nyùy‑iì lo fə̀ə́r Jesus fo kpu, Nyùy nèn lì a ŋgaàŋ ji və́ə woo wír, wù wìy lùŋ.

¹⁰ A kí dzə̀ bey, bìʼ fo Nyùy li wír, náŋsin ji woo là jay a dzə̀ mo wù yén, a wù wáy shilív e Jesus wùn. Ŋgaàŋ kfə́n lóo fìʼtì fo shuù, kí nèn a dìn ji wù lùŋ a ne.

¹¹ A dzə̀ mo vé‑eè saŋen é Ŋwàʼ Nyùy jii, «Wìr dzə̀m wo wù wáy shilív e Nyùy wùn yòʼ wíy jaáy.»

¹² A kù dzə̀ mo ké wìr dzə̀m ki dzəə̀n, kìn ŋgaàŋ dzə̀ wír woó Isray, kìn bó yòʼ dzə̀ woó Isray. A kí dzə̀ bey, bìʼ fo kù jòʼsìn Jesus wo dzəə̀n Tàr à wír vìn adzə̀m, a wù shám wír ve á tóŋ fo wun adzə̀m, buʼ e vijuŋ və́ ví.

¹³ A dzə̀ mo vé‑eè saŋen jii, «Wìr dzə̀m wo wù tóŋ fo wun wo dzəə̀n Tàr wíy lùŋ.»

¹⁴ Yii bèy, a dzə̀ wír ve bó á yòʼ wáy shilív é wùn wó, á wàa toŋ fo fo e le? A bó yòʼ dzə̀ sá, á wày shilív e Jesus wùn, a bó á yóʼ ne yù kinyo kfə́. Aá fə̀m kì yú, á yù é gha, là ŋgaà fìʼtì?

¹⁵ A yòʼ dzə̀ wìr dù, a fìʼtì e le, a bó á yoʼ tùm wun? Vé‑eè lo sàŋ é Ŋwàʼ Nyùy jii, «Feyì feyì, dzə̀ kinyo ke juŋ ki fóo yen aŋgàa ntum, aá wiy, fiʼtì sáʼka wo juŋ.»

¹⁶ Yii bèy, aá kù yòʼ‑oò lo fìʼtì sáʼka Nyùy wo juŋ və̀n e wír veé Israyi, la wìr dzə̀m yòʼ wày shilív shó gheéy, réŋréŋ mo *ŋgaà ntum Nyùy woo Aysaya‑aà suuyin jii, «Tàr, wìr dzə̀ shó wo wù biimen ntum ye vèr tiísi a?»

¹⁷ Kidzə̀m ki wáa dzə jii, a dzə̀ wìr kù yù kinyo ke Kristu, e bóo way shilív é wùn wó, a wù yú a dzə̀ bìʼ fiʼtì.

¹⁸ M nén a ghay jii, sà dzə̀ ji wír veé Israyi yòʼ‑oò lo yù rú á? Vé‑eè lo yù féyì réŋréŋ mo vé‑eè saŋen jii: «Jí se vé ntume sí‑iì dùnìn kitú ke nsay kidzə̀m, sáʼka wov ghánén vitóŋtóŋ vé ndzə vidzə̀m.»

¹⁹ M nen kfə̀n a ghay ji á sà‑aà yú bèy, e làa yòʼ a kiíy a? Vé‑eè ló a kiíy, e bó a ten. A dzə̀ mo Mooser‑iì saŋen ji Nyùy suuy a jii: «M wíy bùʼ wír ve á yoʼ mèé e kitum, é vèn wáa yu nyár yév. M wíy koʼór ambuʼŋgàŋ, é vèn wáa shwiíy kilòŋ.»

²⁰ Aysaya kfən màysì, e tòʼ féyì ji Nyùy suuy a jii: «Wír ve bó á yòʼ kì taʼ mo, á lò ne, e fùʼ mo. A m yiì ne, áwune ve bó á yòʼ‑oò dzə́ti mo, á yén mo.»

²¹ A Nyùy suuy ké wìr veé Isray jii, «M kù rə́si shiy wír vìn ji m mán vinyo vév, aá kù táv kitú, fáŋnin fàŋnín.»