Ŋwàʼ woó Rom 1 - ŊWÀʼ NYÙY

Por naarì mo wù tíy e kinyò ke Jesus Kristu

¹ Ŋwàʼ və̀ne sàŋ mo woo Por, a m dzə̀ kém ji ŋgaà lìm Jesus Kristu. Wù‑uù lì mo ji m wáa dzə ŋgaà ntum və, e lèm ji m wáa fìʼtì a sáʼka Nyùy wo juŋ.

² A Nyùy‑iì lo kàʼ vèsən e sáʼka və̀n fo ŋgùʼ, e yiì, aŋgàa ntum vəə́ sáŋ ŋkàʼmé woo shooy e ŋwàʼ wo dzəə̀n ji və́.

³ A dzə̀ sáʼka woo kùm Wán və wo wù‑uù liìn mbom wìr, á dzəə́ wun e Fòn Davir ram.

⁴ Wù biímé kinyo ke Tàr wov Nyùy shilív shidzə̀m, e wìy kpù, Nyùy nèn fə̀ə́r wun woo Taàtá wòsən Jesus Kristu və̀n fo kpu, e dìn ji Wán və wo wù sí tíy vitú fo vifá vi vidzə̀m.

⁵ A dzə̀ wun woo Jesus Kristu wo wù‑uù bùʼùn mo ji m wáa dzə ŋgaà ntum və, a ghan e wùn yir, a fìʼtì kinyo ke Nyùy e vitum ve bó yòʼ dzəə̀n veé Juda vidzə̀m, é wíri fíʼ a way shilív e Nyùy wùn, a yu a dzə̀ fó fo.

⁶ Vèn nén a dzə sa ámóʼó vee wír ve dzə̀ m kù fìʼtì sáʼka və̀n sho. A dzə̀ ven vin ve Nyùy shavin ne ji wír Jesus Kristu.

⁷ M nén a saŋ ŋwàʼ və̀n fo vèn adzə̀m ve á dzəə̀n é Rom, ve Nyùy shavin ne ji və́ vee wír, e wày e wùn shiliv. M wáa shàʼtì ven, a lon jii, Nyùy woo Tàr wòsən wùn Taàtá wòsən Jesus Kristu kú a kòŋ ven, a leéy fo vèn, a yiì, é melív men mè wáa dzə nyaáŋ.

⁸ A dzə̀ m kù tòmbìy fèr mo m shéʼri feyì, bee Taàtá Jesus Kristu, beerì Nyùy wo wù kér mo, bìʼ fo wíri sí yú virə́ʼ vidzə̀m mo vèn wayin shilív e Jesus Kristu wùn, a tiy vèn áwune.

⁹ M suuy bèn, a Nyùy wo m foon kitú kém shó, a fìʼtì sáʼka və wo juŋ woo kùm Wán və kì ji m suuy a rú. M yii lóo bùnrì ghán sidzə̀m, m kù a kuumé ven,

¹⁰ a lon ji Nyùy ku mvə̀ʼ dzə́ə, é m wiy lèn, e ghàn á ven.

¹¹ A m kér shií fó yen ven féyì, e fíʼ dìn vinyo vímóʼ ví e vèn, é Kiyoy ke Nyùy ki yii, é vèn maysi, e wày shilív e Nyùy wùn.

¹² A kí dzə̀ jii, m taʼ ji m wiy, é vèsən sə́nín vitú. M lumèr melív men, mè lóo lùm, é shém shí wáa lùm sa.

¹³ Afə̀r vem, vèn wáa kiíy jii, m yii wáy e ghan sí, ghan sí ji m wiy, e ghan ven, e fíʼ bìnèr wír ámóʼó fo věn wòŋ, aá wáy shilív e Kristu wùn réŋréŋ mo m binèr sa e vitum vímóʼ ví ve bó yòʼ dzəə̀n veé Juda, kinyo ki kù jìvír.

¹⁴ A dzə̀ lim ye dzə̀ m kù a yiì e wír adzə̀mé mvəm. Kìn dzə̀ wír veé wòŋ wo wú mvə̀ʼə̀mèn ne, kìn veé wòŋ woo là mvəʼə̀m. Kìn dzə̀ wír ve á kiìn ŋwàʼ, kìn ve bó á yòʼ kiìn.

¹⁵ Á kinyo ke kí yiìn, bo m wáa ker shií fó wìy, e fìʼtì sáʼka Nyùy wo juŋ sa e vèn vee wír veé Rom.

¹⁶ A bó yòʼ dzə̀ m wàa woomé fó a fìʼtì gheéy, bìʼ fo m kiìn féyì ji dzə̀ á vitaáví vé Nyùy, a ví yii, á lóo fìʼtì, wíri wàa way shilív e Wan və́ wùn, wun woo Nyùy wàa lùŋèr áwune adzə̀m, kìn dzə̀ wír veé Juda ve kinyo kìn ki‑iì dzəə̀n kév fó mbìy, kìn vitúm ve ví yú kév a dzə̀ lèn.

¹⁷ A kí dzə̀ jii, sáʼka Nyùy wo juŋ və̀n din mo Nyùy mán vinyo ve wìr, li ŋgaàŋ ji wír woo là jay. A wù li a dzə̀ wír wo wù wayin shilív e Wan və Jesus Kristu wùn, a bó dzəə̀ yìmòʼ yòʼ kfə̀n dzə̀ shó gheéy. A dzə̀ kíwun ke vé‑eè saŋen é Ŋwàʼ Nyùy jii, «Wìr wo wù wayin shilív e Nyùy wùn, wù lí ŋgaàŋ ji wír woo là jay, dzə̀ wo wù wíy lùŋ.»

Wíri méŋ Nyùy, yii vinyo ve bi ví

¹⁸ Nyùy kfə́n a dìn sa jii, mo wíri méŋ wun, yii vinyo ve bi ví, shilív shí nyár wun a feyì. A wun wíy tsənsí ŋgeʼ fo yuv e wír ve á yii bèyi adzə̀m, ve á téʼtin wíri fo á kiíy kinyo ke dzəə̀n ke ru kí.

¹⁹ A wù yii bèy, bìʼ fo wù‑uù lèmèn ne visəəm é ndzə fèn vinín, ví wáa dìn kijuŋ mo wun woo Nyùy dzəə̀n, a kù kfə̀n naarì wun e wíri mo ví dinè.

²⁰ Kèʼ fo ghan se wù‑uù bomen ndzə, wù‑uù lo yiì, wíri yén ji wun dzə̀ rú á Nyùy, a bó vitaáví və́ ví yòʼ dzə̀ á ví mày. A bó wù yòʼ din kitú kfə́ e wíri, bo á wáa kiíy mo wù dzəə̀n. Á kù yén a dzə̀ fó vifa ve wù‑uù bomen. Mo wíri kiiyin ne mo Nyùy dzəə̀n, bo bó yòʼ dzə̀ áwune kfə̀n a ker kinyo kee wovrí fo vinyò ve bi ve á yii gheéy.

²¹ Mo áwune fə̀m kiìn Nyùy kijuŋ, bó á yòʼ koŋ a ghvəm mo dzə̀ wíri wàa ghvəm Nyùy, a bó á yòʼ koŋ sa, a beèrì wun fo vinyò ve wù rə́si yii aáwune vidzə̀m. Á ló fó fo, e bùŋ vifií vé a səə̀m vinyo ve dzəə̀n ve ru ví, e nèn a jìŋ jìŋèn, a kwàʼtì a dzə̀ vinyo ve kisaŋ vi.

²² Áwune lo, á kfə̀n a nə̀ʼ wún ji á kì vinyo, a bó á yòʼ kì tsə̀r gheéy.

²³ Á nen shaà Nyùy woo Ŋgaà Vitaàví wo wù gòʼòn kàŋ mòʼón, a ghvəm a dzə̀ vifá ve á fèrìn férin, ví wáa shwinín wír wo dzəə̀n kifá, a kí wíy kpu, bo taaka a shwinín shinə́n, a shwinín nyám, a shwinín yó.

²⁴ Nyùy yén bey, e nèn màʼtì áwune, á wáa yiì joonè e dzə̀m wo melív mev mè tíy sho. A wìr yii wùn wùmòʼ woo wír, shoor vitú sho.

²⁵ Aá yii bèy, bìʼ fo á tenen kinyo ke kí din rú mo Nyùy dzəə̀n, e nèn a jùmrì a dzə̀ ké kisaŋ ki, shaa Nyùy wo wù‑uù fèrìn vifá vidzə̀m, ghvə́m a dzə̀ vifá ve wù fèrìn viy. A dzə̀ Nyùy wùn mòʼón wo kì dzə̀, á wàa burí ghán sidzə̀m. Amen.

²⁶ Mo wíri kù káy Nyùy káyín, wù nen màʼtì áwune, á shaá fó mbìy, a yu a dzə̀ fo mensə́ mev mè, a yiì vinyo ve ví kér woómé. Wiíy lo, wù shaà lumèn, a shiíy wùn wùmòʼ woo wiíy réŋréŋ mo kì dzə̀ wù shìíy wùn lùmèn.

²⁷ A kù dzə̀ sá mo vilum lo, á wàa yiì. Wìr lo, wù wàa ker shií a dzə̀ e wùmòʼ woo lumèn, wùn wun wàa yiì vinyo ve ví kér woómé. Aá yii bèy, nèn senrì vitú vév shó. A sì ŋgeʼ mo Nyùy maʼ aáwune ji seʼ joònè wo áwune yii e wún wóví.

²⁸ Mo wíri tenen fó way vifií é vinyò ve ví din rú mo Nyùy dzəə̀n, wù nen màʼtì, vifií vév ví wáa tiy a dzə̀ é liì kisaŋ, á wáa yiì vinyo ve bó ví yoʼ ghèén ji dzə̀ wír, wù wàa yiì.

²⁹ Á nén a dzə ji afon vinyò ve kisaŋ vi, a yiì a dzə̀ vinyo ve bi ví, a siimé kinsiimè, a wìr kù leey wír a dzə̀ e sí ye bií. Aá kfə̀n gheʼ kighèʼ, lo, á yùyrí wír. Á lóo dzə, á kù a nyàmnìn nyàmnìn, ghán, kár a dzə̀ menàŋ, a kày kù kér a dzə̀ shilív she bi shí wùn kày, duú viduú,

³⁰ súʼ kinsuʼ. Fo mbìv Nyùy, á nén a bàn bànèn, a bó á yòʼ yú sa kinyo ke wìr gheéy. Á kù ghán, sévti a dzə̀ kinsevtì, kóʼor wún, buʼtì vinyo ve bi ví, táv kitú fo atàr vév wùn aàyìy véví.

³¹ Áwune nen lò, a jìŋ jìŋèn, a bó wìr yòʼ dzə̀ shó wo wù tíy e wùn jì gheéy. Á kù nyavrì e wíri nyávrin, a bó yòʼ dzə̀ wìr shàm wír.

³² Aá yii bèy, aá kì jii, Nyùy‑iì tìnén ne a ji dzə̀ á kù yùy wír ve á yii bèy. Yii bèy, aáwune kù yii, kfə̀n sheŋrì ámóʼó vee wír ve á yii sa bèy.