Ŋwàʼ Rut 4 - ŊWÀʼ NYÙY

Boas lém Rut

¹ A Boas kì sìíy ne, e kòʼ é Betlehem, e dzə̀ʼə̀m e shùu kibùʼ wo wú‑uù nəə e ŋkàlaʼ. Wìr kfəə wo Boas kì yoŋ və̀y nèn lò, e bvə̀y fó. Boas yòŋ ji fər wom, wìy dzə̀ʼə̀m fèn. Wù nèn wìy, e dzə̀ʼə̀m.

² Boas beè atǎr ntèʼ e ghvə̀m ji wùn áwune wàá dzəmnin. Á dzə̀ʼə̀m,

³ wù neèr kinyo, e sùúy e wìr kfəə və̀y jii, «Kí à yén, kirə́ʼ ké sum ke fər wòsən kpuun, e màʼtì kìy. Mo yeè lav və Naomi kfənen fó Moav, wù sí taʼ wír wóo fiìnè kirə́ʼ kee shooy sho.

⁴ M yén ji dzə̀ à kù waà kìíy, bìʼ fo ghay mbìyi dzəə̀n wó fóo tin kirə́ʼ kin fo kí fəə́ fó kfəə. Aà kér shií shó, à nèn tìn áàtǎr ntèʼ viné si. Wáa dzə, a bó à yòʼ koŋè, à nèn yiì, é m kiíy, bìʼ fo dzəə̀n mo e wò bàm, wo dzə̀ m tìn.» Wù bìnèr jii, «Mo‑óò tín.»

⁵ Boas nèn yòŋ jii, «Aà kòóy súm vən fo Naomi, bo à kù kòóy sa fo Rut woo wan wìr Moav və̀y, bìʼ fo dzəə̀n wiíy ŋkfə njìlaʼ Elimelek. Kí nén a dzə ji à kér fóo lèm sa Rut lémen, é vèn wun fiʼ dzə̀ə́ wán wo dzə̀ wù yì vitsə́ʼ vin, é yír ŋkfəə wáa dù fo mbìy.»

⁶ Wìr kfəə və̀y nen sùúy jii, «A dzə̀ bey, bo mo‑óò fə́tí wó yém fó fo, bìʼ fo bó yòʼ dzə̀ wón vémé yì vitsə́ʼ vee shooy. Lì ri kilíŋ kém kí. Bó yòʼ dzə̀ m tìn.»

⁷ Yì‑iì dzə̀ é ghan fóo fèy, wìr woó Isray lóo tin kéŋ fo wùmòʼ, ŋgaà wo á kì tín fo fo shòʼ lábáʼ, e fò e wo wù tíné, e fíʼ dìn ji kéŋ yee shooyi sì á rə́.

⁸ Mo wìr kfəə və̀y suuyin ji Boas wàá tín, e nèn shòʼ lábáʼ, e fò shó.

⁹ Boas nèn sùúy aàtǎr ntèʼé wùn à wír ve vé‑eè dzəə̀n fó adzə̀me jii, «Vèn dzə̀ anjen e kishiíy ké lán ki ji m kòóy a ne kéŋ Elimelek e dzə̀m fo Naomi. A dzə̀ yíwun ye wù‑uù màʼtìn e wón və́ vee Maalon wùn Kiliyon.

¹⁰ A m kù sí lem sa Rut woo wan wìr Moav, wo dzəə̀n wiiy ŋkfə Maalon. M lem ji vèr wun fíʼ dzəə́ wán wo wù wíy yi vitsə́ʼ vee shooy, fo rám ŋkfəsàyi lay fó kfəə fèn wùn à fó ntèʼ. A vèn tíy vinjen e kishiíy ké lán ki.»

¹¹ Atǎr ntèʼ wùn à wìr dzə̀m wo wù‑uù dzəə̀n fó bínsí jii, «Vèr dzə̀ anjen. Nyùy Tàr ku yiì, é wiíy və̀n wáa dzə sa moo Racel wùn Lea ve rám yeé Israyi‑iì loòn fo áwune. Wù ku kfə̀n yiì sa ji à wáa dzə wir keŋ e ram yeé Efrata, aá yúʼnín yír yé Betlehem e dzə̀m.

¹² Nyùy ku yiì, é wón ve vèn wiíy və̀n wíy dzə́ə wáa dzə nyanyày moo kfə́ə tàr à ràm yesən woo Peres wo Juda‑aà dzəən wùn Tamar.»

Wír ve á ràmèn fo Boas wùn Rut

¹³ Á bèy, Boas nèn lì Rut ji wíiy və. Wùn wun shiíy, Nyùy səə̀vì, wù tiím bvəm, e dzə̀ə́ wán lumèn.

¹⁴ Mo Rut dzəən wán, vikìy veé Betleheme wáa ndzəʼ, a suúy e Naomi jii, «Búríi wáa dzə fo Nyùy Tàr. Wù fò ne wò njìlaʼ lán. Nyùy ku yiì, aá wìy a yuʼnín yír rə́ é wòŋ Isray e dzə̀m.

¹⁵ Wan və̀n wíy fo wò dzəʼə̀m ye fíyi, a geʼsín e wò e ghan se à dzə̀nèn ne. Yìy à wan və̀n kòŋ wò feyì. Wù yiì kinyo e wò, e shaà ke a dzə̀ wón vee vilum saàmbà, á yiì.»

¹⁶ Naomi nèn sə̀ wán və̀y, e kòytí, e kèʼ a lìy.

¹⁷ Vikìy veé ntèʼé shù yír wan ji Obed, a fìʼtì e wíri ji Naomi kòóy ne a wán lumèn. Obed nèn wìy dzə̀ə́ Jessi woo tàr à Fòn Davir,

^18-22 a dzə̀ rám Peres, a yí dzə̀ jii, Peres, Hesron, Ram, Amminadav, Naashon, Salmon, Boas, Obed, Jessi, e lì Fòn Davir.