Ŋwàʼ Rut 2 - ŊWÀʼ NYÙY

Rut síy vifá ve yi fo Boas sum

¹ Yì‑iì dzə̀ é ghan fóo fèy, wìr wùmòʼ wáa dzə e Betlehem, a dzə̀ wir kfəə Elimelek woo ŋkfə lum Naomi. Wù‑uù dzə̀ wír wo kuʼùn, e kfə̀n a dzə ŋgaà bùʼ, a yír rəə́‑əə̀ dzə̀ ji Boas.

² Lòo dzə e kishiíy kímóʼ kí, Rut woo wan wìr Moav və̀y suúy e Naomi jii, «M kì leey jii mbaà, bo m kì dù é kwaʼ, a siyrí vifá ve yi fo wìr wo wù yíi a ker mendzən, e biimé mo e wun sum.» Naomi bìnèr sho jii, «Dù ri wan wòm.»

³ Wù ku nèn dù e kwaʼ, a ghan, a siy vifá ve yi e vé kaví bàm. Kí nèn kòóy ji wù kì dù bey, e nə̀ə́ a dzə̀ e Boas woo wir kfəə Elimelek və̀y sum.

⁴ Shintàm shi lòo dàr, Boas kitú kfə́ nèn wìy fo Betlehem, e shàʼtì vé lìme jii, «Nyùy Tàr kú a dzə vèn áwune.» Áwune bìnèr jii, «Nyùy Tàr səəvi wò.»

⁵ Boas nèn dzə̀r e kitú ke vé lìm vəə́ jii, «Wiíy woo wánlè ŋgòn və̀sə lò fo feé?»

⁶ Wù bìnèr jii, «Dzə̀ wan wìr Moav wo Naomi‑iì wìyìn shó fo Moav və̀y.

⁷ Wù kì wìy, e lòn mo ji sà dzə̀ wun wàa ghan e vé lìmé bàm, a siy vifá ve yi a? Mo wù kì wìyìn fó kijàvndzə, e kèʼ lim, wù dù e tàv ji wun yoyri shishàr a dzə̀ lèn və̀n.»

⁸ Boas nèn dù, e sùúy e Rut jii, «Yuúrí, e yù mbà wan wòm, lá à yòʼ kfə̀n lò fo sum fen ji à du, a siy a fo wìr wo sə́n sum. Ku gòʼ vèn à vikìy víne.

⁹ Ku wày síi a dzə̀ fo áwune báʼti vifá ve yi, a jùmrì áwune. M kàntì ne vilum vee mǒ sum ji lá á yòʼ a kàr a wò. A kilòŋ kí lò a yum wò, à dù, e nò mendzə́v fó mbìʼ se vilum vìsəə tú mendzə́v, wáy sho.»

¹⁰ Rut tsə́m ndzəə́, e gvə̀ʼə́r kitú, kí kùm nsay, e dzə̀r e Boas jii, «À lò ké fo feé, e bóo sham mo ben? À lì mo ji wír bèn, a suŋnín e mò kijuŋ ji ka, a m dzə̀ kém kiŋgwìy?»

¹¹ Boas bìnèr jii, «Mò‑oò lo yù vinyo vidzə̀m ve wò‑oò yii e yìy a lum wò, e kèʼ fo ghan se lum wò‑oò kpuun. M kì mo wò‑oò màʼtìn tàr won wùn yè won, à woŋ wóné, e wìy, a dzə vèn à wír ve səné, a bó à yòʼ kì áwune.

¹² Nyùy Tàr woo Nyùy wìr veé Isray ku laàmé wò. Wun woo Nyùy wo à nəən ne wun ji wù kiŋ á wò, ku yiì, é vilaámé vé vi wáa dzə virúnén.»

¹³ Rut suúy jii, «Kí bòŋ, áà kú a kòŋ mo bey, tàr wor. Jí sé se juŋ si, se à súŋnin e mò sí yiì ne, shilív shí rə́sín mo, mo woo wánlè wò, a bó m yoʼ fə̀m mèé e wan wò lìm wùmòʼ.»

¹⁴ Ghán sé viyikìr si yiì ghèén, Boas suúy e Rut jii, «Wìy aá wáa yikír. Á beʼ kibán ki, a sə̀ʼ e melùʼ fèy.» Rut ku nèn wìy, e dzə̀ʼə̀m wùn à vé lìme. Boas lò, e ràmsì kimbùr ke *barli, wù kfə́r kimbùr kìy, bvə́me kúr, vifá ve yi vímóʼ ví bér.

¹⁵ Rut lòo kfən ji wun wáa siy a vifá ve yi, Boas kàntì vé lìme jii, «Vèn maʼti, é wù wáa siy, a meé fo vikìy neer e vikfər vikfər. Vèn wáa yen fó a wamrí wun.

¹⁶ Fo vèn vee vilum, vèn lóo tin, vèn wàa màʼtì, é vitiír vímóʼ ví wáa tumkír, é wù wáa tayrí. Lá vèn yòʼ a wamrí wun.»

¹⁷ Rut ku nèn sìyrí bèy, ndzə jí, wù nèn bùʼ, yí rún kigátí.

¹⁸ Wù bèʼèy, e dù sho fo laʼ, e dìn e yìy à ŋkfə lum və, e nèn kfə̀n fə̀ə́r vifá ve yi ve wù kì yiin é sum, ví bér, e fò shó.

¹⁹ Naomi dzə́r e wun jii, «À rə̀sí, e sìy vifá ve yi vìn a dzə̀ fó feé? À kì lìm a dzə̀ e lá sum? Nyùy Tàr səəvi ŋwérín wo wù kì shamen wò.» Rut bìnèr ji wun kì lìm e wìr wùmǒʼ sum, a yírí dzə̀ á ji Boas.

²⁰ Naomi njáʼám, e yòŋ jii, «Nyùy Tàr ku səə̀vì Boas. Nyùy kù yii rú kinyo ke wù‑uù kàʼàn e wír vəə́, kìn á dzə̀ shó atin, kìn á kpùkír ne.» Naomi kfən naàrì e wiiy ŋkfə wan və jii, «Wìr və̀n dzə̀ wír woo à ŋkfə lum wóm kfəə, a dzə̀ wír wùmòʼ wo a kì dzə̀ wù wàa leéy fo wòsò vee vikǐy ŋkfə.»

²¹ Rut shaà fo mbìy, e sùúy jii, «Bó yòʼ kù jòʼ ke m kì suuyin cáʼcáʼ. Wù kì sùúy e mò jii, ‹M wáa siy a vifá ve yi e və́ vé lìmé bàm, e dù mày a mo á wíy kav vifá ve yi, e màysì.› »

²² Naomi suúy jii, «Wan wom, kí bòŋ rú ji à goʼ á vèn à vikìy e Boas sum, bìʼ fo, aà lò, a lìm e wìr wo sə́n sum, tàm á wàa nə̀ʼsì wò.»

²³ Rut ku nèn a jùmrì a dzə̀ vikìy ve á lim e Boas sum, a siy vifá ve yi, e kèʼ mo vé‑eè kavin *barli, e dù, e mèé e saŋ ye á yoŋ ji *wit. A wù kù síy bèy, dzə́ a dzə̀ wùn yìy à ŋkfə lum və.