Ŋwàʼ Rut 1 - ŊWÀʼ NYÙY

Elimelek wùn à kfə́ə rəə́ dú é Moav

^1-2 Yì‑iì dzə̀ é ghan se woŋ Israyi yòʼ‑oò sí kér fon, a kù‑uù lo wàa saʼ wír ve vé‑eè yoŋ ji atǎr nsaʼ, jìŋ koó é kiya kímóʼ kí é ghan fóo fèy. Wìr wùmòʼ nèn lò, e lì wiíy wùn à wón və́ ve vé‑eè dzəə̀n abaà, a dù ji á bee é wòŋ Moav. Yír wìr və̀ne‑eè dzə̀ Elimelek, yé wiíy Naomi, sé won ji Maalon wùn Kiliyon, a dzə̀ vilum vilum. Áwune‑eè dzə̀ kfəə́ yeé Efrata e ntèʼ yee Betlehem, e nsay Juda. Áwune dù bèy, e mèé e Moav, e nèn a dzə fo.

³ Elimelek nèn lò, e kpù, e lèm wíiy və Naomi.

⁴ Ntàm lòo dàtìr, wón Naomi vìyi nèn kòóy vikìy fó Moav. Wùmòʼ‑oò dzə̀ Orpa, wùmòʼ Rut. Viyá vi lòo meé áwune fó ji ghvə̀m,

⁵ Maalon wùn Kiliyon kpúkír sá. Naomi nen gòʼ là lúm, là wán.

Naomi wùn Rut kfə́n é Betlehem

⁶ Ghán sí lòo dù, wù nèn lò yù ji Nyùy Tàr sə̀ á ne wír və́ veé Isray, á koóy á vifá ve yi. Wùn à vikǐy ŋkfə won vəə́ nèn bàʼtí ji á lo á fo Moav fèy,

⁷ a kfən e wòŋ woo Juda. Áwune fəə́, e lòo dù,

⁸ Naomi suúy aáwune jii, «Vèn kfə́n é bàm, e dù yèn ayìy véné, é Nyùy Tàr kú a geʼ e vèn réŋréŋ mo vèn‑eè géʼ sa e mò, kfə̀n géʼ aàŋkfə won vémé.

⁹ Nyùy ku kfə̀n fò ven alúm ámóʼó, é wìr wáa dzə kijuŋ e lum və́ lav.» Wù suúy bey, e baàmé áwune ji á bèr á ne. Áwune nèn bùr kév a dzə̀ tóŋ,

¹⁰ a suúy e Naomi jii, «Àáy, vèr koŋ kér ji ku dù a vèsən, e dù a dzə vèsən à wír véné.»

¹¹ Yii bèy, Naomi bìnèr jii, «Vèn kú a kfən e bǎm, wòn vem. Vèn koŋ fó a wìy e mǒ bàm ji ka? Vèn kwaʼtì ji a dzə̀ m kfə̀n dzə̀ə́ alúm vén ve səné à?

¹² Wòn vem, vèn ku kfə̀n e věn melaʼ. M dzə̀n ne, a bó yòʼ dzə̀ m kfə̀n a ker lúm gheéy. A m yòʼ kì keèrí lúm lán wo vèr wun dzəə́ wóné,

¹³ bo kù yòʼ dzə̀ vèn shìy, á kùykír, a dzə ji alúm vén á? A dzə̀ kin ki yiì rú vèn tèn alúm ámóʼó à? Nyaa mǒ wòn vem, lá vèn yòʼ wìy. Kíghàʼ wom kùʼ, e shaà wóon, bìʼ fo Nyùy Tàr màʼàn ŋgeʼ sìn a dzə̀ e mǒ kitu.»

¹⁴ Wón víyi nèn siì kfə̀n tòŋnín toŋnín. Orpa nèn lò, e baàmé yìy à lum və ji á bèr á ne. A Rut kù báŋri wun.

¹⁵ Yii bèy, Naomi suúy e Rut jii, «Leéy ri mo kifə́sín ké ki kfənen ne e bàm ji wun du, a dzə wùn à wír véné, aànyùy véné. Kú a kfən e bàm wó.»

¹⁶ Rut nèn bìnèr jii, «Kii wò, lá à yòʼ a yòŋ ji m maʼti á wò. «Kìn à du a dzə̀ feé, bo kù du wòsò. Kìn à yíi a dzə fèé, bo kù yíi a dzə wòsò. Wír vée yíi a dzə wír vém, Nyùy wo à bunrì dzə̀ wo m yíi a bùnrì.

¹⁷ Fo à wíy kpu, dzə̀ fo m wíy kpu, a kù dzə̀ fo á wiy dzəə̀mè mo. Nyùy Tàr ku màʼ ŋgeʼ e mǒ kitu, e kfə̀n dzə̀sì, a kinyo kímóʼ kí fen jàvsìn wòsò, e shaà kpú.»

¹⁸ Mo Naomi yenen ji Rut wày á ne wáyín, wù nèn lò fo kitu wo.

¹⁹ Wùn wun ku nèn a dù, e mèé e Betlehem, e lòo nəə́ ntèʼ, wìr dzə̀m yúʼnín, a ker gháʼ feyì. Vikìy wáa ghaynín ji və̀n sà kù yòʼ dzə̀ rú Naomi a?

²⁰ Wù suúy aáwune jii, «Lá vèn yòʼ kfə̀n dzə́ə a yòŋ mo ji Naomi. Vèn wáa yòŋ mo ji Mara, bìʼ fo Nyùy woo Ŋgaà Vitaàví Vidzə̀m yiìn ne, dzəʼə̀m yémé wáa dzə yé ŋgeʼe.

²¹ Mò‑oò lo fo fèn, kér lúm wùn à wóné. Nyùy Tàr siír mo é bàm e wóo. A dzə̀ vèn kfə̀n a yòŋ mo ji Naomi e le, a Nyùy Tàr woo Ŋgaà Vitaàví Vidzə̀m bín ne ndzə̀m e mò, e màʼ ŋgeʼ e mǒ kitu?»

²² Á mo Naomi‑iì kfənen é Betlehem wùn Rut woo wan wìr Moav, wo yì‑iì dzəə̀n wiiy ŋkfə wan və. Wùn wun‑eè mèé fó, a dzə̀ é ghan se vé‑eè kèʼèn, a tin kfə́ə saŋ ye á yoŋ ji *barli.