Ŋwàʼ Luk 3 - ŊWÀʼ NYÙY

Joon fiʼtì ntum Nyùy, báʼti vinyo ve Jesus

^1-2 Wáa dzə e ghan se Joon woo wan Sekariya‑aà dzəə̀n é kwaʼ, Nyùy nèn lò, e tiìsí ntum sho. Kiyá kìn ki‑iì dzə̀, a Tiberiyur sáʼ ne ji Fon woó *Rom kiyá nshòv tàn e ghvə̀m, a Poshur Payler sáʼ ji kisher kfə́ é wòŋ woo Juda, a Heror sáʼ kfə́ é Galeli. Filiv woo fər Heror wáa saʼ woŋ woo Ituria wùn à woó Tsakonitiri, a Lisaniar sáʼ Abilen. Kfə́n a dzə sa ghán se Kayfar wùn Anar‑iì dzəə̀n vitú ve atàá cù ve wìr veé Juda.

³ Mo Nyùy tumen Joon, wù nèn a ghan e mbìv wòŋ se sí dzəə̀n é ghaa ndzəv yee Jordan sidzə̀m, a fìʼtì e wíri jii, á wáa bìnèr melív mev, é wun wáa way áwune é ndzəv, é Nyùy laysin á vinyo vév ve bi ví.

⁴ Wù wáa fìʼtì bèy, a wù yii a dzə̀ kinyo ke Aysaya woo ŋgaà ntum Nyùy‑iì saŋen e wùn ŋwàʼ jii: «Jì wìr fúŋ fo kwaʼ jii, ‹Á náŋsín dzə́ə Tàr, e naàrì, é yì kfə́n tìítiy.

⁵ Vèn rúnsí viwoóy ví vidzə̀m, e sə̀ʼə́r virùmèn wùn aàgwane, aá kfə́n é mboʼ. Á naari viŋgoó ve dzəə, é dzəə̀ wáa wav tìítiy, e rùnsí vidoʼ, é dzəə̀ wáa dzə ji fèm,

⁶ é wìr dzə̀m nèn wìy yèn mo Nyùy luŋèr wíri.› »

⁷ Joon wáa fìʼtì ntum rə bey, màŋgòŋ nèn a keèmè, a wìy ji wù wáa way áwune é ndzəv. Wù lò, e yòŋ jii, «Abúv vìn, tìr la ven, bo vèn wáa wìy, a kwàʼ ji dzə̀ vèn bòy fó ŋgeʼ ye Nyùy wíy màʼ e věn kitu?

⁸ A dzə̀ vèn kù tòmbìy, a yiì vinyo ve ví wáa dìn ji vèn bìnèr ne rú melív men. Lá vèn yòʼ a kwàʼ kwàʼàn ji vèn kù sì wír Nyùy ji bìʼ fo vèn dzəə̀n rám Abraham. Kee shooy ki yòʼ kér kinyo fo Nyùy. A dzə̀ wù lì tíy sin, e bìnèr ji rám Abraham.

⁹ Vèn wáa kiíy jii, á gàʼ ne njàm ji á gwar vicí vidzə̀m ve bó ví yòʼ koom vifá ve juŋ vi, aá yíi mèn wùn à gháŋé shó, e tòn e və̀y.»

¹⁰ Màŋgòŋ və̀y yú, e dzə̀r e Joon jii, «A dzə̀ vèr yèe le lèn?»

¹¹ Wù bìnèr jii, «Wìr wo wù kér vikúm vibaà fó kímóʼ kí e wìr wo bó wù yòʼ kérí, é wìr wo wù kér vifá ve yi jav sá, e fò wír wo bó wù yòʼ kérí.»

¹² Wír ámóʼó nèn wìy sa a dzə̀ ve vé‑eè báʼti mbàm se *bàràʼ ji Joon wáy áwune é ndzəv, e yòŋ jii, «Ŋgaà yèʼey, a dzə̀ vèr yiì kér a dzə̀ ka?»

¹³ Wù bìnèr jii, «Vèn lóo baʼtí mbàm, lá vèn yòʼ a kùvrì, a shaà mo nsər suuyì.»

¹⁴ Vé rər ámóʼó wìy sa, e dzə̀r jii, «Kér kí wáa dzə kfə́ ji ka, a dzə̀ vèr yiì ka?» Wù bìnèr jii, «Vèn wáa yen fó a bemér wír, a faàsì kifá, e kfə̀n a yen fó a gòvtì wír e kinyò. Vèn kú a sheʼrí a dzə̀ kifá ke á laʼ ven shó.»

¹⁵ Mo wíri‑iì sí shiy *Mfə̀ə́r wo Nyùy‑iì kàʼàn, á nèn a ghaynín kinyo ke Joon, a kwàʼ feyì jii, ghanmóʼ, bo sì á wun woo Mfə̀ə́r.

¹⁶ Joon kiíy, e sùúy e wír vìyi adzə̀m jii, «M wáy kém wíri lèn e ndzəv, a kù dzə̀ ji mendzə́v cáʼ. Yii bèy, a wìr wo wù kùʼùn féyì, e shaà mo sí wíy fo mǒ bàm, a bó m yoʼ fə̀m ghèén fó gvəʼə́m e si wo, e bvə̀tì alábáʼ və́. Wù yíi wìy, é wù wáa way kfə́ wíri a dzə̀ e Kiyoy ke Ranén kí kiwo, a way ámóʼó é və̀y.

¹⁷ Wù wíy lòo wìy, é wù wàa ker júy rə e wùn kiwo, e fetí sáŋ shó. Wù féti, é wù báʼtí sáŋ, e lèm, e yèr mvə́y, e tòn e və̀y wo wú bo ghán sidzə̀m.»

¹⁸ Á mo Joon‑eè fiʼtì sáʼka Nyùy wo juŋ e wíri, kfə̀n fó ntir símóʼ sí sinín bèn.

¹⁹ Wù wáa roòmè sa Heror woo ŋgaà saʼ, bìʼ fo wù‑uù cemen Herodia, a dzə̀ wiíy fər wun woo Heror, e kfə̀n a roòmè sa fo vinyò vímóʼ ví vinín ve Heror‑iì buʼtì.

²⁰ Heror nèn màysì, e jònèr, e sùúy, á koó Joon, e fìn e lav sháŋ.

Joon wáy Jesus e ndzəv

²¹ Yì‑iì dzə̀, é bo á wìy a koo Joon, wù wáy wíri é ndzəv é kishiíy kímóʼ kí, á mày, Jesus nèn wìy, wù wáy sá wun. Wù fəə́, e lòo bùnrì, shúu yuví mvə̀ʼə̀m,

²² Kiyoy ke Ranén kí sə́ʼə́y fó fo e njà kibìŋ, e tìím e wùn kitu. Jì wìr súŋnín fó yuv jii, «À dzə̀ Wán wom, m koŋ wò feyì, m shéʼri wò e ŋàŋ.»

Rám à Jesus

²³ Wáa dzə e ghan se Jesus‑eè kèʼèn lim rə́, a wù sì moo kiyá mtaár bèy, a wíri kí ji wù dzə̀ á wan Joosev. A Joosev‑iì dzə̀ wan Heli

²⁴ wo yì‑iì dzəə̀n wan Mattat, woo wan Levi, wo yì‑iì dzəə̀n wan Merki woo wan Janay, wo yì‑iì dzəə̀n wan Joosev.

²⁵ Və̀n woo Joosev wáa dzə wan Mataatiar woo wan Amos, wo yì‑iì dzəə̀n wan Nahum woo wan Esli, wo yì‑iì dzəə̀n wan Nagay.

²⁶ Nagay wáa dzə wan Maat woo wan Mataatiar, wo yì‑iì dzəə̀n wan Semin woo wan Josek, wo yì‑iì dzəə̀n wan Joda.

²⁷ A Joda dzə̀ wan Joanan woo wan Resa, wo yì‑iì dzəə̀n wan Serubbabel woo wan Shealtiel, wo yì‑iì dzəə̀n wan Neri.

²⁸ Neri wáa dzə wan Merki woo wan Adi, wo yì‑iì dzəə̀n wan Kosam woo wan Ermadam, wo yì‑iì dzəə̀n wan Er.

²⁹ A Er dzə̀ wan Joshua woo wan Elieser, wo yì‑iì dzəə̀n wan Jorim woo wan Mattat, wo yì‑iì dzəə̀n wan Levi.

³⁰ Levi wáa dzə wan Simeon woo wan Juda, wo yì‑iì dzəə̀n wan Joosev woo wan Jonam, wo yì‑iì dzəə̀n wan Eliakim.

³¹ Eliakim‑eè dzə̀ wan Melia woo wan Mena, wo yì‑iì dzəə̀n wan Mattata woo wan Natan, wo yì‑iì dzəə̀n wan Davir.

³² Davir nén a dzə wan Jessi woo wan Obed, wo yì‑iì dzəə̀n wan Boas woo wan Salmon, wo yì‑iì dzəə̀n wan Naashon.

³³ A Naashon dzə̀ wan Amminadav woo wan Admin, wo yì‑iì dzəə̀n wan Arni woo wan Hesron, wo yì‑iì dzəə̀n wan Peres woo wan Juda.

³⁴ A Juda dzə̀ kfə́ wan Jakov woo wan Aysi, wo yì‑iì dzəə̀n wan Abraham woo wan Tera, wo yì‑iì dzəə̀n wan Nahor.

³⁵ Nahor wáa dzə wan Serug woo wan Reʼu, wo yì‑iì dzəə̀n wan Peleg woo wan Eber, wo yì‑iì dzəə̀n wan Shela.

³⁶ A Shela dzə̀ wan Kaynan woo wan Arfasad, wo yì‑iì dzəə̀n wan Shem woo wan Noa, wo yì‑iì dzəə̀n wan Lamek.

³⁷ Lamek nén a dzə wan Metusela woo wan Enok, wo yì‑iì dzəə̀n wan Jared woo wan Mahalaleel, wo yì‑iì dzəə̀n wan Kaynan.

³⁸ A Kaynan dzə̀ wan Enor woo wan Set, wo yì‑iì dzəə̀n wan Adam, Adam wo yì‑iì bomen Nyùy.