Ŋwàʼ Luk 2 - ŊWÀʼ NYÙY

Maria dzəə́ wán woo Jesus

¹ Wáa dzə e ghan se vé‑eè dzəən Joon sin, a sáʼ Agustu ji Fon woó *Rom. Wù nèn lò, e sàʼ jii, á táŋ á wír veé wòŋ se sí dzəə̀n e wùn sar saʼ sidzə̀m.

² A kintaŋ kìn ki‑iì dzə̀ ké mbìy ki mo fòn‑eè lèmèn Kwirinur, wù wáa saʼ woŋ Siiria.

³ Mo wíri yuun sáʼ yee shooy, e nèn a dùkìr aáwuné ntèʼ sí ji á sáŋ yír sév fó, e tàŋ áwune.

^4-5 Joosev nèn lò fo Naasarer e ntèʼ yeé Galeli, e lì Maria wo vé‑eè juùrìn shó, wùn wun wáa dù e mbìv wòŋ yee Juda ji á táŋ á áwune é Betlehem fo vé‑eè dzəən Fòn Davir, bìʼ fo Joosev‑iì dzəə̀n wír woo Fòn Davir ram. Á wáa dù bèy, a Maria kì dzə̀ e bvə́me.

⁶ Áwune meé fó, ghán se wù‑uù yíi dzəə́ si nèn ghèén.

⁷ Wù fùm wán və lumèn, e boò e ndzə̀y sí, e neèr a dzə̀ é kikoŋ ke nyám si yii yíkir fo fo, bìʼ fo vé‑eè wìyìn, e bùŋ kirə́ʼ é lav viŋgwìy.

Nshìylav Nyùy Tàr wíy, e yèn anshìy njiì

⁸ Kú a dzə e ghan see shooy, a wír ámóʼó dzə̀ é kwaʼ e ghaa ntèʼ fóo fèy, shiy njiì wov vitsə́ʼ.

⁹ Nshìylav Nyùy Tàr nèn sàsìn, e bvə̀y aáwuné si, rán Nyùyi bán fo áwune‑eè dzəə̀n, áwune wáa fàn.

¹⁰ Wù suúy jii, «Lá vèn yòʼ a fàn, m wiy a dzə̀ e sáʼka wo juŋ, a wù yíi fo kishéʼrì ke kuʼùn kí e wìr dzə̀m.

¹¹ Á dzə̀ə́ ne wán e Fòn Davir ntèʼ é kishiíy ké lán ki, a wù wíy lùŋèr ven, bìʼ fo dzəə̀n *Mfə̀ə́r wo Nyùy‑iì kàʼàn, a dzə̀ wun Taà Ndzə.

¹² A kisəəm ke kí yíi dìn wán woo shooy ki dzə̀ jii, vèn yíi dù, e yen, aá boó e ndzə̀y sí, e neèr a dzə̀ é kikoŋ ke nyàm.»

¹³ Áwune lòo sìn, e yèn, a nshìylav Nyùy rə̀y sì fó wùn à símóʼ sí é ŋkfə̀n, a sí suyrì Nyùy, yov jii:

¹⁴ «Á wáa burí Nyùy wo wù dzəə̀n é ntoò yùv. Wù fò ne nyaáŋ é nsay fo wír ve wù koŋe adzə̀m.»

¹⁵ Nshèelav se Nyùy sìy si màʼtì áwune, e kfə̀n é yuv, á nèn sìíy, e sùŋnín jii, «Mo Nyùy Tàr yiìn ne, vèsən kiíy kinyo ke kí kooyin, vèsən ku dù e Betlehem, e yèn kinyo kee shoon e sí yesəné.»

¹⁶ Áwune ku nèn tùmnín, e dù, e yèn Joosev wùn Maria, a wàn néŋ e kikoŋ.

¹⁷ Mo áwune yenen, e nèn kèʼ, a fèr vinyo ve nshìylav Nyùy kì suuyin kùm wán woo shooy vidzə̀m.

¹⁸ Wíri yú kinyo kee shooy, kí tárír áwune.

¹⁹ Yii bèy, Maria yú kfə́, e lèm e shiliv, a kuumé ghán sidzə̀m.

²⁰ Anshìy njiì vìyi nèn bìnkìr, a kfən, a burí Nyùy, a sùyrì wun, bìʼ fo á yenen vinyo vidzə̀m réŋréŋ mo nshìylav Nyùy kì suuyin.

²¹ Wan woo shooy meé kishiíy waamé, á náŋsín, e kù nèn a yòŋ yír rə́ ji Jesus. A kù dzə̀ yír ye nshìylav Nyùy‑iì suuyin e yeè wàn, é bo wù wìy a tiím bvə́m wan.

Á dín wán woo Jesus e Nyùy

²² Ghán sí wìy ghèén se dzə̀ yeè wàn wùn taà wàn yiì cu mo *Nsər Mooser suuyì, e fíʼ *kfəmrí vitú vév, bìʼ wán wo áwune kooyin, á nèn lì wán, e kòʼ shó e Jerusalem ji á din e Nyùy.

²³ A dzə̀ mo vé‑eè saŋen é Ŋwàʼ Nsər Nyùy Tàr jii, «Kifá kidzə̀m ke dzəə̀n dzə́ə mbìyi kee lumèn, á ku fò ji ké Nyùy Tàr.»

²⁴ Áwune kfə́n a dù sa ji á yii á cu yee shooy e vibìŋ ví vibaà, kìn e wón vibùu abaà mo nsər Nyùy Tàr‑iì dzəə̀n.

²⁵ Wáa dzə e ghan see shooy, a wìr wùmòʼ dzə̀ é Jerusalem, a yír rəə́ dzə̀ Simeon, a wù ghvə́m Nyùy, yii mo Nyùy koŋè, kfə̀n shiy ghán se Nyùy wíy rəə̀r melív me wìr veé Isray. Kiyoy ke Ranén kí wáa dzə e wùn shiliv,

²⁶ a kí‑iì tòʼ ne sho ji wù kù wíy yen *Mfə̀ə́r wo Nyùy‑iì kàʼàn, e bóo kpu.

²⁷ Wáa dzə e kishiíy ke Maria wùn Joosev‑iì duùn é Jerusalem fó kwàŋrì vinyo vee shooy mo nsər dzəə̀n, Kiyoy ke Ranén kí bánrí Simeon, wù dù e lav cù. Á lòo wìy e wan wov woo Jesus,

²⁸ Simeon ghár, e kòytí, a beèrì Nyùy, a suúy jii:

²⁹ «Tàr, mo à yiìn ne, ŋkàʼmé wò gheén, aà kòŋ, à lì mo woo ŋgaà lìm wò lèn ji nyaáŋ.

³⁰ Sí yémé yèn ne mo à wíy lùŋèr wíri,

³¹ aà tsə̀nsí ne Ŋgaà Lùŋèr ji wìr dzə̀m fíʼ yen.

³² Wù wíy a dzə kikaʼày fo wír ve bó yòʼ dzəə̀n veé Israyi, aáwune fíʼ kiíy sa wò, a wù wíy nàn yír wìr vé veé Isray.»

³³ Taà wàn wùn yeè wàn yuúrí kinyo ke Simeon taŋen e wǎn kitu, a ker gháʼ.

³⁴ Wù kfən yiì lò, a suŋnín, a way áwune e Nyùy kiwo. Wù lò, e yòŋ Maria woo yeè wàn jii, «Yuúrí, Nyùy shòʼ ne wan wò və̀n ji wù yii, é wír veé Israyi gbukir anín, aámóʼó nankir nánkin. Wù kfən lèm ji kisəəm ké wun woo Nyùy, a wíri wíy a kay wun.

³⁵ Á lóo yiì bèy, é kí nèn a dìn kwaʼtì ye wíri litì aáwuné meliv. Mendzən me wan wò və̀n mè wíy yiì, é shilív shé shi wáa koo mo á sòv a dzə̀ e shwàʼ.»

³⁶ Wáa dzə e ghan sin, a wiíy wùmòʼ dzə̀ é Jerusalem fèn, aá yoŋ ji Ana, a dzə̀ wiíy wo wù‑uù lo, wù wàa yu vinyo fo Nyùy, a tiisí e wíri. Wù‑uù dzə̀ wan Fanuwer woo rám Asher, a wù dzə́n ne feyì. Wùn lum‑eè dzə̀ʼə̀m kiyá saàmbà cáʼcáʼ, wù nèn kpù.

³⁷ Wù ku nèn a dzə kfə́ ji wiíy ŋkfə, a rəsí, a dzə e lav cù, a sùyrì Nyùy, a lèm jíŋ, a bùnrì e shùy, a bùnrì vitsə́ʼ, a wù sì lèn kiyá nshòv sikweè e mwaamé.

³⁸ Wù nèn kfə̀n lò, a wìy e lav cù, a dzə̀ é ghan se Maria wùn Joosev kì wìyìn e wàn sin. Wù yén wán, a beèrì Nyùy, a suŋnín kùm wán woo shooy e wìr dzə̀m wo wù‑uù sí shiy ji Nyùy fəə́r wír veé Jerusalem fo ŋgeʼ.

³⁹ Joosev wùn Maria siíy, e màysì vinyo vidzə̀m mo nsər Nyùy taʼà, e nèn kfə̀n aáwuné ntèʼ yee Naasarer e mbìv wòŋ yee Galeli.

⁴⁰ Wàn ku nèn a kuy, a ker vitaáví, e kfə̀n a ker vifií é ŋàŋ, á wáa yen, a Nyùy koŋ wun.

Wan woo Jesus góʼ e *lav cù e Jerusalem

⁴¹ Tàr à Jesus wùn yìy à Jesus wáa dzə, a vé‑eè rə́si du, yí kiŋkàʼ ke á yoŋ ji *Ŋkǎʼ Yáʼayshaà e Jerusalem kitú ke kiya kidzə̀m.

⁴² Jesus wìy mèé kiyá nshòv sibaà e ghvə̀m, áwune kfən dù kiŋkàʼ kee shooy réŋréŋ mo vé‑eè rə́si du.

⁴³ Á dù, e yì kiŋkàʼ, kí mày, á nèn a kfən e bàm. Á lòo kfən, Jesus gòʼ e Jerusalem, la tàr wov wùn yè wov yòʼ kìíy.

⁴⁴ Á wáa kwàʼtì ji wù dzə̀ á e mbèʼŋkùm mvəm. Á ghán kishiíy kifur, e lòo leéy wun fo afə́r vév wùn à ŋkar sév sí mvəm,

⁴⁵ e tàʼ ntéŋ, e nèn bìnkìr, e kfə̀n é Jerusalem, a tàʼ fo fo.

⁴⁶ Vishiíy ví meé vitaár, áwune yén a dzə̀ é lav cù, a wù dzə́ fo wùn aàŋgàa yeʼéyi, yuúri vinyo vév, kfə̀n dzə́ti və́ vee vinyo.

⁴⁷ Wíri wáa yuurí, a ker gháʼ, bìʼ fo wù‑uù kiiyin vinyo e ŋàŋ, a bìnèr kijuŋ.

⁴⁸ Mo tàr wov wùn yè wov yenen wun, shuu wóví yúm. Yè wov yòŋ jii, «Wàn, à lòvtí e vèr ben ji ka? Kú a kiíy ji vèr tàr won tàʼ ne wò, e dòr, a fàn ji kìn kinyo ki kòóy ne wò.»

⁴⁹ Wù nèn bìnèr jii, «Vèn kì taʼ mo táʼan ji ka? Bó vèn yòʼ kì ji m kù kér fó a dzə e Tàr wór lav fèn à?»

⁵⁰ Wù bìnèr bèy, la á yòʼ fə̀m kìíy mo wù suuy bèy, a kí dzə̀.

⁵¹ Wù nèn lò, wùn áwune kfə́n é Naasarer, wù wáa dzə, a yu áwune kijuujùŋ. Mo vinyo vee shooy vi kooyin bey, yè wov nèn lèm e shiliv, a lò, a kuumé.

⁵² Jesus ku nèn a dzə, a kuy, a ker vifií, Nyùy wáa kòŋ wun, wíri kfə́n a kòŋ sa.