Ŋwàʼ Jov 8 - ŊWÀʼ NYÙY

Bildad wáy shuu e Jov kinyò

¹ Bildad woo wan wìr Shu nèn shèm e Jov kinyò, a suúy sho jii:

² «Ŋwày, à yíi làmrì bèn, e dù meé e le? Kilamrì ké ki dzə̀ shwér.

³ A dzə̀ Nyùy lòo tinén nsaʼ, wù shòʼór nsər à? A dzə̀ Nyùy woo Ŋgaà Vitaàví Vidzə̀m lòo tinén kinyo, wù wày kiloʼ sho à?

⁴ Wón vée kù‑uù lo jày kinyo e Nyùy, é bo wù maʼ ŋgeʼlàʼ aáwune bìʼ jay wov.

⁵ Aà lò lèn, e tìír vifií, a mbaà a dzə̀ Nyùy, a lon wun woo Ŋgaà Vitaàví Vidzə̀m lónén,

⁶ kí wáa dzə rú ji à dzə̀ là shilóm, kù tíy a dzə̀ é suuyrú, e ké ru kí, bo wù yíi yu tóŋ yé, e siìr láʼ yé fo ji yé wìr woo réŋ.

⁷ Wù siirì, é kéŋ yée wáa jamtín jamtín, é ye wò‑oò kér fo mbìyi wáa yensín e shàr.

⁸ «Ku tàr fo ŋgwàʼ ye yì‑iì shaàn ne, e gwàrìr vinyo ve atàr vee fó mbìyi‑iì kavin, e lèm.

⁹ Vèsən kù dzə̀ kesən wón ve á dzəən é yooné yooné, a bó á yòʼ kì kifá. Dzəʼə̀m yesən yeé kitu ke nsayi kù shaa shaàn moo kindzə̀ə́ndzəm.

¹⁰ Bó yòʼ dzə̀ atàr vee fó ŋgùʼú fò vifií vév e wò à? Bó yòʼ dzə̀ áwune lì kinyo ke vé‑eè kiiyin, e tìr wò sho à?

¹¹ «A dzə̀ ŋkiʼ wàa tèʼ e kirə̀ʼ, a bó kishàʼshaʼ ki yòʼ dzə̀ fó à? A dzə̀ joò wàa tèʼ, a bòʼrì, a bó ndzə́ví yòʼ dzə̀ fó à?

¹² Ndzə́ví yúmé, bo kù tombìy yum joò, e yum, a wù yóʼ ne fə̀m tàvkír.

¹³ Á mo kinjòʼsì ké wìr dzə̀m ve á méŋ Nyùy ki dzəə̀n, a tiír ye bìnbìnteʼnsə́m tiir vifií fó mbìyi kù wíy lày kisáŋ.

¹⁴ Wù kù tiir vifií a dzə̀ é kifa ke kí lo, e bvəʼə́m lèn lèn, yéʼti e kifa a dzə̀ ke kí dzəə̀n là kitar moo láv taàŋgám.

¹⁵ Wù yéʼti e wun bùʼ, a bó yòʼ dzə̀ wù kìŋsìn wun. Wù lùm ne kéŋ rə́, e kpù shó, a bó yí yòʼ yíi tiytíy.

¹⁶ «Wù lo, wù wàa kuy, a rə̀sìn moo kicí ke kí tókir e shùy, a tám sə́ sí saŋrì e kiboo.

¹⁷ Gháŋ sə́ sí ron e nsàn se tiy, leey kirə́ʼ ke a dzə̀ sí fàáy shó.

¹⁸ Yii bèy, aá lòo dzə, e dzə̀n fo nsay, la wìr yòʼ kfə̀n dzəə kìíy ji kifá ki‑iì kúy a fo.

¹⁹ Rúrú, á mo vijuŋ ve wìr ve á méŋ Nyùy vi màyìn kév bey. Ví mayì, ámóʼ vee wíri nèn a kuy, a lì virə́ʼ vév.

²⁰ «Ké ru kí, bó Nyùy yòʼ wíy bìn ndzə̀m e wìr woo là nsem, a bó wù yòʼ wíy a tom wír ve bií.

²¹ Wù kfə̀n dzəə́ wìy sheʼér wò, e yiì, áà wáa yu vijuŋ, a sàvnìn,

²² a wù kù wíy shoór wír ve á ban wò adzə̀m, e laàr melav me wìr ve á méŋ wun.»