Ŋwàʼ Jov 7 - ŊWÀʼ NYÙY

Jov dzə́sí ji ŋgeʼ sə́ sí dzə̀, a bó yòʼ dzə̀ á rəə̀r

¹ «Kí wìr msòŋ lóo dzə e nsay, wù kù a tuŋ kwiiròn? Bó vishiíy və́ ví yòʼ kù dzə̀ moo vé wìr wo á tsəərin é shùu lìm à?

² Wù dzə̀ moo kwàn wo wú diy ji wun ku meèmè fo kindzə̀ə́ndzəm, a dzə moo wír wo á tsəərin é shùu lìm, wù wáa shii vilaʼày və́.

³ Kù dzə̀ mo m túŋ kwiiròn kisáŋ, ŋwee si ŋwee si. Mo vitsə́ʼ vi dzəə̀n, m kù kfə́r a dzə̀ sóŋ.

⁴ M neem e kikun, m kù a kaa ndzə kaán, neemè, vitsə́ʼ ví kù a dàrnìn dàrnìn, m kù a buʼ, a kìʼ kìʼìn mo ndzə yíi ran.

⁵ Dzə́r si sì e mǒ vivav wún wóm e dzə̀m, wúné káʼkír mo, a dìy dìyìn.

⁶ Vishiíy vém ví léʼ cércér, a bó m yòʼ kfə̀n kér kwaʼtì ji m wíy bonén.

⁷ «Éè Nyùy, kú a kuumé ji dzəʼə̀m yémé dzə̀ shwér, a bó m yòʼ dzəə́ wìy yu vijuŋ e mǒ dzə̀ʼə̀m.

⁸ Wò wo à yén mo lèn, à yòʼ dzəə́ wìy yen. À yíi a leéy mo, a m yòʼ kfə̀n dzə̀ə́.

⁹ Mo á yén mbàʼŋkfəə́mé lèn, yì lóo raané, yì ŋeèmé, e lày, bo dzə̀ réŋréŋ mo wìr du aàŋkfəə́ wòŋ, la wù yòʼ dzəə kfə̀n.

¹⁰ Bó yòʼ dzə̀ wù dzəə wìy kfə̀n e wun lav, wír vee wun kiliŋe kù làysìn ne wun bèy.

¹¹ «Á bèy, bó yòʼ dzə̀ m sə̀tí shuu wóm. Mo m dzəə̀n é mvə̀m nyar, m kù yíi a làmrì. Mo shilív shí ndzə́ʼ mo, é m kú a suúy.

¹² M dzə̀ kém ji rìbà ndzə̀v a, é bo à wáa kìŋ mo? M dzə̀ kigàgǎʼsòŋ a, é bo à lem nshìy ji yì wáa sə̀r mo?

¹³ M lóo ki ji mo‑óò neem, e meèmè, é kikún kém kí rəər nyár yém,

¹⁴ à kù a bemér mo e njèm si, a kèr tím yém e vinjeenjèm vi.

¹⁵ A dzə̀ bey, bo bòŋ ke m kpú, kìn ji m kesin, e shaà fóo yum, e kfən vighvə́r vighvə́r.

¹⁶ M sí lón a dzə̀ kpú, bó m yòʼ‑oò wíy shaàrì. Ku màʼtì mo bey, bìʼ fo dzəʼə̀m yémé siìn moo kiyúy.

¹⁷ «Éè Nyùy, wìr msòŋ á ka, é bo à wáa koʼór wun, a tiír vifií vé e wùn wó?

¹⁸ Wù dzə̀ ka, é bo à wáa wìy, a ghan wun kijàvndzə kidzə̀m, a tàr kinyo kfə́ fó fó.

¹⁹ Òó mbaà, bó yòʼ dzə̀ à kù rə̀ʼ sí fo mǒ wùn, e màʼtì mo vèr mòʼón, é m yú fóo mèy shintíy à?

²⁰ Éè, wò wo à kíy wíri, a m yiì kinyo ke bi kí, bo kí sə̀ʼsì wò e gha? À shòʼ a dzə̀ mo ji à tsə́m e nyári ji ka? M kfə̀n ji kibeʼèy ké e le?

²¹ Éè Nyùy, à tèn fóo làysìn jay wom bìʼ ka? À tèn fóo shàʼàr vinyo vém ve bi ví ji ka? Bèr shishàr, é m wáa neŋ e sày, áà wáa tàʼ mo e waá é shuù, yii bèy, a m yòʼ kfə̀n dzə̀ə́.»