Ŋwàʼ Jov 6 - ŊWÀʼ NYÙY

Jov bínér e Elifas ji lamrì ye wun lamrìi dzə̀ á réŋ

¹ Jov nèn bìnèr jii:

² «A dzə̀ ji á wáa fìʼ vidzəəsì vé dòʼshwiíy wo wù kív mo, á fiʼ mo ŋgeʼ sém sí dzə̀rìn, e mèé,

³ vidzəəsì ví shaà vé siy seé rìbà ndzə̀v. Bìʼ bey, á kifá ke m toonè lám.

⁴ Nyùy woo Ŋgaà Vitaàví Vidzə̀m tè ne mo e mvə́n ndzəʼə, ndzəʼ wáa ghanén e mǒ wùn. Wù kìʼ ne mo, m wáa fàn virə́ʼ fánen.

⁵ «A kimbèʼbìy kí kér yí, kí kfə̀n a toŋ à? Mbòŋ wáa ker viyíkìr, wù kfə̀n a toŋ jíŋ à?

⁶ A dzə̀ viyíkìr, a ví yòʼ rəʼtìnè, la wìr yòʼ kù tòŋ shiŋgwáŋ à? A dzə̀ foo, a bó á yoʼ shèŋrì, wìr yù fóo yi a?

⁷ Shuu wómé tèn viyíkìr vìn. Ví kóʼoy mo kóʼóyín.

⁸ «Éè mò, la Nyùy kù sí ri yù tóŋ yém, e fò kifá ke m diyì à?

⁹ La wù kù sí ri bvə̀ʼə́y mo, é m kpú a? Wù ku shwèy mo fó kiwo, e laàr dzəʼə̀m yém.

¹⁰ Á kee shooy ke a dzə̀ kí fò mo rəsìn. Mo m ŋéyti sóŋ é mvə̀m ŋgeʼ, é m wáa sàvnìn. A dzə̀ m wàa sàvnìn, bìʼ fo m yoʼ tùn jí se Ŋgaà wo wù dzəə̀n e Ránén.

¹¹ Mbòv wómé bèé, é bo m wáa ker kwaʼtì ji m yíi a dzə sho, a kimaysì kém kí dzə̀ ka, é bo m wáa dìy ji dzəʼə̀m yémé dar?

¹² M kér vitaáví a dzə̀ vé tiy a, mo jav wùn yem dzə̀ kisha kee *brons a?

¹³ Bó m yòʼ kér ghír wóo lùŋèr kitú kém, a bó m yòʼ kfə̀n kér fo a dzə̀ m dù, a toŋ ji á sə́ mo.

¹⁴ «Wìr yii lóo dzə e nsòv bèn, kù a gheén ji bo ŋkar rə kù kì tíy a wùn wun, a fə̀m dzə̀ ji ŋgaàŋ ŋwáy vinyo ve Nyùy yii ŋwáyín.

¹⁵ Ven vee afə́rí lò ne, e neèr a dzə̀ kimboʼtì vèsən. Vèn sì moo wón ndzəv ve shùy báné, á yùm.

¹⁶ Á lo e ghan símóʼ sí, á wàa rə̀ ji tòʼkìkì, a kintòn ki súm ne súmen,

¹⁷ lume wiyì, á kù nèn yùm yúmén, virə́ʼ ví lóo riʼ riʼín, á yùm ben, à ntòŋ sí shó.

¹⁸ Ŋgoo mbèʼŋkùm lo, yì nèn màʼtì kiwuú kév ké dzəə, a jan, a tàʼ ndzə́v fó woʼ, taʼ ntéŋ, á kpùkír.

¹⁹ Ŋgoo se mbèʼŋkùm seé Tema si wàa tàʼ sa, seé Sheba si kù a ker kwaʼtì ji á yíi yen.

²⁰ Vifií vév ví bvəə́ri, bìʼ fo á kì kwaʼtì ji á waà yíi yen, á wíy é kirə̀ʼ ké ndzəv fen, kí túʼúr áwune.

²¹ Ven vin, vèn sì sá moo wón ndzəv vin fo mò. Vèn yén ŋgeʼ se sí kooy mo, fan fànèn.

²² M dzə̀ a m suúy ji m lón kifá fo vèn á? Kìn ji vèn li bùʼ won, e tìn mo shó a?

²³ M dzə̀ a m suúy ji vèn fəə́r mo fo ŋgaà vibǎn wo a? Kìn ji vèn fó mbàm, é bo wír ve á nyavrì e mòó maʼti mo á?

²⁴ «Vèn yéʼéy mo, é m sə́tí shuu wóm. Vèn yii, é m kiíy mo m jayin ne.

²⁵ Jí se suuyrú sí kér rú vitaáví féyì, yii bèy, a bó yòʼ dzə̀ mbìʼ won naàrì kinyo réŋ.

²⁶ Vèn kwaʼtì ji a dzə̀ vèn naàrì mo kinyo kee tìítiy e le, a vèn káy jí se wìr wo wù kpuun ne ŋgeʼ káyín ji shwér?

²⁷ A dzə̀ ven, vèn kù lì wón tsə̀, a tsəm kàŋ sho, a kavnín ŋkar sén, a fiìnè.

²⁸ «Ké lèn ki, vèn ku fò vituʼùr ví e mò, e yù ó ji m sà lo, e boʼtí ven á.

²⁹ M lón ji vèn ku màʼtì kwaʼtì ye bií, e neèr kinyo a dzə̀ keé nsànloŋ, vèn maʼti, e bìnsí ji kinyo ke m yii ki dzə̀ á réŋ.

³⁰ Kinyo kee kintéŋ ki dzə̀ shó à? Dzə̀ ji a kinyo ki kòóy mo, m wàa meŋ à?»