Ŋwàʼ Jov 42 - ŊWÀʼ NYÙY

Nyùy Tàr siír vikuʼùy vé Jov fo

¹ Á bèy, Jov wáa bìnèr e Nyùy Tàr, a suúy jii:

² «Nyùy Tàr, m kì ji à kér vitaáví vidzə̀m vée yiì kinyo ke à koŋè. Aà bà ntaŋ, bo kifá ki yòʼ dzə̀ shó ke a dzə̀ kí bvə̀ə́r.

³ À kì dzə̀r ne e mò ji m sà ghàn é le, e bó a moònìn vinyo ve à yii mo kiìn wò a? Rúrú, m lo fə̀ə́r rú vinyo fo shuù, a m yòʼ kiiy jeéyjeéy mo ví dzəə̀n, vinyo, a ví shaá vitaáví vém, a bó m yòʼ kì.

⁴ «À kì sùúy ji m wàá yuúrí, áà wàá súŋnín á e mò, aà yíi a dzətí a vinyo e mò, é m wáa bìnèr.

⁵ M kù‑uù yú wò yuún, yii bèy, a m yèn ne e sií lèn.

⁶ M kù sí kér a dzə̀ dzə̀rkìtu bìʼ vinyo ve mò‑oò fəərin fó shuù. M fə̀tí ne wó yém fó fo, a ser a dzə̀ é kibvə̀r, kìn é kibvə.»

Kimaysì ké kinyò

⁷ Nyùy Tàr súŋnín e Jov, e màysì, e bìnkìr, e yòŋ e Elifas woo wír woó Teman jii, «M shwiiy kilòŋ wòsò, shwiiy sa vèr à ŋkar sé see sibaà sí, bìʼ fo vèn yoʼ sùúy a dzə̀ kinyo ke ru kí kùm mo. Kù mày ŋgaà lìm wom woo Jov wo wù suuyin kinyo ke ru kí.

⁸ Kí nén a dzə jii, vèn li vinsòŋ ve nyàm vi saàmbà, e lì viyáʼ vi saàmbà, e dù sho fo wìr wom lìm woo Jov, e yiì cu ye tonèné fo věn vitu. Wìr wom lìm woo Jov yíi bùnrì fo vèn, é m yú bunrì rə́, e làa yòʼ dzəə màʼ ŋgeʼ e věn kitu, mo kì dzə̀ m màʼ bìʼ kiyúŋsì kén. Vèn yoʼ sùúy a dzə̀ kinyo ke ru kí kùm mo. Kù mày ŋgaà wom lìm woo Jov wo wù suuyin kinyo ke ru kí.»

⁹ Elifas woo wír woó Teman wùn à Bildad woo wír woó Shu, à Tsofar woo wír woó Naamat nèn kù dù, e yiì réŋréŋ mo Nyùy Tàr‑iì yòŋèn aáwune. Nyùy Tàr nèn kù yù bunrì Jov.

¹⁰ Jov bùnrì fo ŋkar sə́ see sitaár sìn si bey, Nyùy Tàr nèn lò, e kfə̀n siìr vikuʼùy və́ fó, e yiì, kéŋ rəə́ kúʼ virə́ʼ vibaà, e shaà mo yí‑iì dzəə̀n fó mbìy.

¹¹ Lúmér sə́ wùn à jemèr sə́ sí, à wìr dzə̀m wo wù‑uù kiìn wun nèn a wìy, wùn à Jov wáa yikír e wun lav. Aá kù njíysi wun, nyoʼtì bìʼ ŋgeʼ se Nyùy Tàr‑iì màʼàn e wun kitu. A wìr mòʼón mòʼón nə́ʼsin wun aàfómoó, fó wun *kisha ke mbàm ke fəvír kí wùn à ndzə̀ŋgwáŋ woo kisha ke mbàm ke baar kí.

¹² Nyùy Tàr‑iì səə̀vì Jov e ghan sé bàm sin, e shaà mo wù‑uù səə̀vìn fó mbìy. Wù səə̀vì, Jov wáa ker njiì nsə̀kì nshòv sikweè e ghvə̀m, akamer nsə̀kì ntuùfú, ambòŋ ansə̀kì abaà, aá táŋsín abaà abaà, e bóo lì vimbèʼbìy vee vikìy nsə̀kì.

¹³ Wúnwun Jov kfə́n a ker wón vee vilum saàmbà, à vee vikìyí ataár.

¹⁴ Wù‑uù shù yír woo wiíy wo mbìy ji Jemima, e shù wo wù batin ji Kesia, e shù wo bàm ji Keren‑Happuk.

¹⁵ Bó vikìy yòʼ‑oò ló a dzə e kitum foo fèy ve vé‑eè bòŋkìn, e mèé wón Jov vee vikìy vin. Wù lòo jàv kéŋ rə́ e lúmér sév sí, e fò sá yéev yee mbìv.

¹⁶ Jov‑iì yiì vinyo vìn, e kfə̀n bònen bèʼrí kiyá kishóv mkweè e wiì, e yèn wón won, à wón wón woné shó, e bóo shem.

¹⁷ Á bèy, wù wáa kpu, a wù shiíy ne bèn, e kòŋrí.