Ŋwàʼ Jov 41 - ŊWÀʼ NYÙY

¹ «Á bèy, a dzə̀ à koò nyam ndzə̀v yee Leviyatan e lóvi a? A dzə̀ à kùr shuu və́ e kfəə̀, e fìnèr a?

² A dzə̀ à tò kfəə̀ é yuy wo, e sùnrì a? A dzə̀ à shùʼ kijeʼ kfə́ e lóvi, e tòsín à?

³ A dzə̀ yì wàa lon wò ji à ku shàm wun, e màʼtì é wun wáa dù à? A dzə̀ yì wàa suŋnín e wò e jì mboòrì à?

⁴ A dzə̀ yì gwàr *mensaŋ vèn wun, e fò kitú kfə́ ji ŋgaà wò lìm ŋkuuŋkùŋ à?

⁵ A dzə̀ à wày wun e kfəə̀ moo shinə́n, a səərí sho, e kfə̀n a kaarí sho, é wónlě vikìy ve á lim fo wòo li ji kifá kév ké kileèy à?

⁶ A dzə̀ wónlě wayí wàa kavnín wun a? A dzə̀ áwune gwàr wun, e fiìnè e vintin vintin a?

⁷ A dzə̀ à shùʼtì wún və́ e kòŋ se á koó sə́ sho si, e meèsín à? A dzə̀ à shùʼ kitú kfə́, e tòsín e kòŋ sin si á?

⁸ À lóo laʼ kiwó ké e wùn wó, à kù a kuumé rə́r se vèn wun lo, e màʼ, a bó à yòʼ kfə̀n wíy mùm, e kùm wun.

⁹ «Rúrú, kwaʼtì yee ji a dzə̀ wìr koò wune shaà fo ghaŋ. Wìr yén wun, vitaáví ví wèʼ wéʼen, wù gbù gbúun é nsay.

¹⁰ Bó wìr yòʼ dzə̀ shó wo wù yú shilív wo dzə̀ wù sə̀ʼ wun. Mo kí dzəə̀n bey, bo wìr wo a dzə̀ wù tìím, e tàm vèr wun dzə̀ la?

¹¹ Wìr wo wù‑uù yiìn ne fò kifá e mò, é bo m laʼ wun dzə̀ la? Bó kifá keé kitu ke nsay kidzə̀m ki yòʼ dzə̀ kém a?

¹² «Yuúrí, é m naari e wò mo shwín sé Leviyatan si yii dzə́. M yíi a fèr vitaáví ve ghaʼtín ve yì kérí, a fèr mo mbom rə dzəə̀n e juŋ.

¹³ Wìr wo a dzə̀ wù yùv júv rə dzə̀ la? A dzə̀ shùʼ la vibá ve ví vaasin, a kìŋsìn wún və́?

¹⁴ Kér la vitaáví vée yiì, é yì mvəʼ shuu və́, a wíri sí leey sóŋ rə́, a wúné beéme beèmén?

¹⁵ Vibá ve tavkín ví sə̀ ndzə̀m rə e dzə̀m, e yùŋsìn mo á fiì fiìn.

¹⁶ Kímóʼ kí kù bár e kímóʼ kí wùn, e dzəə ye bó yòʼ dzə̀ shwér, wú tòsín é nsàn si wó.

¹⁷ Ví yùŋsìn, kímóʼ e kímóʼ kí wùn, a bó yòʼ dzə̀ á bàytì.

¹⁸ Nyàm rə̀n shémé, mesásáy mè fəə̀, a mè bavkìrì, síi wàa bàŋ fo fo moo kintoshùy.

¹⁹ Kiliímé ke və̀y kí lo, kí wàa mee fo wun shuù, mesásáy me və̀y mè wàa liykír, a fəə.

²⁰ Yì lóo yòy, kindzə́ʼ ki wàa mee fo yuy, kù mo kí meè fó ntòn wo á yuŋrì.

²¹ Kiyoy ke yì yoy ki dzəy və́y, a kiliímé ke və̀y kí yii meé fo wun shuù.

²² Kilòŋ kfə́ kí dzə̀ féyì kirúnén, din vitaáví, wìr méʼ wun, fáne kù a yuy ŋgaàŋ yúyín.

²³ Virə́ʼ və́ ve boorín ví tàvtí, a dzə vifur vifur, a dzə ji ŋkǒŋ, a yòʼ dzə̀ kifá ki sə̀ʼ.

²⁴ Shilív shí dzə̀ fó fo ji tíy, táv moo ŋgòʼ ye á yii jo ŋkfə̀ŋ sho.

²⁵ Nyàm rə̀n ŋáʼayì, antav ve á meen áàntavi wàa ker tím a dzə̀ é wo, a siìr ŋkfənèr, a fáne sí yúy áwune yúyín.

²⁶ Aá fə̀m gwàr wun gwárin e nyùy rə̀r, e lì kòŋ, à yé njàʼa, à mvəne, e sìʼ wun sho, bo bó yòʼ dzə̀ ví yiì kifá e wun.

²⁷ Nyàm rə̀n lo, yì wàa yen kfə́ kisha ji shighám shé wuy, a yen kisha ke *brons ji shiŋkaʼ she shí bvə̀ʼə̀n ne.

²⁸ Á maʼ wun e mvəne, a bó yòʼ dzə̀ wù wàa leʼ, a wù kù yén tíy ye á rəər fo kiŋkoʼ ji mvə́y,

²⁹ yén vimbuʼ ji vishaárín. Á maʼ wun e kòŋé, wù wàa sheʼ kfə́ shéʼén.

³⁰ Sár bvə̀me dzə̀ fó fo ji kimbvə́ʼ ke kìŋ, wù lóo sə̀ŋ bvəm e nsay, yí fèr nsə̀ŋ e kishàʼàr.

³¹ Yì nəə e ndzəv, yì yiì, yí wàa yòr, a bìnkìr moo ntòn wo á yuŋrì, nəə, yì yiì, rìbà ndzə̀v wàa yòr, a sèv moo kíŋ shìv.

³² Yì lóo laʼ ndzə́v, lóo dù, yì fèr nsə̀ŋ, yì wàa fə̀ʼ, a njàʼkìr fo bàm, e yiì, rìbà ndzə̀v wàa fə̀ʼ, a fər moo fúv.

³³ Dzə̀ nyám, a yì yòʼ yii fan fan, a kifá ki yòʼ dzə̀ é kitu ke nsay ke dzə̀ á fìʼsìn shó.

³⁴ Yì lo, yì wàa yen nyám sidzə̀m, a sí yoʼ mèé e wun kiwuù, a sáʼ wun nyám se kwaʼ sidzə̀m.»